Ai Vola I Niemiya 1 - AI VOLA TABU（FIJ1864）

A WASE I. —Sa rarawa ko Niemiya ni sa rogoca ni sa ca ko Jerusalemi; a sa tagi, ka lolo, ka masu vua na Kalou.

1A VOSA i Niemiya na luve i Ekaliya.

Ia e na vula ko Kisiliu, e na kenai karuasagavulu ni yabaki, ni kaʼu a tiko mai Susani e na vale ni tui,

2sa lako mai ko Enani, e dua vei ira na wekaqu, ka so vei ira na Juta; ia kaʼu a tarogi iratou e na vukudra na Jiu era sa dro bula, o ira sa vo vei ira na vakabobulataki, ka e na vuku i Jerusalemi.

3A ratou sa kaya vei au, O ira sa vo vei ira na vakabobulataki mai na yasana ko ya, era sa tiko vakaca sara, a ra sa vosavakacacataki: sa basuki sobu talega na bai kei Jerusalemi, a sa kama e na buka na kena veimatamata-ni-koro.

4Ia niʼu sa rogoca na vosa o qo, au a tiko sobu ka tagi, ka yaso ka bogi vica, ka lolo, ka masu e matana na Kalou ni lomalagi, ka kaya,

5Au sa masuti iko, i Jiova na Kalou kei lomalagi, na Kalou levu ka rerevaki, sa vakabauta tiko na nomu vosa ni yalayala kei na yalololoma vei ira era sa lomani iko ka vakabauta na nomu vunau:

6me rogo mada na daligamu, ka yadra na matamu, mo rogoca kina na masumasu ni nomu tamata, a ya kaʼu sa qai kitaka e matamu, e na siga kei na bogi, e na vukudra na luve i Isireli na nomu tamata, niʼu sa vakatusa talega na nodrai valavala ca na luve i Isireli, a ya keimami sa cakava vei iko: keimami sa valavala ca, koi au kei ira na mataqali ni noqu qase.

7Keimami sa cakacaka vakasisila sara vei iko, ka sega ni vakabauta na veivunau, se na veivakaro, se na veilewa, a ya ko a vunautaka vei Mosese na nomu tamata.

8Mo nanuma mada na vosa ko a vunautaka vei Mosese na nomui talatala, ni ko a kaya, Kevaka dou sa talaidredre, au na dui vakasevi kemudou e na veimatanitu:

9ia kevaka dou na lesu mai vei au, ka vakabauta na noqu veivunau, ka cakava; kevaka sa vakasevi tani e so vei kemudou ki na sausau kei lomalagi, au na vakasoqoni ira maikina, ka kauti ira ki na yasana kaʼu sa digitaka me vakatikora kina na yacaqu.

10Ia ko ira o qo era nomui talatala kei na nomu tamata, ko a vakabula e na nomu kaukauwa levu, kei na ligamu kaukauwa.

11Turaga, me vakarorogo mada na daligamu ki na nona masumasu na nomu tamata, kei na nodra masumasu na nomu tamata, ko ira era via rerevaka na yacamu: ia mo vakayacora mada na ka e cakava na nomu tamata e na siga o qo, ka solia me lomani au na tamata o qo. Ni sa noqui tavi me tara na mena bilo na tui.