Ai Vola I Esira 1 - AI VOLA TABU（FIJ1864）

A WASE I. —Sa vaka Koresi me lesu ki Jutia ko ira na Jiu, ka me ra tara tale na vale ni soro.

1IA e nai matai ni yabaki i Koresi na tui Perisia, me vakayacori kina na vosa i Jiova e na gusu i Yirimia, sa vakayavalata na yalo i Koresi na tui Perisia ko Jiova, sa tukuna yani kina ko koya na vosa e na veiyasana kecega e na nona matanitu, a sa vola talega, ka vaka,

2Sa vosa vakaoqo ko Koresi na tui Perisia, Sa solia kivei au ko Jiova na Kalou ni lomalagi na veimatanitu kecega e vuravura; a sa vakaroti au meʼu tara me nona e dua na vale mai Jerusalemi, a ya mai Juta.

3O cei vei kemudou sa maivei ira kecega na nona tamata? me tiko kaya ko na nona Kalou, ka me lako cake ko koya ki Jerusalemi, a ya mai Juta, ka tara na vale i Jiova na nodra Kalou na Isireli, (o koya na Kalou,) o koya sa tiko mai Jerusalemi.

4Ia ko koya sa vo tiko e na dua na yasana sa tiko vulagi kina, me vukei koya ko ira na tamata e na nona yasana e na siliva, kei na koula, kei na yau, kei na manumanu ni kaukau, mei kuri ni ka era via solia e na vuku ni vale ni Kalou mai Jerusalemi.

5Sa qai tu cake ko ira na nodra qase turaga na Juta kei Penijamini, kei ira na bete, kei ira na luve i Levi, kei ira kecega sa vakayavalata na yalodra na Kalou, me lako cake me tara na vale i Jiova mai Jerusalemi.

6Ia ko ira kecega era sa tiko voleka vei ira, era sa vukei ira e na veiyaya siliva, kei na koula, kei na yau, kei na veimanumanu, kei na yau talei, ia o qo nai kuri ni ka kecega era sa via solia na tamata.

7A sa kauta talega ko Koresi na tui na veiyaya ni vale i Jiova, a ya ka kauta mai ko Nipukatinesari mai Jerusalemi, ka vakatikora e na vale ni nona veikalou;

8io o qo ka kauta mai ko Koresi na tui Perisia, ni sa kitaka ko Miciritaci na turaga ni yau, ka wilika vei Sesipasari, na turaga ni Juta.

9A sa vakaoqo na kedrai wiliwili: e tolusagavulu na dari koula, e dua na udolu na dari siliva, e ruasagavulu ka ciwa nai sele,

10e tolusagavulu na bilo koula, a bilo siliva sa lailai sobu na kena yaga e va na drau ka tini, na veiyaya tani e dua na udolu:

11ai yaya kecega e na koula kei na siliva, sa lima na udolu ka va na drau. Sa kauta cake kece ko Sesipasari, vata kei ira era a bobula era sa kauti cake mai Papiloni ki Jerusalemi.