Ai Vola I Niemiya 4 - AI VOLA TABU（FIJ1864）

Ni sa le vuqa ka gumatua ko ira na meca, sa daumasu ko Niemiya, ka ra kitaka ga na cakacaka ko ira na tamata, a ra sa vakaiyaragi tu.

1IA ni sa rogoca ko Sanipalati, ni keimami sa viria na bai, sa cudru ko koya, ka levaci ira na Jiu, ka vakalialia.

2A sa vosa ko koya e na matadra na wekana kei nai valu ni Samaria, ka kaya, A cava era sa mani kitaka ko ira na Jiu malumalumu o qo? era na vakaukauwataki ira li vakai ira? era na kitaka li nai soro? era na vakaotia beka e na siga e dua bau? era na Vakabula tale li na veivatu mai nai soqosoqo sa kama?

3A sa tu vata kaya ko Topiya na Amoni, a sa kaya ko koya, Na ka era na viria, kevaka sa lako cake e dua na fokisa, ena basuka sobu na nodra bai vatu.

4Mo rogoca, na neimami Kalou; ni keimami sa beci; ka mo vakasuka na nodra vosa ca me tauca na uludra, ka soli ira me ra tokitaki ki na vanua ni bobula:

5ia mo kakua ni ubia na nodra caka cala, me kakua talega ni bokoci na nodrai valavala ca e matamu: ni ra sa vakacudrui iko e na matadra era sa viri bai.

6Ia keimami a viria na bai; a sa veiuturi kecega e dua na wase ni bai: ni sa via cakacaka ko ira na tamata.

7Ia ni ra sa rogoca ko Sanipalati, kei Topiya, kei ira na kai Arapia, kei ira na Amoni, kei ira na kai Esitoti, ni sa veiuturi na bai mai Jerusalemi, ka vakatekivu me viri vinaka na tikina ka basuki; era sa qai cudru vakalevu,

8ka buki vere vata ko ira kece me vala kei Jerusalemi, me tarova.

9Ia keimami a ia ga na neimami masu vua na neimami Kalou, ka lesia nai vakatawa me yadravi ira e na siga kei na bogi, io e na vukudra.

10A sa kaya ko ira na Juta, Sa malumalumu mai na nodra kaukauwa na daucolacola, a sa levu nai soqosoqo, eda sa sega ni viritaka rawa kina na bai.

11A ra sa kaya na noda meca, Era na sega ni kila, se kunea, eda na lako mada ki na kedra maliwa, ka vakamatei ira, ka muduka na cakacaka.

12Ia ni sa lako mai ko ira na Jiu era sa tiko voleka vei ira, era sa kaya vakatini vei keimami, Mai na yasana kecega kemudou sa lesu mai kina vei keimami, era na lutuki kemudou.

13O koya kaʼu a lesi ira kina na tamata e na yasana era, mai daku ni bai, kei na yasana cecere, io kaʼu a lesi ira na tamata e na nodra mataqali me ra vakaiseleiwau, ka vakamoto, ka vakadakai dina.

14Ia kaʼu a rai voli, ka tu cake, ka kaya vei ira na turaga, kei ira na turaga e lewa tiko, kei ira na tamata sa vo, Dou kakua ni rerevaki ira: dou nanumi Jiova, sa levu ka rerevaki, ia dou vala e na vukudra na wekamudou, na luvemudou tagane, kei na luvemudou alewa, na watimudou, kei na nomudou veivale.

15Ia ni sa rogoca ko ira na neimami meca ni sa kilai vei keimami, a sa vakatawayagataka ko na Kalou na ka era a bosea, keimami sa lesu kecega ki na bai, na tamata yadua ki na nonai tavi.

16Ia mai na gauna ko ya, sa cakacaka ko ira e dua na wase ni noqu tamata, a sa taura ko ira na wase kadua na veimoto, kei na veisasabai, kei na veidakai dina, kei nai yaragi; a sa tiko mai daku ni veivale kecega ni Juta ko ira na turaga ni lewa.

17O ira era sa viri e na dela ni bai, kei ira era daucolacola, kei ira era sa kau ka, era kitaka na cakacaka e na liga e dua, ka tara nai yaragi e na kena kadua:

18ni sa vauca yadua ko ira na dauviri bai na nonai seleiwau ki na sarisarina, ka viri tiko. A sa tiko vata kei au ko koya sa dauuvu davui.

19Au a qai kaya vei ira na turaga, vei ira talega era lewa tiko, vei ira kece talega na tamata, Sa levu na cakacaka o qo ka rabailevu, ia eda sa wasewase e na dela ni bai, ka veiyawaki tu:

20a tikina dou na rogoca maikina na domo ni davui, dou vakasoqoni kemudou kina vei keitou: ena vala na noda Kalou e na vukuda.

21Ia keimami a kitaka tiko na cakacaka: a sa taura tu na veimoto e dua na wase, mai na mataka caca ka yaco me cadra na veikalokalo.

22Au a kaya talega e na gauna ko ya vei ira na tamata, Me ra moce yadua kei na nonai talatala e Jerusalemi, me ra vakatawai keda e na bogi, ka cakacaka e na siga.

23Ia koi au, kei ira na wekaqu, kei ira na noqu tamata, kei na tamatai vakatawa era muri au, sa sega e dua vei keitou sa luvata tani na nonai sulu, ia me sava ga era sa luvata.