II. A Veika Sa Caka E Na Veigauna 35 - AI VOLA TABU（FIJ1864）

Sa ia na solevu ni lako-sivia ko Josia, 1-19. Sa vala ko koya kei na tui Ijipita, a sa mate kina, 20-27.

1SA cakava talega na solevu ni lako-sivia vei Jiova ko Josia e Jerusalemi: a ra sa vakamatea nai soro ni lako-sivia e na kenai katinikava ni siga e nai matai ni vula.

2A sa lesi ira na bete ki na nodrai tavi, ka vakaukauwataki ira ki na cakacaka ni vale i Jiova,

3a sa kaya vei ira na Levi era sa vakatavulici ira kecega na Isireli, era sa tabu me nei Jiova, Dou vakatikora na kato tabu e na vale sa tara ko Solomoni na luve i Tavita na tui Isireli; ena sega ni bibitaka tiko na tabamudou: o qo mo dou qaravi Jiova na nomudou Kalou, kei ira na nona tamata Isireli,

4ka vakarau e na veimataqali ni nomudou qase, me vaka na nomudoui tavi, me vaka nai vola i Tavita na tui Isireli, ka vaka nai vola i Solomoni na luvena.

5Ia dou tu e na yasana tabu, me vaka na wasewase ni nodra veimataqali na nodra qase na wekamudou ko ira na tamata, kei na wasewase ni nodra veimataqali na Levi.

6Dou vakamatea vakakina nai soro ni lako-sivia, ka savataki kemudou, ka vakarautaki ira na wekamudou, me ra cakava me vaka na vosa i Jiova e na gusu i Mosese.

7A sa solia ko Josia kivei ira na tamata mai na qele ni sipi, e so na luve ni sipi ka so na luve ni koti, me yaga kecega e nai soro ni lako-sivia, me rauti ira kecega era sa tiko maikina, a kenai wiliwili sa tolusagavulu na udolu, ka tolu na udolu na karavau: o qo mai na nona yau na tui.

8A sa solia vakayalovinaka ko ira na nona turaga kivei ira na tamata, kivei ira na bete, kei ira na Levi: sa solia ko Ilikiya, kei Sikariya, kei Yieli, o iratou ka lewa e na vale ni Kalou, vei ira na bete, me yaga e nai soro ni lako-sivia, e rua na udolu ka ono na drau na sipi, ka lima na drau na karavau.

9Sa solia talega ko Koniya, kei Simaya, kei Nicaneli, ko ira na wekana, kei Asapiya, kei Yieli, kei Yosapati, na nodra turaga na Levi, kivei ira na Levi, me yaga e nai soro ni lako-sivia, e lima na udolu na sipi, ka lima na drau na karavau.

10A sa vakarautaki na cakacaka, a sa tu ko ira na bete e na nodra yasana, kei ira na Levi e na nodrai tavi, me vaka na nona vosa na tui.

11A ra sa vakamatea nai soro ni lako-sivia, a sa kureitaka na dra ko ira na bete mai na ligadra, ka vocia ko ira na Levi.

12A ra sa kauta tani nai soro kama, me ra vota me tauvata kei na wasewase ni nodra veimataqali na tamata, me cabora vei Jiova, me vaka sa volai e nai vola i Mosese. A vakakina e na karavau.

13A ra sa tavuna nai soro ni lako-sivia e na buka, me vaka na kenai valavala: ia o qori sa tabu era sa saqata e na veikuro, kei na veikuro levu, kei nai tavuteke, a ra sa vakavota vakusakusa vei ira kecega na tamata.

14A sa oti, era sa cokonaka na kedra, kei na kedratou na bete: ka ni sa vakacabora tiko nai soro kama kei na uro ka bogicaka, ko iratou na bete na luve i Eroni; e na vuku ni ka oqo, sa cokonaka na kedra kina ko ira na Levi, kei na kedratou na bete na luve i Eroni.

15A sa tiko ko ira na dausere, na luve i Asafi, e na nodra tikina, me vaka na vosa i Tavita, kei Asafi, kei Emani, kei Yitucuni, na nona rairai na tui, ka sa tiko nai vakatawa e na veimatamata-ni-koro; e dredre me ra biuta na nodrai tavi; ni sa cokonaka na kedra ko ira na wekadra na Levi.

16Sa vakarautaki na cakacaka kecega i Jiova e na siga ko ya, me ia na lako-sivia, ka me vakacabora nai soro kama e dela ni cabocabo-ni-soro i Jiova, me vaka na vosa i Josia na tui.

17A sa ia na lako-sivia e na gauna ko ya ko ira na luve i Isireli era tiko maikina, kei na solevu ni madrai tawa vakaleveni, ka bogi vitu.

18A sa sega e dua na lako-sivia sa caka e Isireli me tauvata kaya mai na gauna i Samueli na parofita; a sa sega e dua vei ira kecega na tui Isireli e cakava e dua na lako-sivia e tautauvata kei na kena ka cakava ko Josia, kei ira na bete, kei ira na Levi, kei ira kecega na Juta kei ira na Isireli era tiko maikina, kei ira na kai Jerusalemi.

19Sa caka na lako-sivia o qo e nai katinikawalu ni yabaki ni lewa i Josia.

20Sa oti na ka kecega o qo, ni sa vakarautaka oti na vale ni soro ko Josia, sa cabe mai ko Niko na tui Ijipita me kabai Karikimisi e na bati ni Uferetisi: a sa lako yani ko Josia me vala kaya.

21A sa vakatadu mata ko koya kivei koya, a sa kaya, A cava beka meʼu veiriti kina kei iko, na tui Juta? sa sega ni ka meʼu vala kei iko e na siga edaidai, ka ki na mataqali ga au sa veivala tiko kaya: ni sa vosa vei au na Kalou meʼu vakusakusa: mo kakua ni vorata na Kalou, o koya sa tiko kei au, me kua ni vakarusai iko ko koya.

22Ia ka sa bese ko Josia ni vagolea tani na matana vei koya, a sa vakalecalecavitaki koya, me rau veivala kaya, ka tawa vakarorogo ki na vosa i Niko mai na gusu ni Kalou, a sa lako ga mai me vala e na buca ko Mikito.

23A sa vanai Josia na tui ko ira na dauvanavana; a sa kaya na tui vei ira era qaravi koya, Dou kauti au tani, niʼu sa vuetaki vakaca.

24A ra sa kauti koya ko ira na nona tamata mai na vale-vodoki ko ya, ka kauti koya ki nai karua ni vale-vodoki sa tiko vei koya; a ra sa kauti koya ki Jerusalemi, ka sa ciba ko koya, a sa buluti e na dua na nodrai bulubulu na nona qase. A ra sa tagicaki Josia ko ira kecega na Juta kei Jerusalemi.

25A sa lelevaki Josia ko Yirimia: a sa cavuti Josia ko ira kecega na tagane dausere kei ira na alewa dausere e na nodra lele, ka yacova na siga o qo, a ra vakarota me cavu tiko e Isireli: ka, raica, sa volai e nai lele.

26Ia na vo ni cakacaka i Josia, kei na nona yalololoma, me vaka sa volai e na vunau i Jiova,

27kei na nonai valavala, a kedrai matai, kei na kedrai otioti, raica, sa volai e na nodrai vola na tui Isireli kei Juta.