II. A Veika Sa Caka E Na Veigauna 28 - AI VOLA TABU（FIJ1864）

Sa tui ko Aasi, a sa levu na nonai valavala ca; a sa levu ka gumatua ko ira na nona meca.

1SA yabaki ruasagavulu ko Aasi ni sa mai tui, a sa lewa mai Jerusalemi ka yabaki tinikaono: ia ka sa sega ni caka dodonu e na mata i Jiova, me vakai Tavita na tamana:

2ni sa lako ko koya e na nodra sala na tui Isireli, ka cakava na veimatakau e vakawaicalataki kivei ira na Peali.

3Sa vakama talega na ka boi vinaka e na buca ni luve i Inomi, ka vakamai ira na luvena e na buka, me vaka na nodrai valavala velavela na veimatanitu kisau, o ira ka vakaseva ko Jiova e na matadra na luve i Isireli.

4Sa cabocabo talega, ka vakama na ka boi vinaka, e na veitikina cecere, kei na veiulu-ni-vanua, kei na ruku ni kau kecega e karakarawa.

5E na vuku ni ka o qo, sa soli koya yani ko Jiova ki na ligana na tui Siria; a ra sa yaviti koya, ka vakabobulataki ira na lewe vuqa, a sa kauti ira ki Tamasiko. A sa soli tale ko koya ki na ligana na tui Isireli, o koya sa mokuti koya, ka lewe vuqa sa vakamatea.

6A sa yavita e Juta ko Peka na luve i Rimaliya e oba vakatinikarua e na siga e dua, era sa tamata qaqa kecega; e na vuku ni ra a biuti Jiova na nodra Kalou na nodra qase.

7O Sikiri talega, na tamata qaqa mai Ifireimi, sa vakamatei Meeseya na luvena na tui, kei Asirikami na turaga ni vale, kei Elikana, o koya sa tarava na tui.

8A sa vakabobulataka maivei ira na wekadra ko ira na luve i Isireli, e oba vakavasagavulu, na alewa, na goneatagane, kei na gonealewa, ka levu talega na yau era sa tokitaka maivei ira, ka kauta nai toki ki Samaria.

9A sa tiko maikea e dua na parofita i Jiova, na yacana ko Oteti: a sa curu yani ko koya e na matadra na mataivalu ka laʼki Samaria, a sa kaya vei ira, Raica, e na vuku ni sa cudru ko Jiova na nodra Kalou na nomudou qase vei ira na Juta, sa soli ira kina ki na ligamudou, ia dou sa mokuti ira oti e na cudru sa yala ki lomalagi.

10Ia o qo, dou sa nakita me vakamalumalumutaki ira na luve i Juta kei Jerusalemi, me ra nomudou tagane bobula, kei na nomudou alewa bobula: ia ka sa sega li vei kemudou, io vei kemudou, nai valavala ca vei Jiova na nomudou Kalou?

11Ia o qo, mo dou rogoci au, ka sereki ira tale na bobula, dou a vakabobulataka maivei ira na wekamudou: ni sa koto vei kemudou na cudru waqawaqa i Jiova.

12Sa qai tu cake e so vei ira sa liu vei ira na luve i Ifireimi, ko Asariya na luve i Yoanani, ko Perekiya na luve i Misilemoci, kei Yesikiya na luve i Salumi, kei Amasi na luve i Atilai, era tu cake vei ira ka lako tale mai nai valu,

13a sa kaya vei ira, Dou na sega ni kauti ira na bobula mai kike: ni da sa cala oti vei Jiova, ia dou sa nakita me kuria na nodai valavala ca kei na noda caka cala: ni sa ka levu na noda caka cala, ka sa waqawaqa na cudru vei ira na Isireli.

14A sa laivi ira na bobula kei nai toki ni valu ko ira na tamatai valu e matadra na turaga kei nai vavakoso taucoko.

15A sa tu cake ko ira na tamata sa cavuti oti na yacadra, ka kauti ira na bobula, ka vakasuluma e nai toki ko ira kecega era sa luvawale vei ira, ka vakaisulutaki ira, ka vakaivava-taki ira, ka vakani ira, ka vagunuvi ira, ka lumuti ira, ka vakavodoki ira na malumalumu e na asa, ka kauti ira ki Jeriko, na koro ni veiviuviu, kivei ira na wekadra: era sa qai lesu ki Samaria.

16E na gauna ko ya sa talaki ko Aasi na tui kivei iratou na tui Asiria, me ratou vukei koya.

17Ni ra a lako tale mai ko ira na kai Itomi ka yaviti ira na Juta, ka vakabobulataka e so.

18O ira talega na kai Filisitia, era sa kabata na veikoro e na vanua bucabuca, kei na yasayasa ki na ceva mai Juta, a ra a rawai Peci-semesi, kei Eyaloni, kei Kiteroci, kei Soko kei na kena veikoro lalai, kei Timina kei na kena veikoro lalai, kei Kimiso kei na kena veikoro lalai: a ra sa tiko maikea.

19Ni sa vakamalumalumutaki ira na Juta ko Jiova, e na vuku i Aasi na tui Isireli; ni sa vakaluve-niyalitaki ira na Juta ko koya, ka caka cala vakalevu vei Jiova.

20A sa lako mai vei koya ko Tilikaci-pilineseri na tui Asiria, ka vakararawataki koya, ka sega ni vakaukauwataki koya.

21Ni sa kauta ko Aasi na ka e so mai na vale i Jiova, kei na vale ni tui, maivei ira talega na turaga, ka solia vei tui Asiria: ia ka sega ni vukei koya.

22Ia e na gauna ni nona rarawa, sa caka cala vakalevu cake vei Jiova: o qori na tui ko Aasi.

23Ni sa cabocabo vei ira na veikalou ni Tamasiko, o ira ka yaviti koya: a sa kaya ko koya, E na vuku ni sa vukei ira na tui Siria, ko ira na nodra veikalou, au na soro kina vei ira, me ra vukei au mai. Ia ka sa rusa kina ko koya, kei ira kecega na Isireli.

24A sa kumuna vata ko Aasi na veibilo ni vale ni Kalou, a sa taya vakamatalalai na veibilo ni vale ni Kalou, ka sa sogota na veikatuba ni vale i Jiova, ka cakava na nona veicabocabo-ni-soro e na tutuna kecega e Jerusalemi,

25Ia e na koro yadua e Juta sa cakava na veitikina cecere, me vakama kina na ka boi vinaka ki na veikalou tani, ka sa vakacudrui Jiova na nodra Kalou na nona qase.

26Ia na vo ni nona cakacaka, kei na nonai valavala kecega, a kedrai matai, kei na kedrai otioti, raica, sa volai e na kedrai vola na tui Juta kei Isireli.

27A sa moce vata kei ira na nona qase ko Aasi, a sa buluti e na koro, io e Jerusalemi: a ra sa sega ni kauti koya ki na nodrai bulubulu na tui Isireli: a sa tui ko Isikiya na luvena, me kenai sosomi.