II. A Veika Sa Caka E Na Veigauna 26 - AI VOLA TABU（FIJ1864）

Sa tui Juta ko Usiya, a sa vukei koya ko Jiova, 1-15. Sa tawa dokai irana bete ko Usiya, a sa vukavuka mai ko koya, 16-23.

1A SA kauti Usiya ko ira kecega na tamata Juta, ni sa tinikaono na nona yabaki, a ra sa buli koya me tui, mei sosomi i Amasiya na tamana.

2Sa tarai Eloci ko koya, ka vakalesuya tale me nodra na Juta, sa qai moce ko na tui vata kei ira na nona qase.

3Sa tinikaono na yabaki i Usiya ni sa mai tui, a sa lewa tiko mai Jerusalemi ka yabaki limasagavulu ka rua. A yaca i tinana talega ko Yikoliya mai Jerusalemi.

4A sa caka dodonu ko koya e na mata i Jiova, me vaka na ka kecega ka kitaka ko Amasiya na tamana:

5a sa vakasaqara na Kalou e na gauna i Sikariya, o koya sa vuku e na raivotu ni Kalou: ia ni sa vakasaqarai Jiova tiko ko koya, sa cakava ko na Kalou me tamata yaco.

6A sa lako yani ko koya ka vala kei ira na kai Filisitia, ka sa basuka sobu na bai mai Kaca, kei na bai mai Yapine, kei na bai mai Esitoti, a sa tara na koro e so e na vanua mai Esitoti, kei na kedra maliwa na kai Filisitia.

7A sa vukei koya ko na Kalou ni sa vala kei ira na kai Filisitia, kei ira na kai Arapia era tiko mai Kuri-peali, kei ira na luve i Maoni.

8A sa solia ko ira na Amoni na veika-ni-loloma vei Usiya, ka sa kuruvaki na yacana ka yaco ki nai curucuru kei Ijipita: ni sa vakaukauwataki koya vakalevu sara.

9Sa tara talega ko Usiya na vale i valu cecere e na matamata-ni-koro e tutuna, kei na matamata-ni-koro ni buca, mai nai lesu talega, ka sa vakaukauwataka.

10Sa tara talega e so na vale i valu cecere e na veikau, ka vuqa nai kelikeli wai sa kelia, ni sa ka levu na nona karavau, e na vanua bucabuca, kei na cecelevu: e so na tamata dauteitei, kei nai vakatau ni vaini e na veiulu-ni-vanua, mai Karimeli talega: ni sa dauvinakata na caka were ko koya.

11Sa dua talega na mataivalu i Usiya era daulako vakamata ki nai valu, me vaka na nodrai wiliwili sa volai e na liga i Yieli na dauvolavola, kei Meeseya, o koya sa lewa, a sa nodra turaga ko Eneniya, maivei ira na nona turaga ni valu na tui.

12A kedrai wiliwili kecega na tamata qaqa era sa liu vei ira na nodra qase, sa rua na udolu ka ono na drau.

13A ra sa vakarota e dua nai valu, sa oba vakatolusagavulu ka vitu na udolu ka lima na drau, era dauvala vakagumatua, me vukea na tui me vala kei ira na meca.

14A sa cokonaka ko Usiya na veisasabai me rauti ira kecega nai valu, kei na veimoto, kei na veisala-ni-valu, kei na veisulu ni seredra, kei na veidakai dina, kei na veirabo ni vatu.

15A sa cakava mai Jerusalemi na ka vakamatai, era sa vakavuna na tamata vuku, me tiko e dela ni vale i valu cecere, kei na dela ni bai kaukauwa, me vanataki kina na gasau kei na veivatu lelevu. A sa kuruvaki vakayawa na yacana: ni sa vukei vakalevu sara ko koya, ka sa kaukauwa kina.

16Ia ni sa kaukauwa mai, sa laveti cake na yalona me ca kina: ni sa talaidredre vei Jiova na nona Kalou, ka lako ki loma ni vale ni soro i Jiova me vakama na ka boi vinaka e na dela ni cabocabo ni ka boi vinaka.

17A sa muri koya yani kiloma ko Asariya na bete, ka vata kaya e walusagavulu na bete i Jiova, era tamata qaqa:

18a ra sa vorati Usiya na tui, ka kaya vua, Sa sega ni nomu, i Usiya, mo vakama na ka boi vinaka kivei Jiova, sa nodratou ga na bete na luve i Eroni, o iratou sa buli me vakama na ka boi vinaka; mo lako tani ki tautuba ni vale ni soro, ni ko sa vakacala ka; ia ena tawa dokai iko kina ko Jiova na Kalou.

19Sa qai cudru mai ko Usiya, a sa taura tu e dua na bilo na ligana me caudreva kina na ka boi vinaka; ia ni sa cudru tiko vei ira na bete, sa tubura na yadrena na vukavuka e na matadra na bete, e na vale i Jiova, ka voleka ki nai cabocabo ni ka boi vinaka.

20A sa vakaraici koya ko Asariya na bete levu, kei ira kecega na bete, ka, raica, sa vukavuka na yadrena, a ra sa biligi koya maikeri kitautuba; io, sa vakariri talega ko koya me lako kitautuba, e na vuku ni sa yaviti koya ko Jiova.

21A sa vukavuka ko Usiya ha tui ka yaco ki na siga sa ciba kina, ka sa tiko ena vale vakai koya, ni sa vukavuka; ni sa tabu me curu ki na vale i Jiova; a sa vakarota na vale ni tui ko Yocami na luvena, ka lewai ira na lewe ni vanua.

22Ia na vo ni cakacaka i Usiya, a kedrai matai, kei na kedrai otioti, sa vola ko Isaia na parofita, na luve i Amosi.

23A sa moce vata kei ira na nona qase ko Usiya, a sa buluti vata kei ira na nona qase e na vanua ni nodrai bulubulu na tui; ni ra sa kava, Sa vukavuka ko koya: a sa tui ko Yocami na luvena, me kenai sosomi.