II. A Veika Sa Caka E Na Veigauna 33 - AI VOLA TABU（FIJ1864）

Sa tui Juta ko Manase, a sa uasivi e nai valavala ca; sa qai veivutuni ko koya ni sa tiko rarawa mai Papiloni, a sa yaco tale ki Jerusalemi, 1-20. Sa tui Juta ko Amoni, 21-25.

1SA tinikarua na yabaki i Manase ni sa mai tui, ka sa lewa mai Jerusalemi ka yabaki limasagavulu ka lima:

2a sa caka ca e na mata i Jiova, me vaka na nodrai valavala vakasisila na veimatanitu kisau, o ira ka biuta tani ko Jiova e na matadra na luve i Isireli.

3Ni sa tara tale ko koya na veiyasana cecere ka basuka sobu ko Isikiya na tamana, ka sa vakaduria nai cabocabo-ni-soro me nodra na Peali, ka cakava e so na kaloualewa ni veikau, ka sorova na kalokalo kecega ni lomalagi, ka qaravi ira.

4Sa cakava talega e so nai cabocabo-ni-soro e na vale i Jiova, ka vosa oti kina ko Jiova, Ena tiko mai Jerusalemi na yacaqu ka tawa mudu.

5A sa cakava e so nai cabocabo-ni-soro vei ira kecega na kalokalo ni lomalagi e na rara vakabai ruarua ni vale i Jiova.

6A sa kitaki ira na luvena me ra lako e loma ni buka waqa, e na buca ni luve i Inomi: ka sa daunanuma ki na siga e so, ka dauia na vakadrau-drau, kei na ka lasu vakatevoro, ka dauveileti kei ira na yalo mai bulu, kei ira na tamata e daukila ka vakatevoro: sa caka ca vakalevu ko koya e na mata i Jiova, me vakacudrucudruya.

7A sa vakatikora e dua na matakau ceuceu, na matakau ka cakava ko koya, e na vale ni Kalou, o qori ka vosa kina na Kalou kivei Tavita kei Solomoni na luvena, ka vaka, Au na vakatikora na yacaqu e na vale o qo, ia e Jerusalemi, a ya au sa digitaka e na nodra yavusa kecega na Isireli ka tawa mudu.

8Ia kaʼu na sega talega ni kauta tani na yavadra na Isireli mai na vanua au a lesia me nodra na nomudou qase, ia me ra nanuma ga na ka kecega au sa vakarota vei ira, me vaka na vunau taucoko, kei na veilesilesi, kei nai valavala ni soro, sa tukuna ko Mosese.

9A sa vakacalai ira na Juta kei ira na kai Jerusalemi ko Manase, me ra sa uasivi cake vei ira na veimatanitu kisau e nai valavala ca, o ira sa vakarusa ko Jiova e na matadra na luve i Isireli.

10A sa vosa ko Jiova kivei Manase, vei ira talega na nona tamata: a ra sa bese ni rogoca.

11E na vuku ni ka o qo sa kauti ira mai kina ko Jiova na turaga ni valu nei tui Asiria, a ra sa tauri Manase e na loma ni veiwa vakavotona, ka vesuki koya e na sinucodo, ka kauta ki Papiloni.

12Ia ni sa rarawa ko koya, sa vakamasuti Jiova na nona Kalou, ka vakamalumalumutaki koya vakalevu e na mata ni nodra Kalou na nona qase.

13A sa masu kivei koya: a sa yalovinaka mai ko koya vei koya, ka rogoca na nona vakamamasu, ka kauti koya tale ki Jerusalemi ki na nona matanitu. Sa qai kila ko Manase ni sa Kalou ko Jiova.

14Ia ni sa oti na ka o qo, sa viria ko koya e dua na bai e taudaku ni koro i Tavita, e na yasa i Kioni sa donuya na ra, e na buca, ka yala ki nai curucuru ni matamata-ni-koro ni ika, ka vakavolivoliti Ofeli, a sa viria me cecere sara, ka sa vakatikora e so na turaga ni valu e na koro vakabai kecega nei Juta.

15A sa kauta tani na veikalou tani, kei na matakau mai na vale i Jiova, kei nai cabocabo-ni-soro kecega sa tara ko koya eliu e na ulu-ni-vanua ni vale i Jiova, e Jerusalemi talega, ka biuta tani ki taudaku ni koro.

16A sa botea nai cabocabo-ni-soro i Jiova, ka vakacabora kina na veisoro e na veivinakati kei na veisoro ni vakavinavinaka, ka vakarota vei ira na Juta me ra qaravi Jiova na nodra Kalou na Isireli.

17Ia ka sa cabocabo tiko ko ira na tamata e na veitikina cecere, ia vei Jiova ga na nodra Kalou.

18Ia na vo ni cakacaka i Manase, kei na nona masu vua na nona Kalou, kei na nodra vosa na rairai era sa vosa vei koya e na yaca i Jiova na nodra Kalou na Isireli, raica, sa e na kedrai vola na tui Isireli.

19A nona masu talega, kei na nona vakarogoci, kei na nonai valavala ca kecega, kei na nona caka cala, kei na veiyasana sa tara kina ko koya na veitikina cecere, ka duria kina na kaloualewa ni veikau kei na veimatakau ceuceu, ni sa tawa vakamalumalumutaki; raica, sa volai vata kei na nodra vosa na rairai.

20A sa moce vata kei ira na nona qase ko Manase, a sa buluti e na nona vale: a sa tui ko Amoni na luvena, me kenai sosomi.

21SA yabaki ruasagavulu ka rua ko Amoni ni sa mai tui, ka sa lewa mai Jerusalemi ka yabaki rua.

22A sa caka ca ko koya e na mata i Jiova, mo vaka ka cakava ko Manase na tamana: ni sa cabocabo ko Amoni ki na matakau ceuceu kecega ka cakava ko Manase na tamana, ka qaravi ira,

23ka tawa vakamalumalumutaki koya e na mata i Jiova, me vaka ka vakamalumalumutaki koya ko Manase na tamana; a sa kuria tiko na nona caka cala ko Amoni.

24A sa buki kena vere ko ira na nona tamata, ka vakamatei koya e na nona vale.

25Ia ko ira na lewe ni vanua, era sa vakamatei ira kecega era sa bukia na vere kei Amoni na tui; a sa buli Josia na luvena ko ira na lewe ni vanua me tui, me kenai sosomi.