II. A Veika Sa Caka E Na Veigauna 24 - AI VOLA TABU（FIJ1864）

Sa vakavouya na vale ni soro ka lewa vinaka ko Yoasi, ni sa bula tiko ko Yioyata, 1-16. Sa qai valavala vakatani ko koya, a sa moku, 17-27.

1SA mai tui ko Yoasi ni sa vitu na nona yabaki, a sa lewa tiko ko koya mai Jerusalemi ka yabaki vasagavulu. A yaca i tinana talega ko Sipia mai Pieri-sepa.

2A sa kitaka ko Yoasi na ka e dodonu e na mata i Jiova e na veisiga kecega sa bula kina ko Yioyata na bete.

3A sa kauta vua e rua na watina ko Yioyata: a sa vakasikava e so na luvena tagane kei na luvena alewa.

4A sa oti na ka o qo, sa nanuma ko Yoasi me vakavouya na vale i Jiova,

5A sa vakasoqoni ira vata na bete kei ira na Levi, ka sa kaya vei ira, Dou lako yani ki na nodra veikoro na Juta, ka kumuna vata nai lavo maivei ira kecega na Isireli, me vakavouya na vale ni nomudou Kalou e na veiyabaki, ia dou kusata na ka o qo. Ia ka sa sega ni kusata ko ira na Levi.

6A sa kacivi Yioyata, o koya sa liu, ko na tui, a sa kaya vua, E vakaevei ni ko sa tawa tarogi ira na Levi e na nodra kauta mai Juta kei Jerusalemi na yau sa lesi me kumuni vata, me vaka nai vakaro i Mosese nai talatala i Jiova, kei nai vavakoso Isireli, e na vuku ni vale gatu ni dautukutuku?

7Ni sa vakacacataka oti na vale ni Kalou ko iratou na luve i Acaliya, na alewa ca ko ya: ia na ka kecega sa cabori ki na vale i Jiova era a solia kivei ira na Peali.

8A ra sa cakava e dua na rubu, ni sa vakaroti ira ko na tui, a ra sa vakatikora etautuba mai na matamata-ni-koro ni vale i Jiova.

9A ra sa tukuna votu e na yasa-yasa vaka-Jutia kei Jerusalemi, me kauta mai kivei Jiova na yau sa lesia ko Mosese nai talatala ni Kalou kivei ira na Isireli e na lekutu.

10A sa marau ko ira kecega na turaga, kei ira kecega na tamata, ka kauta mai, ka biuta ki na rubu, ka yacova na kenai otioti.

11Ia ni ra sa kauta na rubu ko ira na Levi vei koya sa lesia ko na tui, ia ni ra sa raica ni sa ka levu nai lavo, erau sa lako mai na nona tamata dauvolavola na tui, kei nai talatala ni bete levu, ka rau sa vakatala na kato, ka taura, ka kauta tale ki na kena tikina. A ra sa cakava vakakina e na veisiga, ka kumuna vata nai lavo e levu sara.

12A sa solia ko na turaga kei Yioyata kivei ira era sa lewa na cakacaka e na vale i Jiova, a ra sa volia kina na matai ni vatu kei na matai ni kau me vakavouya na vale i Jiova, kei ira talega era sa daucaka aironi kei na parasa, me vakavouya na vale i Jiova.

13A sa cakacaka ko ira na matai, a ra sa vakaotia vinaka na cakacaka, a ra sa cakava na vale ni Kalou me vaka eliu, ka vakaukauwataka.

14Ia ni ra sa vakaotia, era sa kauta mai vei koya na tui kei Yioyata nai lavo ka vo, a sa cakavi kina nai yaya ni vale i Jiova, nai yaya ni cakacaka, me vakacabori kina, kei na veitaki, kei na veibilo koula kei na siliva. A ra sa vakacabora tiko e so nai soro kama e na vale i Jiova e na siga kecega i Yioyata.

15A sa qase mai ko Yioyata, ka vuqa na nona yabaki ni sa ciba; sa dua na drau ka tolusagavulu na nona yabaki ni sa ciba.

16A sa buluti ko koya e na koro i Tavita, vata kei ira na tui, e na vuku ni sa caka vinaka e Isireli, vua na Kalou, kei na nona vale.

17Ia ni sa mate oti ko Yioyata, sa ra lako mai na turaga ni Juta, me vakarokoroko vua na tui. A sa vakarorogo vei ira ko na tui.

18A ra sa laiva na vale i Jiova na nodra Kalou na nodra qase, ka qaravi ira na kaloualewa ni veikau kei na veimatakau: a sa yaco na cudru kivei ira na Juta kei ira mai Jerusalemi e na vuku ni nodra caka cala o qo.

19A sa tala e so na parofita vei ira ko koya, me vakalesui ira tale kivei Jiova; a ra sa beitaka vei ira: a ra sa bese ga ni rogoca.

20A sa yaco na Yalo ni Kalou kivei Sikariya na luve i Yioyata na bete, a sa tu ecake ko koya ka sa tu era ko ira na tamata, a sa kaya vei ira, Sa vosa vakaoqo na Kalou, A cava dou sa vakacacana kina na veivunau i Jiova, ka dredre kina mo dou caka yaco? o na vuku ni dou sa biuti Jiova, sa biuti kemudou kina ko koya.

21A ra sa buki kena vere, a ra sa viriki koya ni sa vakarota ko na tui, e na vatu e na rara ni vale i Jiova.

22Sa vakaoqo, sa tawa nanuma ko Yoasi na tui nai valavala vinaka ka cakava vei koya ko Yioyata na tamana, a sa vakamatea ga na luvena. Ia ni sa ciba, sa kaya, Ena raica o qo ko Jiova, ka taroga.

23Ia ni sa cava na yabaki sa lako mai vua nai valu mai Siria: a ra sa lako mai ki Jutia kei Jerusalemi, a ra sa mokuti ira kecega na nodra turaga na tamata maivei ira na tamata, a sa kauta ki na tui Tamasiko na nodra yau kecega era sa tokitaka.

24Sai vavakoso lailai na nodrai valu na kai Siria era lako mai, a sa solia ko Jiova nai valu levu sara ki na ligadra, e na vuku ni ra sa biuti Jiova na nodra Kalou, na nodra qase. A ra sa vakayacora na cudru kivei Yoasi.

25Ia ni ra sa lako tani vei koya, (ni sa tauvi mate vakalevu ni ra sa lako tani vua,) sa buki kena vere ko ira na tamata era qaravi koya, e na vuku ni kedratou dra na luve i Yioyata na bete, a ra sa vakamatei koya e na nonai mocemoce, ka mate ko koya; a sa buluti ko koya e na koro i Tavita, ka sa sega ni buluti ko koya e na nodrai bulubulu na tui.

26Ia sai rau o qo erau a buki kena vere: o Sapati na luve i Simiaci, e dua na alewa ni Amoni, kei Yiosapati na luve i Simirici, e dua na alewa ni Moapi.

27Ia e na vukudratou na luvena, kei na kena bibi ni colacola sa bikai koya, kei na vakavouya na vale ni Kalou, raica, sa volai e nai tukutuku ni nodrai vola na tui. A sa mai tui ko Amasiya na luvena, me kenai sosomi.