II. A Veika Sa Caka E Na Veigauna 31 - AI VOLA TABU（FIJ1864）

Sa rotaka vinaka ko Isikiya nai valavala e dodonu e na vale ni soro.

1IA ni sa oti na ka kecega o qo, sa lako yani ko ira kecega na Isireli sa tiko maikea ki na veikoro e Juta, ka basuka na veimatakau, ka taya sobu na veikaloualewa ni veikau, ka talaraka sobu na veitikina cecere, kei na veicabocabo-ni-soro, e na nodra veiyasana kecega na Juta kei Penijamini, mai Ifireimi talega kei Manase, a ra sa ia tiko ka vakaotia kece sara. Sa qai lesu tale ko ira kece na luve i Isireli, na tamata yadua ki na nonai votavota, ki na nona koro.

2A SA rotaka ko Isikiya na nodra veivuke na bete kei ira na Levi, me vaka na nodra dauveivuke, na tamata yadua ki na nona cakacaka, o ira na bete kei ira na Levi ki nai soro kama, kei nai soro e na veivinakati; me ra qarava tiko, ka me vakavinavinaka, me ia talega na meke e na matamata-ni-koro e na veivale gatu i Jiova.

3Sai tavi talega ni tui mai na nona ka mei soro kama, io, nai soro kama e na mataka kei na yakavi, kei nai soro kama ni veisiga ni vakacecegu, kei na veivula vou, kei na veisolevu sa lokuci, me vaka sa volai e na vunau i Jiova.

4Sa vakarota talega vei ira na tamata era sa tiko e Jerusalemi, me ra solia na kedrai votavota na bete kei ira na Levi, me ra gumatua e na vunau i Jiova.

5Ia ni sa rogovaki nai vakaro, era sa kauta vakalevu mai ko ira na luve i Isireli nai sevu ni sila, na waini, kei na waiwai, kei na oni, ka so mai na vua kecega ni were: a ra sa kauta mai vakalevu nai katini ni ka kecega.

6Ia ko irana luve i Isireli kei Juta, era sa tiko e na Veikoro i Juta, era sa kauta talega mai nai katini ni karavau kei na sipi, kei nai katini ni veika e tabu sa vakatabui me nei Jiova na nodra Kalou, ka ra binia vata me vica nai binibini.

7A ra sa vakatekivu e nai katolu ni vula me viria na yavu ni veibinibini, ka tinia e nai kavitu ni vula.

8Ia ni sa lako mai ko Isikiya, kei ira na turaga, ka raica na veibinibini, era sa vosavakalougatataki Jiova, kei ira na nona tamata Isireli.

9Sa qai tarogi ira na bete kei ira na Levi ko Isikiya, e na vuku ni veibinibini.

10A sa vosa vua ko Asariya na bete levu ni vale i Satoki, a sa kaya, Mai na siga sa vakatekivu kina me kau mai nai madrali ki na vale i Jiova, keimami sa kana ka mamau, ka sa vo tu vakalevu: ni sa vakalougatataki ira na nona tamata ko Jiova; ia na ka levu o qo sa vo tu.

11Sa qai vakarota ko Isikiya me cokonaki na lololo e na vale i Jiova; a ra sa cokonaka,

12ka kauta vakayalodina mai kina nai madrali, kei nai katini, kei na ka sa vakatabui: a sa lewa na ka o qo ko Koniya na Levi, a sa kenai karua ko Simi na tacina:

13a sa vakaraica ko Yieli, kei Asasiya, kei Neaca, kei Asaeli, kei Yirimoci, kei Yosapati, kei Ilieli, kei Isimakiya, kei Meaci, kei Pinaya; a sa vakarorogo ko iratou o qo kivei Koniya, kei Simi na tacina, me vaka na nodrau vosa ko Isikiya na tui, kei Asariya, o koya sa lewa e na vale ni Kalou.

14A sai tavi i Kore, na luve i Imina na Levi, nai vakatawa ni katuba vaka ki na tu i cake, me lewa na ka sa cabori walega ki na Kalou, me vota nai madrali i Jiova, kei na veika sa tabu sara.

15Sa taravi koya ko Iteni, kei Miniyamini, kei Josua, kei Simaya, ko Emariya, kei Sikaniya, e na nodra veikoro na bete, e na cakacaka sa lesi, me solia vei ira na wekadra era veivuke kina, vei ira sa lelevu kei ira sa lalai:

16sa kenai kuri na nodra yavusa era tagane, sa tolu na nodra yabaki kei ira sa qase cake, io kivei ira yadua sa curu mai ki na vale i Jiova, na nonai votavota e na veisiga ki na nodra cakacaka e na nodrai tavi ni ra veivuke tiko:

17ki na nodra yavusa na bete, me vaka na mataqali ni nodra qase, kei ira na Levi mai na kenai karuasagavulu ni yabaki kei ira sa qase cake, e na nodrai tavi ni ra veivuke;

18ki na yavusa talega ni nodra lalai kecega, na watidra, kei na luvedra tagane, kei na luvedra alewa, vei ira nai vavakoso taucoko; vei ira ka vakasavasavataki ira e nai vakasavasava dina ki na cakacaka:

19vei ira talega na luve i Eroni ko ira na bete, era tiko e na veiwere e nai bili ni nodra veikoro, e na koro yadua, ko ira na tamata sa cavuti e na yacadra, me solia nai votavota kivei ira na tagane kecega vei ira na bete, vei ira kece talega na Levi era sa wili e na nodra yavusa.

20A sa cakava vakaoqo ko Isikiya e na nodra yasana kecega na Juta, a sa caka vinaka ka dodonu ka dina e na mata i Jiova na nona Kalou.

21Ia e na cakacaka kecega ka vakatekivuna ko koya e na cakacaka e na vale ni Kalou, kei na vunau, kei na veivakaro, me vakasaqara na nona Kalou, sa cakava ko koya e na yalona taucoko, ka sa yaco.