II. A Veika Sa Caka E Na Veigauna 29 - AI VOLA TABU（FIJ1864）

Sa tui Juta ko Isikiya; a sa cakava ko koya me vinaka na vale ni soro, ka vuqa nai soro sa vakacabori.

1SA ruasagavulu ka lima na yabaki i Isikiya ni sa mai tui, a sa lewa tiko e Jerusalemi ka yabaki ruasagavulu ka ciwa. Ia na yaca i tinana ko Epiya, na luve i Sikariya.

2A sa caka dodonu ko koya e na mata i Jiova, me vaka na ka kecega ka kitaka ko Tavita na nona qase.

3Sa dolava ko koya na veikatuba ni vale i Jiova, ka botea, e nai matai ni yabaki ni nona lewa, e nai matai ni vula.

4A sa kauti ira mai na bete kei ira na Levi, ka vakasoqoni ira vata ki na sala sa donuya na cake,

5a sa kaya vei ira, Dou rogoci au, oi kemudou na Levi, dou vakasavasavataki kemudou edaidai, ka vakasavasavataka na vale i Jiova na nodra Kalou na nomudou qase, ka kauta tani na ka e dukadukali mai na yasana tabu.

6Ni ra sa caka cala ko ira na noda qase, ka cakava na ka e ca e na mata i Jiova na noda Kalou, a ra sa biuti koya, ka vagolea tani na matadra mai na vale i Jiova, ka vuki vakanadaku.

7Era sa sogota talega na veikatuba ni virada, a ra sa bokoca na veicina, ka ra sa tawa vakama na ka boi vinaka, se vakacabora na veisoro kama, ki na Kalou nei Isireli e na yasana tabu.

8E na vuku ni ka o qo, sa koto na cudru i Jiova vei ira na Juta kei Jerusalemi, a sa vakalaivi ira ki na rarawa, ki na kidacala, ka me vaka-tasiusiutaki, me vaka sa raica na matamudou.

9Io, raica, sa bale oti ko ira na noda qase e nai seleiwau, ka sa vakabobulataki tiko na luveda tagane, kei na luveda alewa, kei na watida, e na vuku ni ka o qo.

10Ia sa tiko e lomaqu meʼu ia na veiyalayalati kei Jiova na nodra Kalou na Isireli, me saumaki tani kina vei keda na nona cudru waqawaqa.

11Oi kemudou na luvequ, dou kakua ni wele: ni sa digitaki kemudou ko, Jiova me tu e matana, me qaravi koya, ka: kitaka na nona cakacaka, ka vakama na ka boi vinaka.

12Sa qai tu cake ko ira na Levi: o Meaci na luve i Amasai, kei Joeli na luve i Asariya, maivei ira na luvedra na Koaca: maivei ira talega na luve i Mirari: o Kisi na luve i Apiti, kei Asariya na luve i Yialelieli; maivei ira talega na luve i Kerisoni: o Yoa na luve i Sima, kei Iteni na luve i Yoa;

13maivei ira talega na luve i Elisafani: o Simiri, kei Yieli; maivei ira talega na luve i Asafi: o Sikariya, kei Mataniya;

14maivei ira talega na luve i Emani: o Yieli, kei Simi; maivei ira talega na luve i Yitucuni: o Simaya, kei Usieli.

15A ra sa vakasoqoni ira na wekadra, a ra sa vakasavasavataki ira, ka lako mai, me vaka nai vakaro ni tui, e na vuku ni cakacaka i Jiova, me ra vakasavasavataka na vale i Jiova.

16A sa curu ko ira na bete ki na loqi ni vale i Jiova, me ra sa va taka, a ra sa kauta mai kitautuba na duka kecega era sa kunea e na vale i Jiova, ki na rara ni vale i Jiova. Sa qai kauta ko ira na Levi, ka biuta ki na soniwai ko Kitironi.

17A ra sa vakatekivuna e na kenai matai ni siga e nai matai ni vula, me ra vakasavasavataka, a ra sa yaco e na kenai kawalu ni siga ki na virada i Jiova: a sa bogi walu na nodra vakasavasavataka tiko na vale i Jiova; a ra sa tinia e na kenai katinikaono ni siga e nai matai ni vula.

18Era sa qai lako vei Isikiya na tui, ka kaya, Keitou sa vakasavasavataka na vale taucoko i Jiova, kei nai cabocabo-ni-soro kama, kei na kenai yaya kecega, kei nai tutu ni madrai dauraici, kei na kenai yaya kecega.

