II. A Veika Sa Caka E Na Veigauna 23 - AI VOLA TABU（FIJ1864）

Sa buli ko Yoasi me tui Juta; sa moku ko Acaliya; a sa rotaka vinaka na soro ko Yioyata na bete.

1A SA vakaukauwataki koya ko Yioyata e na kenai kavitu ni yabaki, a sa kauti iratou na turaga ni veiyadrau, ko Asariya na luve i Yiroami, kei Isimaeli na luve i Yioanani, kei Asariya na luve i Opeti, kei Meeseya na luve i Ataya, kei Ilisafati na luve i Sikiri, me ia kaya na veiyalayalati.

2A ratou sa veilakoyaki e Jutia, ka vakasoqoni ira vata na Levi mai na veikoro kecega e Jutia, kei ira na nodra qase turaga na Isireli, a ra sa lako mai ki Jerusalemi.

3A sa kitaka na veiyalayalati kei na tui e na vale ni Kalou ko ira nai vavakoso taucoko. A sa kaya vei ira ko koya, Raica, ena lewa tiko na luve ni tui, me vaka sa vosataki ira na luve i Tavita ko Jiova.

4O qo na ka mo dou kitaka: Enai vakatawa ni katuba nai katolu ni wase vei kemudou na bete kei na Levi, dou sa daucuru e na siga ni vakacecegu:

5ka me tiko e na vale ni tui nai katolu ni wase; ka mo tiko e na matamata-ni-koro ni yavu nai katolu ni wase: ka na tiko ko ira kecega na tamata o na veilomanibai ni vale i Jiova.

6Ia, me kakua ni curu e dua ki loma ni vale i Jiova, o ira ga na bete, kei ira na Levi era cakacaka tiko: era na curu ko ira ni ra sa savasava: ia ko I ira kece na tamata era na ia na vakatawa sa rotaka ko Jiova.

7Ia era na vakavolivoliti koya na tui ko ira na Levi, ka tara na tamata yadua na nonai yaragi; ia ko ira na tani kece sa curu ki loma ni vale, ena vakamatei: ia koi kemudou, dou tiko vata kei na tui, ni sa curu kiloma ko koya ka curu kitautuba.

8A sa kitaka ko ira na Levi kei ira kecega na Juta me vaka na ka kecega sa rotaka ko Yioyata na bete, a sa dui kauti ira na nona tamata na tamata yadua, ko ira sa nodrai tavi me curu kiloma e na siga ni vakacecegu, kei ira sa nodrai tavi me curu yani e na siga ni vakacecegu: ni sa sega ni laiva ko Yioyata na bete me ra lako ko ira era sa dauveitaravi.

9Sa solia talega ko Yioyata na bete kivei ira na turaga ni veiyadrau na veimoto, kei na veisasabai lalai, kei na veisasabai, ka nei Tavita na tui, a ya sa tu e na vale ni Kalou.

10A sa lesi ira kecega na tamata, me taura tu na tamata yadua na nonai yaragi, mai na yasa i matau ni vale ni soro, ki na kena yasa i mawi ni vale ni soro, e na yasa ni cabocabo-ni-soro kei na vale ni soro, ka vakavolivolita na tui.

11Era sa qai kauta mai na luvena na tui, ka vakaisalataka e nai sala vakatui, ka solia vua nai vola ni vunau, ka buli koya me tui. A sa lumuti koya ko Yioyata kei iratou na luvena, a ra sa kaya, Me bula na tui.

12Ia ni sa rogoca ko Acaliya na rorogo ni tamata ni ra sa cici, ka vakarokorokotaka na tui, sa lako mai ko koya kivei ira na tamata ki na vale i Jiova:

13a sa rai yani ko koya, ka, raica, sa wavu tu na tui e na nona duru e nai curucuru, kei ira na turaga kei na veidavui vata kei na tui: a sa reki ko ira kecega na lewe ni vanua, ka uvuca na veidavui, kei ira na dausere era tara na ka domo vinaka, kei ira era sa dauvakatavulica na meke ni vakavinavinaka. Sa qai dresulaka na nonai sulu ko Acaliya, a sa kaya, Na vere, na vere.

14Sa qai kauti ira mai na turaga ni veiyadrau era sa lesi me lewa nai valu ko Yioyata na bete, a sa kaya vei ira, Kauti koya tani ki taudaku ni veiyatu: ia kevaka sa muri koya e dua, me vakamatei e nai seleiwau. Ni sa kaya na bete, Me kakua ni vakamatei ko koya e na vale i Jiova.

15A ra sa tauri koya; ia ni sa yaco ki na matamata-ni-koro na yacana na matamata-ni-koro ni ose, a ya sa voleka ki na vale ni tui, era a mokuti koya kina.

16A sa cakava na veiyalayalati ko Yioyata kei ira kecega na tamata, kei koya na tui, me ra nona tamata ko Jiova.

17Sa qai lako ko ira kecega na tamata ki na vale i Peali, ka basuka sobu, ka basuka na nona veicabocabo-ni-soro kei na nona veimatakau, ka ra sa vakamatei Matani na bete i Peali e na mata ni veicabocabo-ni-soro.

18A sa lesia ko Yioyata na tamata turaga e na vale i Jiova me ra muri ira na bete kei ira na Levi, o ira sa lesia ko Tavita mo dui nodra yasana e na vale i Jiova, me cabora na veisoro kama i Jiova, me vaka sa volai e na vunau i Mosese, ka ia na reki kei na sere me vaka sa rotaka ko Tavita.

19A sa lesi ira nai vakatawa me tu ki na matamata-ni-koro ni vale i Jiova, me kakua ni curu kina e dua sa tawa savasava e na vuku ni dua na ka.

20A sa kauti ira na turaga ni veiyadrau, kei ira na turaga, kei ira na nodra turaga na tamata, kei ira kecega na lewe ni vanua, ka kauta sobu na tui mai na vale i Jiova: a ra sa curuma na matamata-ni-koro cecere ki na vale ni tui, a ra sa vakatikora na tui e nai tikotiko vakatui ni matanitu.

21A sa rereki kecega na lewe ni vanua: a sa vakacegu na koro, ni ra sa vakamatei Acaliya e nai seleiwau.