Ai Vola I Esira 9 - AI VOLA TABU（FIJ1864）

Sa rarawa ko Esira e na vuku ni sa veiwatini kei ira na kai tani ko ira na Jiu, 1-5; a sa masu ko koya vua na Kalou.

1IA ni sa caka oti na veika o qo, sa lako mai vei au ko ira na turaga, ka kaya, O ira na tamata na Isireli, kei ira na bete, kei ira na Levi, era sa sega ni tawasei ira tani maivei ira na lewe ni veivanua, a sa cakacaka me vaka na nodrai valavala vakasisila na kai Kenani, na luve i Eci, na lewe ni Veikoro lalai, na kai Jepusa, na luve i Amoni, na kai Moapi, na kai Ijipita, kei ira na luve i Amori:

2ni ra sa kauta na luvedra alewa me nodra, me nodra talega na luvedra tagane: a ra sa waki vata kina na kawa tabu kei ira na lewe ni veivanua o qo: io sa liu e nai valavala ca o qo ko ira na turaga kei ira na turaga ni veimataqali.

3Ia niʼu a sa rogoca na ka o qo, au sa dresulaka na noqui sulu kei na noqui sulu esau, ka vutia tani na drau ni uluqu, kei na kumiqu, ka tiko sobu ka kurabui.

4Era sa qai soqoni vata mai vei au ko ira yadua era sa sautaninini e na vosa ni nodra Kalou na Isireli, e na vuku ni nodra talaidredre na kauti tani; ia kaʼu sa tiko ka kurabui ka yacova nai solo ni yakavi.

5Ia ni sa ia nai soro e na yakavi, au sa tu cake mai na noqu bibi; a sa dresulaki oti na noqui sulu kei na noqui sulu esau, au sa vakatekiduru, ka dodoka yani na ligaqu vei Jiova na noqu Kalou,

6ka kaya,

Noqu Kalou, au sa madua ka matacea me ta cake na mataqu vei iko, noqu Kalou: ni sa tubu me levu na neimami caka cala me sivia na uluimami, a sa tubu na neimami talaidredre me yala ki lomalagi.

7Mai na nodra gauna na neimami qase, keimami sa talaidredre vakalevu ka yacova na siga o qo; ia e na vuku ni neimami caka cala, keimami sa soli oti yani ki na ligadra na tui ni veivanua, oi keimami kei ira na neimami tui kei ira na neimami bete, ki nai seleiwau, ki na veivakabobulataki, kei na veivakacacani, kei na veivakamaduataki, me vaka e na siga o qo.

8A sa lomani keimami ko Jiova na neimami Kalou ena dua na gauna lailai o qo, me vakavoca vei keimami e so me bula, ka me cakavi keimami mei vako e na nona vale tabu, me vakararamataka na mata i keimami na neimami Kalou, ka vakaukauwataki keimami vakalailai e na neimami vakabobulataki.

9Ni keimami a tamata bobula; a sa sega ni biuti keimami na neimami Kalou e na neimami vakabobulataki, a sa vakayacora vei keimami na yalololoma e na matadra na tui Perisia, me vakaukauwataki keimami, me tara na vale ni neimami Kalou, ka me vakavoui na yasana sa lala tu, me solia talega vei keimami e dua na bai e Juta kei Jerusalemi.

10Ia neimami Kalou, a cava me keimami kaya, ni sa oti na ka o qo? ni keimami sa biuta na nomu veivakaro,

11a ya ko sa vakarota e na gusudra na nomui talatala na parofita, ni ko sa kaya, A vanua dou sa lako kina me taukena, sa vanua dukadukali, e na nodra dukadukali na lewe ni veivanua, e na nodra ka vakasisila, a ya sa sinai tu kina e na nodra dukadukali, mai na kenai yalayala o dua ki na kenai yalayala kadua.

12O koya o qo mo dou kakua ni solia na nomudou gonealewa ki na nodra goneatagane, kakua talega ni kauta na nodra gonealewa vei ira na nomudou goneatagane, se qara na ka me ra vakacegu se vakayau kina ka tawa mudu: mo dou kaukauwa kina, ka kania na vinaka ni vanua, ka laiva vei ira na luvemudou me ra taukena, ka tawa mudu.

13Ia ni sa yacovi keimami na ka kecega o qo e na vuku ni neimami caka ca, kei na neimami talaidredre levu, a sa sega ni tautauvata kei na neimami valavala ca na cudru ni Kalou vei keimami, a sa lailai sobu, a sa vakabulai keimami vakaoqo;

14keimami na vakacacana tale li na nomu veivakaro, ka laʼki veiwekani kei ira na tamata era sa valavala vakasisila vakaoqo? o na sega kina li ni cudruvi keimami mo vakaoti keimami, me kakua kina e dua sa vo se dro bula?

15I Jiova na nodra Kalou na Isireli, o sa yalododonu; ni keimami sa vo ka bula, me vaka e na siga o qo: raica, keimami sa tiko e matamu e na neimami talaidredre: ni keimami sa sega ni tu rawa e matamu e na vuku ni ka o qo.