1IA e na vula ko Nisani, e nai karuasagavulu ni yabaki i Aritasasita na tui, sa tu e na matana na waini: ia kaʼu a tara cake na waini, ka solia vua na tui. Ia kaʼu sa sega ni vakaveveku mata eliu e na matana.
2A sa kaya kina vei au ko na tui, A cava ko sa vakaveveku mata kina, ni ko sa sega ni tauvi mate? sa sega ni ka tani o qo, na mosi ga ni loma. Au a qai rere vakalevu sara,
3ka kaya vua na tui, Me tawa mudu na nona bula na tui: meʼu tawa vakaveveku mata beka, ni sa rusa koto na koro, na yasana ni nodrai bulubulu na noqu qase, a sa kama e na buka na kena veimatamata-ni-koro? Sa qai kaya vei au ko na tui, A cava ko sa mani kerea?
4Au sa qai masu vua na Kalou ni lomalagi.
5Ia kaʼu sa kaya vua na tui, Kevaka e vinaka vua na tui, ia kevaka ko sa lomani au na nomu tamata, mo talai au ki Juta, ki na koro ni nodrai bulubulu na noqu qase, meʼu tara.
6A sa kaya vei au ko na tui, (ni sa tiko talega kaya ko na ranadi,) O na lako ka vula vica? ko na lesu mai ninaica? A sa vinaka vua na tui me talai au; au a qai lokuca vua na vula.
7Au a kaya talega vua na tui, Kevaka e vinaka vua na tui, me solia ga vei au nai vola vei ira na turaga mai tai kadua ni uciwai, me ra kauti au yani meʼu yaco mada ki Juta;
8kei nai vola vei Esafi nai vakatawa ni nona veikau na tui, me i solia vei au ko koya na kau me kau ni matamata-ni-koro ni yasana kaukauwa ni vale, kei na bai ni koro talega, kei na vale kaʼu na curuma. A sa solia vei au ko na tui me vaka na liga vinaka ni Kalou ka tiko vei au.
9Au a qai lako mai vei ira na turaga mai na tai kadua ni uciwai, ka solia vei ira nai vola ni tui. Ia sa tala kei au ko na tui, e so na turaga ni valu ka so era sa vodo e na ose.
10Ia ni sa rogoca ko Sanipalati na kai Oroneimi, kei Topiya nai talatala, na luve i Amoni, erau sa rarawa vakalevu ni sa lako mai e dua na tamata me qara na ka me vinaka kina ko ira na luve i Isireli.
11Ia kaʼu a yaco ki Jerusalemi, ka tiko kina ka bogi tolu.
12Au a qai tu cake e na bogi, koi keitou vata kei iratou na tamata e lewe vica; ia kaʼu a sega ni tukuna vua e dua na tamata na ka sa viria ki na lomaqu na noqu Kalou me caka mai Jerusalemi: sa sega tale vei au e dua na manumanu, na manumanu ga kaʼu a vodoka.
13Ia kaʼu a curu yani e na bogi e na matamata-ni-koro ki na buca, io e na mata ni keli-wai ni gata, kei na matamata-ni-koro ni benubenu, ka dikeva na veibai ni Jerusalemi, a ya ka basuki sobu, a sa kama e na buka na kena veimatamata-ni-koro.
14Au a qai lako yani ki na matamata-ni-koro mai nai keli-wai, kei na nonai keli-wai levu na tui: a sa sega na tikina me lako yani kina na manumanu kaʼu sa vodoka.
15Au a qai lako cake e na soniwai e na bogi, ka dikeva na bai, ka lesu mai, ka curuma na matamata-ni-koro ki na buca, ka lesu yani.
16A sa sega ni kila ko ira na turaga seʼu a lako kivei, se cava kaʼu a cakava; e sa sega talega niʼu tukuna vei ira na Jiu, se vei ira na bete, se vei ira na tamata turaga, se vei ira era dauveilewai tiko, se vei ira era sa kitaka na cakacaka.
17Au a qai kaya vei ira, Dou sa raica na ca eda sa tiko kina, ni sa rusa koto ko Jerusalemi, a sa kama e na buka na kena veimatamata-ni-koro: tou ia, tou viria na bai ni Jerusalemi, me da kakua ni rogo ca tiko.
18Au a qai tukuna vei ira na liga ni noqu Kalou sa vinaka vei au; kei na vosa talega ni tui a ya ka vosataka ko koya vei au. A ra sa kaya, Tou ia, ka viria. A ra sa vakaukauwataka na ligadra ki na cakacaka vinaka.
19Ia ni ratou sa rogoca ko Sanipalati na kai Oroneimi, kei Topiya nai talatala na luve i Amoni, kei Kesemi na kai Arapia, eratou sa vakalialiai keda, ka beci keda, ka kaya, A cava na ka o qo dou sa kitaka? dou na talaidredre beka vua na tui?
20Au a qai vosa vei iratou, ka kaya vei iratou, Na Kalou kei lomalagi, ena vakayacora na ka keimami sa cakava; o koya ena ia kina me viri koi keimami, na nona tamata: ia koi kemudou, sa sega na nomudoui votavota, se na ka e dodonu me nomudou, se na ka me nanumi kina mai Jerusalemi.
Who We AreWhat We EelieveWhat We Do
2025 by iamachristian.org,Inc All rights reserved.