19Ai yaya kece talega sa biuta e na nona caka cala ko Aasi na tui ni sa lewa tiko, keitou sa cokonaka ka vakasavasavataka, ka, raica, sa tu e mata ni cabocabo-ni-soro i Jiova.

20Sa qai sou ko Isikiya na tui, ka vakasoqoni ira vata era sa lewa e na koro, ka lako cake ki na vale i Jiova.

21A ra sa kauta mai e vitu na karavau tagane, ka vitu na sipi tagane, ka vitu na luve ni sipi, ka vitu na koti tagane, mei soro e na vuku ni valavala ca ni matanitu, ka e na vuku ni vale ni soro, ka e na vukudra na Juta. A sa vakarota vei ira na bete na luve i Eroni, me vakacabora e nai cabocabo-ni-soro i Jiova.

22A ra sa vakamatea na veikaravau, a sa kauta na dra ko ira na bete, ka kureitaka e nai cabocabo-ni-soro; ia ni ra sa vakamatea oti na sipi tagane e so, era sa kureitaka na dra e dela ni cabocabo-ni-soro; era sa vakamatea talega na luve ni sipi e so, a ra sa kureitaka na dra e dela ni cabocabo-ni-soro.

23Ia era sa kauta mai na koti tagane e so e matadra na tui kei nai vavakoso, mei soro ni valavala ca; a ra sa tabaka e na ligadra.

24A sa vakamatea ko ira na bete, a ra sa ia na veivinakati e na nodra dra e na dela ni cabocabo-ni-soro, me sorovaki ira kecega na Isireli: ni sa vakarota ko na tui me caka nai soro kama kei nai soro ni valavala ca e na vukudra kecega na Isireli.

25A sa vakatikori ira na Levi e na vale i Jiova, era sa taura na veiqiriqiri tani kei na veiapi, me vaka nai vakaro i Tavita, kei Kata na nona rairai na tui, kei Nacani na parofita: ni sa vakakina na vosa i Jiova mai na gusudra na parofita.

26A sa tu ko ira na Levi, ka taura na ka domo vinaka i Tavita, kei ira na bete era sa taura na veidavui.

27A sa vakarota ko Isikiya me ra cabora nai soro kama e na dela ni cabocabo-ni-soro. Ia ni sa vakatekivu nai soro kama, sa vakatekivu na sere vei Jiova e na veidavui, kei na veika domo vinaka sa lesia ko Tavita na tui Isireli.

28A sa soro ko ira nai vavakoso taucoko, ka sere ko ira na dausere, ka uvu davui ko ira na kena dau: sa ia tiko na ka kecega ka oti mada nai soro kama.

29Ia ni ra sa vakaotia nai cabocabo, sa cuva sobu ka soro na tui kei ira kecega era sa tiko kaya.

30A sa vakarota ko Isikiya na tui kei ira na nona turaga kivei ira na Levi, me ra seretaka na vakavinavinaka vei Jiova e na vosa i Tavita, kei Asafi na rairai. A ra sa seretaka na vakavinavinaka e na marau, a sa cuva na uludra ka soro.

31Sa qai vosa ko Isikiya, ka kaya, Dou sa qai vakatabui kemudou me nona ko Jiova, dou toro voleka mai ka kauta mai e so nai soro, ka so nai madrali ni vakavinavinaka, ki na vale i Jiova. A sa kauta mai e so nai soro nai vavakoso, ka so nai madrali ni vakavinavinaka; kei nai soro kama ko ira sa loma soli.

32Ia nai wiliwili ni soro kama ka kauta mai ko ira nai vavakoso, sa vitusagavulu na karavau, e dua na drau na sipi tagane, e rua na drau na luve ni sipi: ai soro kama kecega o qo kivei Jiova.

33Ia na ka sa vakatabui, sa ono na drau na karavau, ka tolu na udolu na sipi.

34Ia era sa lewe lailai ga ko ira na bete, ka ra sa sega ni vocia rawa nai soro kama kecega: a sa vukei ira kina na wekadra na Levi, ka yacova nai vakataotioti ni cakacaka, kei na gauna era a vakasavasavataki ira rawa kina ko ira na bete: ni sa uasivi cake ko ira na Levi vei ira na bete e na loma dodonu me vakasavasavataki ira.

35A ka levu talega nai soro kama, kei na kedra uro na veisoro e na veivinakati, kei nai madrali gunuvi me vata kei na veisoro kama. A sa vakadodonutaki kina na cakacaka ni vale i Jiova.

36A sa rereki ko Isikiya, kei ira kecega na tamata, e na vuku ni sa vakarautaki ira na tamata ko na Kalou: ni sa caka vakasauri na ka o qo.