Ai Vola I Esira 8 - AI VOLA TABU（FIJ1864）

Sa lako ko Esira kei ira na Jiu e lewe vuqa, ka ra yaco ki Jerusalemi, ni sa vakarurugi ira ko Jiova.

1O IRA o qo na turaga vei ira na nodra qase, a sa vakaoqo na kedrai tubutubu keitou a lako cake vata mai Papiloni, ni sa lewa tiko ko Aritasasita na tui.

2Maivei iratou na luve i Piniasi: o Kerisomi; maivei iratou na luve i Icamari: o Tanieli; maivei iratou na luve i Tavita: o Atusi;

3maivei iratou na luve i Sikaniya, vei ira na luve i Ferosi: o Sikariya; a sa wili vata kaya e nai vola ni tubutubu e dua na drau ka limasagavulu na tagane.

4Maivei iratou na luve i Peaci-moapi: o Elioenei na luve i Siraya, kei ira vata kaya e rua na drau na tagane.

5Maivei iratou na luve i Sikaniya: na luve i Yeesieli, kei ira vata kaya e tolu na drau na tagane.

6Maivei iratou na luve i Atini: o Epeti na luve i Jonacani, kei ira vata kaya e limasagavulu na tagane.

7Maivei iratou talega na luve i Elama: o Isaya na luve i Acaliya, kei ira vata kaya o vitusagavulu na tagane.

8Maivei iratou talega na luve i Sifativa: o Sipatiya na luve i Mikaeli, kei ira vata kaya e walusagavulu na tagane.

9Maivei iratou na luve i Yoapi: o Opatiya na luve i Yieli, kei ira vata kaya e ma na drau ka tini ka walu na tagane.

10Maivei iratou talega na luve i Silomici: na luve i Yosipiya, kei ira vata kaya e dua na drau ka onosagavulu na tagane.

11Maivei iratou talega na luve i Pepai: o Sikariya na luve i Pepai, kei ira vata kaya e ruasagavulu ka walu na tagane.

12Maivei iratou talega na luve i Asikati: o Yoanani na luve i Katani, kei ira vata kaya e dua na drau ka tini na tagane.

13Maivei iratou talega na luve i Etonikami emuri, a yacadratou o qo, o Ilifeleti, o Yieli, kei Simaya, kei ira vata kaya e onosagavulu na tagane.

14Maivei iratou talega na luve i Pikivai: o Ucei, kei Saputi, kei ira vata kaya e vitusagavulu na tagane.

15Ia kaʼu a vakasoqoni ira vata ki na uciwai sa drodro ki Aeva; ia keitou a tiko maikina ka bogi tolu e na vale vakacevaceva: ia kaʼu a raici ira na tamata, kei ira na bete, ka sega ni kunea e dua vei ira na luve i Levi.

16Au a qai talaki me lako mai ko Elieseri, kei Erieli, kei Simaya, kei Elinacani, kei Yaripi, kei Elinacani, kei Nacani, kei Sikariya, kei Mesulami, eratou tamata turaga; ko Yoyaripi talega, kei Elinacani, oi rau na tamata daukila ka.

17Kaʼu a qai talai iratou me kauta na vosa vei Ito na turaga ni koro ko Kasifiya, ka kaya vei ira mo ra vosa vei Ito, vei ira na wekana na Necinimi, mai na koro ko Kasifiya, me ra kauta mai vei keda e so nai talatala me yaga e na vale ni noda Kalou.

18Ia e na vuku ni liga vinaka ni noda Kalou vei keda era a kauta mai vei keda e dua na tamata vuku, maivei iratou na luve i Mali, na luve i Levi, na luve i Isireli; kei Serepiya, kei iratou na luvena kei iratou na wekana, eratou tinikawalu;

19kei Esapiya, kei ira vata kaya ko Isaya maivei iratou na luve i Mirari, ko iratou na wekana kei iratou na luvedratou, eratou ruasagavulu;

20maivei iratou talega na Necinimi, ka lesia ko Tavita kei ira na turaga me qaravi ira na Levi, e rua na drau ka ruasagavulu na Necinimi: sa cavuti kece e na yacadra.

