II. A Veika Sa Caka E Na Veigauna 32 - AI VOLA TABU（FIJ1864）

Sa kabai Jerusalemi ko Sanikeripi na tui Asiria, a sa yavita na nonai valu e dua na agilose, 1-23. Sa vakabulai ko Isikiya mai na nona tauvi mate; sa vutuniyau sara; a sa cala ni tukuna vei ira mai Papiloni, 24-33.

1NI sa oti na veika o qo, ka sa vakataudeitaki, sa lako mai ko Sanikeripi na tui Asiria, a sa curu ki Juta, a sa tiko vakaivalu ki na veikoro e vakabai, a sa nanuma me rawa me nona.

2Ia ni sa raica ko Isikiya ni sa lako mai ko Sanikeripi, ka sa nakita me kabai Jerusalemi,

3sa bose ko koya kei ira na nona turaga, kei ira na nona tamata qaqa, me bonota na wai ni veimata-ni-wai vure ka tu e taudaku ni koro: a ra sa vukei koya.

4A sa soqoni vata na tamata lewe vuqa, a ra sa bonota na mata-ni-wai vure kecega, kei na soniwai sa curuma na loma ni vanua, a ra sa kaya, Me lako mai ko ira na tui Asiria ka kunea na wai levu meicavai.

5Sa vakaukauwataki koya talega, ka viria na tiki ni bai kecega sa basuki, ka sa kauta ki cake me yacova na vale ni vakatawa, ka viria e dua tale na bai etaudaku, a sa vakavoui Milo e na koro i Tavita, ka cakava na moto kei nai sasabai na ka levu.

6A sa lesia e so na turaga ni valu me lewai ira na tamata, ka sa vakasoqoni ira vata vua e na sala ni matamata ni koro, a sa vosaveiva-kacegui vei ira, ka kaya,

7Dou kaukauwa ka doudou, kakua ni rere se domobula e na vuku ni tui Asiria, se e na vukudra na lewe vuqa sa tiko kaya: ni sa lewe vuqa ko ira era sa tiko vei keda ka lewe lailai sa tiko vei koya:

8sa tiko vei koya na liga ni tamata ga; ka sa tiko vei keda ko Jiova na noda Kalou me vukei keda, ka kitaka na nodai valu. A sa vakararavi ko ira na tamata ki na vosa i Isikiya na tui Juta.

9Sa oti na ka o qo, sa qai vakatalai ira na nona tamata ko Sanikeripi ki Jerusalemi, (ia ka sa kabai Lakisi tiko ko koya, ka tiko kaya na nonai valu kecega,) kivei Isikiya na tui Juta, vei ira kece talega na Juta era tiko mai Jerusalemi, a sa kaya,

10Sa kaya vakaoqo ko Sanikeripi na tui Asiria, A cava dou sa vakararavi kina, ni dou sa tikoga ni sa kabai tiko ko Jerusalemi?

11Sa sega li ni vecei kemudou ko Isikiya, mo dou soli kemudou mo dou mate e na viakana kei na viagunu, ni sa kaya, Ena vakabulai keda ko Jiova na noda Kalou mai na ligana na tui Asiria?

12Sa tawa kauta tani li ko Isikiya o qo na nona veiyasana cecere kei na nona veicabocabo-ni-soro, ka vakarota kivei Juta kei Jerusalemi, ka vaka, Dou soro ga e na mata ni cabocabo-ni-soro e dua bauga, ka vakama kina na ka boi vinaka?

13Dou kila, se segai, na ka keirau sa cakava kei tamaqu vei ira kecega na lewe ni veivanua? sa kaukauwa li na nodra kalou na veimatanitu ni veivanua ko ya, me Vakabula vakalailai na nodra vanua mai na ligaqu?

14O cei vei ira kecega na kalou ni veimatanitu ka vakawabokotaka sara ko tamaqu, me sa vakabulai ira na nona tamata mai na ligaqu, me rawarawa kina vua na nomudou Kalou me vakabulai kemudou mai na ligaqu?

15Ia o qo, me kakua ni vakaisini kemudou ko Isikiya, se cikevi kemudou vakaoqo, dou kakua talega ni vakadinati koya: ni sa sega e dua na kalou ni vanua e dua, se ni matanitu e dua, sa kaukauwa me vakabulai ira na nona tamata mai na ligaqu, se mai na ligadra na noqu qase: ena qai rawarawa vakacava vua na nomudou Kalou me vakabulai kemudou mai na ligaqu?

