II. A Veika Sa Caka E Na Veigauna 34 - AI VOLA TABU（FIJ1864）

Sa tui Juta ko Josia; a sa gumatua ko koya e na tarova na soro ki na veikalou, ka sa vakavouya na vale ni soro, 1-13. Sa kunea ko Ilikiya na bete nai vola ni vunau, 14-21; sa tukuna ko Ulita ni na ca emuri ko Jerusalemi, 22-28; a sa wiliki nai vola ni veiyalayalati, 29-33.

1SA yabaki walu ko Josia ni sa mai tui, ka sa lewa mai Jerusalemi ka yabaki tolusagavulu ka dua.

2A sa caka dodonu ko koya e na mata i Jiova, ka lako e na sala i Tavita na tamana, ka sega ni gole ki nai matau se nai mawi.

3A sa vakatekivu ko koya me vakasaqara na Kalou i Tavita na tamana, e nai kawalu ni yabaki ni nona lewa, ni sa gone tiko; ia na kenai katinikarua ni yabaki, sa vakatekivu me savataki ira na Juta kei Jerusalemi mai na veiyasana cecere, kei na veikaloualewa ni veikau, kei na veimatakau ceuceu, kei na veimatakau sa vakawaicalataki.

4A ra sa basuraka sobu e matana na nodra veicabocabo-ni-soro na Peali, ka sa taya sobu ko koya na veimatakau ka toka ecake e deladra; a sa vurumemeataka na veikaloualewa ni veikau, kei na veimatakau ceuceu, kei na veimatakau sa vakawaicalataki, ka cakava me kuvu-ni-soso, ka vakamiraka e dela ni nodrai bulubulu era daucabocabo kivei ira,

5A sa vakama na suidra na bete e dela ni nodra veicabocabo-ni-soro, ka vakasavasavataki ira na Juta kei Jerusalemi:

6e na nodra Veikoro talega na Manase, kei Ifireimi, kei Simioni, ka yaco ki Nafitali, vata kei na nodra veibure e na veiyasana.

7Ia ni sa oti na nona basuraka sobu na veicabocabo-ni-soro kei na veikaloualewa ni veikau, ka tukilaka oti na veimatakau ceuceu me vaka na nuku, ka taya sobu oti na matakau kecega e na veiyasana kecega ni nodra vanua na Isireli, sa qai lesu ko koya ki Jerusalemi.

8Ia e na kenai katinikawalu ni yabaki ni nona lewa, ni sa savataka oti na vanua, kei na vale ni soro, sa talai Safani na luve i Esaliya, kei Meeseya na turaga ni koro, kei Yoa na luve i Yoasi na dauvolavola, me ratou botea na vale i Jiova na nona Kalou.

9Ia ni ra sa lako mai vei Ilikiya na bete levu, era sa solia nai lavo ka kau ki na vale ni Kalou, era a kumuna vata ko ira na Levi era sa vakatawana na katuba, mai na ligadra na Manase kei Ifireimi, maivei ira kece talega na kedra vo na Isireli, maivei ira kece talega na Juta kei Penijamini; era sa qai lesu ki Jerusalemi:

10ka ra solia ki na ligadra na tamata cakacaka sa nodrai tavi me vakaraica na vale i Jiova, ia ko ira o qo era solia kivei ira na tamata cakacaka era sa cakacaka e na vale i Jiova, me vakavouya ka botea na vale:

11io, sa soli kivei ira na matai kei ira era sa tara vale, me ra volia na veivatu sa ta, kei na kau ni veisemai, ka me conaka na veivale sa vakacacataka ko ira na tui Juta.

12A sa cakava vakadodonu na cakacaka ko ira na tamata: a sa vakaraici ira ko Yeaci kei Opatiya, oi rau na Levi, maivei ira na luve i Mirari; kei Sikariya, kei Misulami, maivei ira na luvedra na Koaca; me ratou vaku-sata: ka so vei ira na Levi, ko ira kecega sa vuku e na ka ni meke e domo vinaka.

13Era sa vakaraica talega na tamata era sa daucolacola, era sa vakaraici ira kece talega ka cakava na cakacaka kecega sa cakavi: a sa maivei ira na Levi e so na dauvolavola, kei ira na turaga, kei ira nai vakatawa ni matamata-ni-koro.

14Ia ni ra sa kauta mai kitautuba nai lavo sa kau ki na vale i Jiova, sa kunea ko Ilikiya na bete nai vola ni vunau i Jiova ka soli e na gusu i Mosese.

15Asa vosa ko Ilikiya, ka kaya vei Safani na dauvolavola, Au sa kunea nai vola ni vunau e na vale i Jiova. A sa solia nai vola ko Ilikiya kivei Safani.

