II. A Veika Sa Caka E Na Veigauna 27 - AI VOLA TABU（FIJ1864）

Sa tui Juta ko Yocami, a sa valavala vinaka ko koya.

1SA ruasagavulu ka lima na yabaki i Yocami ni sa mai tui, a sa lewa mai Jerusalemi ka yabaki tinikaono. A sa yaca i tinana talega ko Yirusa, na luve i Satoki.

2A sa caka dodonu ko koya e na mata i Jiova, me vaka na ka kecega ka kitaka na tamana ko Usiya: ia ka sa sega ni curu ki na vale i Jiova. A sa caka ca ga ko ira na tamata.

3A sa cakava ko koya na matamata-ni-koro cecere ni vale i Jiova, a sa tara vakalevu e na dela ni bai mai Ofeli.

4Sa tara talega na veikoro e na veiulu-ni-vanua ni Juta, a sa tara e na veikau na veivale kaukauwa kei na veivale i valu cecere.

5Sa vala talega kei koya na nodra tui na Amoni, ka sa gumatua vei ira. A sa solia vei koya ko ira na luve i Amoni e na yabaki ko ya e dua na drau na taledi siliva, ka tini na udolu nai vakarau witi, ka tini na udolu na parile. O qori na kena levu ni ka era a solia vua ko ira na luve i Amoni, e na kenai karua ni yabaki, kei na kenai katolu.

6A sa tubu me kaukauwa ko Yocami, e na vuku ni sa vakataudeitaka na nonai valavala e na mata i Jiova na nona Kalou.

7Ia na vo ni cakacaka i Yocami, kei na nonai valu kecega, kei na nonai valavala, raica, sa volai oti e na nodrai vola na tui Isireli kei Juta.

8Sa ruasagavulu ka lima na nona yabaki ni sa mai tui, a sa lewa tiko mai Jerusalemi ka yabaki tinikaono.

9A sa moce vata kei ira na nona qase ko Yocami, a sa buluti e na koro i Tavita: a sa tui ko Aasi na luvena, me kenai sosomi.