II. A Veika Sa Caka E Na Veigauna 36 - AI VOLA TABU（FIJ1864）

Sa tui Juta ko Yioaasi, kei Yioyakimi, kei Yioyakini, kei Sitikiya, 1-13. Sa vakarusai ko Jerusalemi, ni sa levu na nodrai valavala ca na bete, kei ira na tamata, 14-21. Sa tukuna ko Koresi me tarai tale na vale ni soro mai Jerusalemi, 22, 23.

1ERA sa qai kauti Yioaasi na luve i Josia ko ira na lewe ni vanua, ka buli koya me tui, mei sosomi i tamana mai Jerusalemi.

2Sa yabaki ruasagavulu ka tolu ko Yioaasi ni sa mai tui, ka sa lewa mai Jerusalemi ka vula tolu.

3A sa vakasivoi koya mai Jerusalemi ko na tui Ijipita, a sa vakaorea na vanua e na dua na drau na taledi siliva ka dua na taledi koula:

4a sa buli Eliyakimi na taci i koya na tui Ijipita, me tui Juta kei Jerusalemi, ka vakatoka na yacana me Yioyakimi. A sa tauri Yioaasi na tuaka i koya ko Niko, ka kauta ki Ijipita.

5Sa yabaki ruasagavulu ka lima ko Yioyakimi ni sa mai tui, a sa lewa mai Jerusalemi ka yabaki tinikadua: a sa caka ca ko koya e na mata i Jiova na nona Kalou.

6A sa cabe mai ko Nipukatinesari na tui Papiloni, me vala kaya, a sa vesuka e na sinucodo, me kauta ki Papiloni.

7Sa kauta talega ki Papiloni ko Nipukatinesari e so nai yaya ni vale i Jiova, ka viria e na nona bure mai Papiloni.

8Ia na vo ni cakacaka i Yioyakimi, kei na nonai valavala vakasisila ka cakava ko koya, kei na ka sa kune vua, raica, sa volai e na nodrai vola na tui Isireli kei Juta: a sa tui ko Yioyakini na luvena, me kenai sosomi.

9Sa yabaki walu ko Yioyakini ni sa mai tui, ka sa lewa mai Jerusalemi ka vula tolu ka tini na bogi: a sa caka ca ko koya e na mata i Jiova.

10Ia ni sa cava na yabaki ko ya, ka talaki ko Nipukatinesari na tui, ka kauti koya ki Papiloni, vata kaya nai yaya sa domoni mai na vale i Jiova, ka buli Sitikiya na tama lailai i koya me tui Juta kei Jerusalemi.

11Sa yabaki ruasagavulu ka dua ko Sitikiya ni sa mai tui, a sa lewa mai Jerusalemi ka yabaki tinikadua.

12A sa caka ca ko koya e na mata i Jiova na nona Kalou; sa tawa vakamalumalumutaki koya e na mata i Yirimia na parofita, ni sa vosa vua mai na gusu i Jiova.

13A sa talaidredre talega vei Nipukatinesari na tui, o koya ka cakavi koya me vavakini ki na Kalou: a sa vakadomoqataki koya ga, ka vakaukauwataka na lomana me kakua kina ni saumaki kivei Jiova na nodra Kalou na Isireli.

14A sa caka cala vakalevu ko ira kecega sa liu vei ira na bete, kei ira na tamata, me vaka nai valavala vakasisila ni veimatanitu kisau; a ra sa vakavelavela-taka na vale i Jiova, a ya ka vakatabuya ko koya mai Jerusalemi.

15A sa talai ira na nonai talatala kivei ira ko Jiova na nodra Kalou na nodra qase, sa sou e na mataka, ka talai ira; e na vuku ni sa yalololoma ko koya vei ira na nona tamata, kei na yasana sa dautiko kina ko koya.

16Ia era a vakalialiai ira nai talatala ni Kalou, ka beca na nona vosa, ka vakacacataki ira na nona parofita, ka sa tubu kina na cudru i Jiova vei ira na nona tamata, ka dredre me ra vakabulai.

17E na vuku ni ka o qo, sa kauta maikina vei ira ko koya na nodra tui na kai Kalitea, o koya ka vakamatea e nai seleiwau na nodra cauravou e na nodra vale tabu, ka sega ni lomana na cauravou se na gonealewa, na tagane qase se koya sa roko lako ni sa matua: sa soli ira kecega ki na ligana.

18Kei nai yaya kecega ni vale ni Kalou, na ka lelevu kei na ka lalai, kei na yau ni vale i Jiova, kei na nona yau na tui, kei na nodra na nona turaga; sa kauta kecega ki Papiloni.

19A ra sa visa na vale ni Kalou, ka basuka sobu na bai i Jerusalemi, ka visa na kena veivale vakaturaga kecega e na buka, ka vakacacataka na kenai yaya vinaka kecega.

20Ia ko ira era a bula mai nai seleiwau, sa kauta yani ko koya ki Papiloni; era sa nona tamata maikea, kei na nodra na luvena, ka yacova na gauna sa lewa kina na matanitu ko Perisia:

21me vakayacora na vosa i Jiova e na gusu i Yirimia, me rekitaka mada na vanua na kena gauna ni vakacecegu: ka ni sa biu me ca tu sa qai vakacegu tiko, ka me cava mada na yabaki e vitusagavulu.

22IA e na kenai matai ni yabaki i Koresi na tui Perisia, me vakayacori kina na vosa i Jiova e na gusu i Yirimia, sa vakayavalata ko Jiova na yalo i Koresi na tui Perisia, sa tukuna yani kina ko koya na nona sau e na veiyasana kecega ni nona matanitu, ka vola talega, ka vaka,

23Sa vosa vakaoqo ko Koresi na tui Perisia, Sa solia oti vei au ko Jiova na Kalou ni lomalagi na veimatanitu kecega e vuravura; a sa vakaroti au meʼu tara me nona e dua na vale mai Jerusalemi, a ya mai Juta. O cei vei kemudou sa maivei ira kecega na nona tamata? Me tiko kaya ko Jiova na nona Kalou, ka me lako cake ko koya.