16A sa kauta nai vola ko Safani kivei koya na tui, ka sa tukuna talega na vosa vua na tui, ka kaya, Na ka kecega sa vakaroti vei ira na nomu tamata, era sa cakava tiko.

17A ra sa kumuna vata nai lavo sa kunei e na vale i Jiova, a ra sa solia oti ki na ligadra era sa vakaraici ira, kei na ligadra na tamata cakacaka.

18Sa qai tukuna ko Safani na dauvolavola vua na tui, ka kaya, Sa solia kivei au ko Ilikiya na bete e dua nai vola. A sa wilika ko Safani e matana na tui.

19Ia ni sa rogoca oti na tui na vosa ni vunau, sa dresulaka na nonai sulu.

20Sa qai vosa na tui kivei Ilikiya, kei Eiikami na luve i Safani, kei Apitoni na luve i Mika, kei Safani na dauvolavola, kei Esia e dua na nona tamata na tui, a sa kaya,

21Dou lako, dou tarogi Jiova e na vukuqu, ka e na vukudra era sa vo tu e Isireli kei Juta, se sa vakaevei na vosa ni vola sa kune: ni sa levu na cudru i Jiova sa sovaraki mai vei keda, e na vuku ni sa tawa vakabauta na vosa i Jiova ko ira na noda qase, me cakava na ka kecega sa volai e nai vola o qo.

22A sa lako ko Ilikiya, kei ira mai na tui, kivei Ulita na parofita alewa na wati i Salumi, na luve i Tikiva, na luve i Asira, ai vakatawa ni sulu; (ka tiko na alewa o qo mai Jerusalemi e na vale ni wali vola:) a ra sa vosa vei koya me vakakina.

23A sa vosa ko koya vei iratou, Sa vosa vakaoqo ko Jiova na nodra Kalou na Isireli, Dou tukuna vua na tamata ka talai kemudou kivei au,

24Sa vosa vakaoqo ko Jiova, Raica, au na vakayacora na ca ki na koro o qo, kivei ira talega na lewe ni koro o qo, io na vosa ni veivakarusai kecega sa volai e nai vola era sa wilika e matana na tui Juta:

25e na vuku ni ra sa biuti au, ka vakama na ka boi vinaka vei ira na kalou tani, me ra vakacudrucudrui au e na cakacaka kecega ni ligadra; e na vuku ni ka o qo, ena sovaraki kina na noqu cudru ki na koro o qo, ka na tawa bokoci.

26Ia e na vukuna na tui Juta, o koya ka talai kemudou me tarogi Jiova, dou vosa vakaoqo vei koya, Sa vosa vakaoqo ko Jiova na nodra Kalou na Isireli e na vosa ko sa rogoca oti:

27E na vuku ni sa malumalumu na lomamu, ia ko a vakamalumalumutaki iko e na mata ni Kalou, ni ko a rogoca na nona vosa ka baleta na koro o qo, kei ira na lewena, ka sa vakamalumalumutaki iko e mataqu, ka dresulaka na nomui sulu, ka tagi e mataqu; au sa qai rogoci iko talega, sa kaya ko Jiova.

28Raica, au na vakasoqoni iko vei ira na nomu qase, ia ko na kauti ki na nomui bulubulu e na vakacegu, ka na tawa raica ko na matamu na ka kecega au na vakayacora ki na yasana o qo, ka vei ira na lewena. A ra sa kauta na vosa vua na tui.

29Sa qai talaki ko na tui, ka vakasoqoni ira vata na qase kecega ni Juta kei Jerusalemi.

30A sa cabe cake ko na tui ki na vale i Jiova, kei ira na nodra tagane kecega na Juta, kei ira na kai Jerusalemi, kei ira na bete, kei ira na Levi, kei ira kecega na tamata, ko ira na lelevu kei ira na lalai: a sa wilika ko koya e na daligadra na vosa kecega ni vola ni veiyalayalati sa kune e na vale i Jiova.

31A sa wavu tu na tui e na nona tikina, ka cakava na veiyalayalati e na mata i Jiova, me muri Jiova ga, ka vakabauta na nona veivunau, kei na nona veivakaro, kei na nona veilesilesi, e na lomana taucoko, kei na yalona taucoko, me cakava na vosa ni veiyalayalati sa volai e nai vola o qo:

32a sa kitaki ira kecega era sa tiko e Jerusalemi kei Penijamini me ra vakabauta. A sa cakacaka ko ira na kai Jerusalemi, me vaka na veiyalayalati ni Kalou, na nodra Kalou na nodra qase.

33A sa kauta yani ko Josia na ka kecega e vakasisila mai na nodra vanua kecega na luve i Isireli, ka kitaki ira kecega era sa tiko e Isireli me ra qarava, io me ra qaravi Jiova na nodra Kalou. Era sa tawa lako tani me kakua ni muri Jiova, na nodra Kalou na nodra qase, e na nodra siga kecega.