II. A Veika Sa Caka E Na Veigauna 30 - AI VOLA TABU（FIJ1864）

Sa vakarota na solevu ko Isikiya vei ira kecega na Juta kei ira na Isireli; ka sa biuta ko koya na veicabocabo tani.

1A SA talaki ko Isikiya kivei ira kecega na Isireli kei ira na Juta, a sa vola nai vola talega kivei ira na Ifireimi kei ira na Manase, me ra lako mai ki na vale i Jiova ki Jerusalemi, me ia na solevu ni lako-sivia kivei Jiova na nodra Kalou na Isireli.

2Ni sa bose oti na tui, kei ira na nona turaga, kei ira nai vavakoso taucoko mai Jerusalemi, me ra ia na solevu ni lako-sivia e na kenai karua ni vula.

3Ni ra sa sega ni cakava rawa e na gauna ko ya, e na vuku ni ra sa tawa vakasavasavataki ira vakavinaka ko ira na bete, era sa sega talega ni soqoni ira vata mai ki Jerusalemi ko ira na tamata.

4Ia sa dodonu ga o qo vua na tui, vei ira talega nai vavakoso taucoko.

5A ra sa vakarota me tukuni yani e na veiyasana kecega nei Isireli, mai Pieri-sepa ka yaco ki Tani, me ra lako mai me ia na solevu ni lako-sivia mai Jerusalemi kivei Jiova na nodra Kalou na Isireli: ni sa dede era sa sega ni cakava me vaka sa volai.

6A sa lako ko ira sa cicitaka nai vola mai vua na tui, kei ira na nona turaga, ki na veiyasana nei Isireli kei Juta, ka me vaka na nona vosa na tui, ka kaya, Oi kemudou na luve i Isireli, dou saumaki tale mai vei Jiova na Kalou i Eparaama, ko Aisake, kei Isireli, ena qai saumaki mai ko koya kivei kemudou sa vo, sa bula mai na ligadra na tui Asiria.

7Dou kakua ni vakataki ira na nomudou qase, kei ira na wekamudou, era sa valavala ca vei Jiova na nodra Kalou na nodra qase, a sa laivi ira kina me ra rusa, me vaka sa raica na matamudou.

8Ia dou kakua ni domoqa, me vakai ira na nomudou qase, ia dou soli kemudou yani kivei Jiova, ka curuma na nona vale tabu, a ya sa vakatabuya ko koya ka tawa mudu: ka qaravi Jiova na nomudou Kalou, me saumaki tani vei kemudou na nona cudru bibi.

9Io, kevaka dou sa lesu tale mai kivei Jiova, ena lomani kina ko ira na wekamudou kei na luvemudou e na matadra era sa vakabobulataki ira, a ra na yaco tale mai kina ki na vanua o qo: ni sa yalovinaka ka yalololoma ko Jiova na nomudou Kalou, ia ena sega ni vagolea tani vei kemudou na matana, kevaka dou sa lesu vei koya.

10A sa lako ko ira sa cicitaka nai vola ki na veikoro e na veiyasa ni vanua ko Ifireimi kei Manase ka yaco ki Sepuloni: ia era sa dredrevaki ira sara, ka vakalialiai ira.

11Ia ka sa vakamalumalumutaki ira e so vei ira mai Aseri, kei Manase, kei Sepuloni, ka lako mai ki Jerusalemi:

12mai Juta talega sa solia ko na liga ni Kalou me ra lomavata, me ra cakava na nodrai vakaro na tui kei ira na turaga, me vaka na vosa i Jiova.

13A sa soqoni vata mai ki Jerusalemi na tamata lewe vuqa, me cakava na solevu ni madrai tawa vakaleveni e na kenai karua ni vula, erai vavakoso levu sara.

14A ra sa ia ka kauta tani nai cabocabo-ni-soro sa tu e Jerusalemi, kei nai cabocabo kecega ni ka boi vinaka era sa kauta tani, ka biuta ki na wai ko Kitironi.

15A ra sa vakamatea nai soro ni lako-sivia e na kenai katinikava ni siga e nai karua ni vula: a sa madua ko ira na bete kei ira na Levi, ka vakasavasavataki ira, a ra sa kauta mai kiloma nai soro kama ki na vale i Jiova.

16A ra sa tu e na nodra tikina me vaka na nodrai valavala, me vaka na vunau i Mosese na tamata ni Kalou: sa kureitaka na dra mai na ligadra na Levi ko ira na bete.

17Ni sa lewe vuqa vei ira nai vavakoso era sa sega ni vakasavasavataki: a sa nodrai tavi kina na Levi me vakamatea nai soro ni lako-sivia e na vukudra yadua sa tawa savasava, me ra vakasavasavataki vei Jiova.

18Ni sa lewe vuqa maivei ira na tamata, io sa vuqa maivei ira na Ifireimi, kei Manase, kei Isakari, kei Sepuloni, era a tawa vakasavasavataki ira, ia ka ra sa kania vakatani na lako-sivia, ka tawa vaka na ka sa volai. Ia ka sa masulaki ira ko Isikiya, ka kaya, Me kakua ni cudruva ko Jiova sa dauyalovinaka e dua na tamata

19sa cokonaka na yalona me vakasaqara na Kalou, io ko Jiova na nodra Kalou na nona qase, kevaka sa sega ni vaka na va kasavasavataki ni vale ni soro.

20A sa rogoci Isikiya ko Jiova, ka vakabulai ira na tamata.

21A sa cakava na solevu ni madrai tawa vakaleveni ko ira na luve i Isireli era sa tiko mai Jerusalemi, ka bogi vitu e na marau levu: a sa vakavinavinaka vei Jiova ko ira na Levi kei ira na bete e na veisiga, e na ka domo levu vei Jiova.

22A sa vosa-veivakacegui ko Isikiya kivei ira kecega na Levi era sa vakatavulica na vuku vinaka i Jiova: a ra sa kana tiko e na solevu ko ya ka bogi vitu, a ra sa cabora nai soro e na veivinakati, a ra sa vakatusa na nodrai valavala ca vei Jiova na nodra Kalou na nodra qase.

23A sa bose ko ira nai vavakoso taucoko me ra solevu tiko ka vitu tale na bogi: a ra sa cakava e na bogi e vitu e na marau.

24Ni sa solia ko Isikiya na tui Juta vei ira nai vavakoso e dua na udolu na karavau, ka vitu na udolu na sipi; ia ko ira na turaga era solia ki nai vavakoso e dua na udolu na karavau, ka dua na oba na sipi: a sa lewe vuqa na bete ka vakasavasavataki ira.

25A sa marau ko ira na nodrai vavakoso taucoko na Juta, kei ira na bete kei ira na Levi, kei nai vavakoso taucoko era lako mai Isireli, kei ira na vulagi era lako mai na vanua ko Isireli, kei ira era tiko e Juta.

26A sa levu na rereki e Jerusalemi: ni sa sega na ka e Jerusalemi me sa vakakina, mai na gauna i Solomoni na luve i Tavita na tui Isireli.

27Sa qai tu cake ko ira na bete, ko ira na Levi, ka vosavakalougatataki ira na tamata: a sa rogoci na domodra, a sa lako cake na nodra masumasu ki na nonai tikotiko savasava, io ki lomalagi.