21Au a qai tukuna maikea na lolo, mai na uciwai ko Aeva, me keimami vakararawataki keimami e na mata ni neimami Kalou, me kerea vua me neimami na sala dodonu me nodra talega na neimami lalai, kei na neimami ka kecega;

22niʼu a madua ni kerea vua na tui na mataivalu, kei ira na tamata e vodo e na ose, me totaki keimami e na vuku ni meca e na sala: e na vuku ni keimami sa vosa oti vua na tui, ka kaya, A liga ni neimami Kalou sa tiko vakavinaka kei ira kece sa qarai koya; ia na nona kaukauwa kei na nona cudru sa veivala kei ira kece era sa biuti koya.

23Ia keimami a lolo ka masuta na neimami Kalou e na vuku ni ka o qo: a sa vakamasuti ga vei keimami.

24Au a qai tawasea tani e tinikarua vei ira era liu vei ira na bete, ko Serepiya, ko Esapiya, kei iratou e lewe tini na weka-drau, ka vakatovolea na bibi ni siliva vei ira, kei na koula,

25kei na veiyaya, io na ka sa vakacabori e na vuku ni vale ni neimami Kalou, a ya ka vakacabora ko na tui, kei iratou na turaga eratou sa daubose kaya, kei iratou na nona tamata turaga, kei ira kece na Isireli era tiko maikeri:

26au a vakatovolea na kena bibi ki na ligadra, e ono na drau ka limasagavulu na taledi siliva, kei na veiyaya siliva e dua na drau na taledi, ka sa dua na drau na taledi koula;

27a sa ruasagavulu na bilo koula, a ya sa dua na udolu na tarama; ka rua na bilo kopa e talei, me tautauvata kei na koula.

28Ia kaʼu a kaya vei ira, Dou sa savasava vei Jiova; a sa savasava talega nai yaya; ia na siliva kei na koula na ka-ni-loloma sa vakacabori vei Jiova na Kalou ni nomudou qase:

29dou vakatawa, ka maroroya, me yacova na siga dou na vakatovolea kina na kedra bibi e na matadra era liu vei ira na bete kei ira na Levi, kei ira era liu vei ira na nodra qase na Isireli, mai Jerusalemi, e na vale ni yau ni vale i Jiova.

30A sa vakatovolea na bibi ni siliva, kei na koula, kei na veiyaya, ko ira na bete kei ira na Levi, me ra kauta ki Jerusalemi ki na vale ni noda Kalou.

31Keimami a qai lako mai na uciwai ko Aeva e nai katinikarua ni siga ni matai ni vula, me lako ki Jerusalemi: a sa tu vei keimami na liga ni noda Kalou, ka vakabulai keimami mai na ligadra na meca, kei ira era lawa koto e na sala.

32Ia keimami a yaco ki Jerusalemi, ka tiko kina ka bogi tolu.

33Ia e nai kava ni siga, sa vakatovolei na bibi ni siliva, kei na koula, kei na veiyaya, e na vale ni noda Kalou, ni sa kitaka ko Miremoci na luve i Uriya na bete; a sa tiko kaya ko Eliasari na luve i Piniasi, ka tiko kei rau ko Yosapati na luve i Josua, kei Noatiya na luve i Pinui, koi rau na luve i Levi;

34sa wili ka vakatovolei na bibi ni ka kecega: a sa volai na kena bibi kece e na siga ko ya.

35Ia ko ira na luvedra era a kauti tani, o ira era sa lako tale mai na vakabobulataki, era sa vakacabora vua na nodra Kalou na Isireli, nai soro kama a ya na karavau e tinikarua e na vukudra kecega na Isireli, e ciwasagavulu ka ono na sipi tagane, e vitusagavulu ka vitu na lami, e tinikarua na koti mei soro ni valavala ca: a ka kece sai soro kama vei Jiova.

36A ra sa solia nai vola ni vosa ni tui vei ira na nona turaga na tui, kei ira na turaga era lewa e na tai o qo ni uciwai: a ra sa vukei ira na tamata, me rawa na vale ni Kalou.