16Ka levu tale na vosa ca ka vosataka ko ira na nona tamata vei Jiova na Kalou, vei Isikiya talega na nonai talatala.

17Sa vola talega ko koya nai vola e so, me vakasewasewani Jiova na nodra Kalou na Isireli, ka vosavakacataki koya, a sa kaya, Me vaka sa sega ni vakabula na nodra tamata mai na ligaqu ko ira na kalou ni veimatanitu ni veivanua, ena sega talega ni vakabula na nona tamata na Kalou i Isikiya mai na ligaqu.

18A ra sa qai qoqolou e na vosa vaka-Jutia kivei ira na kai Jerusalemi era sa tiko e dela ni bai, me vakarerei ira, ka vakataqayataki ira; ka me ra rawa kina na koro.

19A ra sa vosavakacacataka na Kalou ni Jerusalemi, me vaka ki na nodra veikalou na tamata ni vuravura, a ya sa cakacaka ni liga ni tamata.

20Ia e na vuku ni ka o qo, sa masu ka tagi kina ki lomalagi ko Isikiya na tui, kei Isaia na parofita, na luve i Amosi.

21A sa tala e dua na agilose ko Jiova, o koya sa vakamatea na tamata qaqa kecega, kei ira sa liu kei ira sa turaga ni valu e na nonai valu na tui Asiria. A sa lesu kina ko koya ki na nona vanua, ka madua na matana. Ia ni sa curu ko koya ki na bure ni nona kalou, sa vakamatei koya e nai seleiwau e na tikina ko ya ko iratou sa lako mai na ketena.

22A sa vakabulai Isikiya kei ira na kai Jerusalemi ko Jiova, mai na liga i Sanikeripi na tui Asiria, mai na ligadra kece talega, a sa tuberi ira e na veiyasana kecega.

23A sa lewe vuqa era sa kauta mai nai solisoli vei Jiova ki Jerusalemi, kei na veika-ni-loloma kivei Isikiya na tui Juta; a sa vakacaucautaki kina ko koya mai na gauna ko ya e na matadra na matanitu kecega.

24E NA gauna ko ya sa tauvi mate ko Isikiya ka kolai mate, ka sa masu vei Jiova: a sa vosa vei koya ko koya, ka sa solia vua e dua nai vakatakilakila.

25Ia ka sa sega ni caka vinaka tale ko Isikiya me vaka na ka vinaka sa caka vei koya; ni sa viavialevu na yalona: a sa koto kina vei koya na cudru, kivei ira na Juta talega, kei Jerusalemi.

26Ia ka sa vakamalumalumutaki koya ko Isikiya e na vuku ni viavialevu ni yalona, ko koya, kei ira na kai Jerusalemi, ka sa tawa yaco kina kivei ira na cudru i Jiova e na gauna i Isikiya.

27A sa ka levu na yau kei na vakarokoroko vei Isikiya: a sa tara ko koya me nona e so na vale ni yau, ni siliva, kei na koula, kei na veivatu dredre, kei na kau boi vinaka, kei na veisasabai, kei nai yaya kecega e daudomoni;

28na lololo talega ki na vua ni sila, kei na waini, kei na waiwai; kei na nodra bai na karavau tani kece, kei na bai ni sipi.

29Sa vakarautaka talega vua na veikoro, ka sa taukena na qele ni sipi kei na qele ni karavau, na ka levu: ni sa solia vua ko na Kalou na yau e levu sara.

30A sa bonota na uciwai i Kioni ecake ko Isikiya o qo, ka sa kauta vakadodonu sobu ki na yasa ni koro i Tavita sa donuya na ra. A sa yaco ko Isikiya e na nona cakacaka kecega.

31Ia e na ka ni nodra mata na turaga ni Papiloni, o ira ka talaki vei koya me taroga e na vuku ni caka mana e na vanua, sa laivi koya ko na Kalou, me vakatovolei koya, me kila na ka kecega ka tiko e lomana.

32Ia na vo ni cakacaka i Isikiya, kei na nona yalololoma, raica, sa volai e nai vola ni raivotu i Isaia na parofita, na luve i Amosi, e na nodrai vola na tui Juta kei Isireli.

33A sa moce vata ko Isikiya kei ira na nona qase, a ra sa buluti koya e na nodrai bulubulu talei na luve i Tavita: a sa vakarokorokotaki koya e na nona mate ko ira kecega na Juta kei ira na kai Jerusalemi. A sa tui ko Manase na luvena, me kenai sosomi.