II. A Veika Sa Caka E Na Veigauna 22 - AI VOLA TABU（FIJ1864）

Sa tui Juta ko Easiya, a sa levu na nonai valavala ca.

1A SA buli Easiya na luvena sa gone, me tui me kenai sosomi, ko ira na kai Jerusalemi: ni sa vakamatei iratou kecega na gone sa qase, ko ira na mataivalu era a lako vata kei ira na kai Arapia ki na koro. A sa tui ko Easiya na luve i Yiorami na tui Juta.

2Sa vasagavulu ka rua na yabaki i Easiya ni sa mai tui, a sa lewa e Jerusalemi ka yabaki dua. Na yaca i tinana talega ko Acaliya na luve i Omiri.

3Sa muria talega ko koya nai valavala ni mataqali i Eapi: ni sa vakatavulici koya ko tinana me valavala ca.

4A sa caka ca kina e na mata i Jiova me vaka na mataqali i Eapi: ni ra sa nonai vakavuvuli ni sa mate ko tamana, ka sa rusa kina ko koya.

5Sa muria talega na nodrai vakavuvuli, ka lako kei Yiorami na luve i Eapi na tui Isireli me veivala kei Esaeli na tui Siria mai Ramoci-kiliati: a sa yaviti Yorami ko ira na kai Siria.

6A sa lesu ko koya ki Isirieli me bula mada mai na nona vue ka vuetaki kina mai Rama, ni sa vala kei Esaeli na tui Siria.

A sa lako sobu ko Asariya na luve i Yiorami na tui Juta ki Isirieli me raici Yiorami na luve i Eapi, ni sa tauvi mate ko koya.

7A sa mai vua na Kalou na rusa i Easiya ni sa lako mai kivei Yorami: io ni sa lako mai, sa lako yani kei Yiorami mo veivala kei Yeu na luve i Nimisi, o koya ka lumuta ko Jiova me muduka na mataqali i Eapi.

8A sa yaco, ni sa ia na vei-cudruvi ko Yeu ki na mataqali i Eapi, sa kunei ira na nodra turaga na Juta, kei iratou na luvedratou na taci i Easiya, o iratou sa qaravi Easiya; a sa vakamatei iratou ko koya.

9A sa vakasaqarai Easiya ko koya: a ra sa tauri koya, (ni sa vuni tu mai Samaria,) ka kauta kivei Yreu: ia ni ra sa vakamatei koya, era sa buluta: ni ra sa kaya, Sa luve i Yiosafati, o koya ka vakasaqarai Jiova e na yalona taucoko.

A sa sega ni kaukauwa na mataqali i Easiya me taura tiko na matanitu.

10Ia ni sa raica ko Acaliya na tina i Easiya ni sa mate ko luvena, sa tu cake ko koya ka vakamatea kecega na kawa ni tui e na nodra mataqali na Juta.

11A sa kauti Yioasi na luve i Easiya ko Yiosapiaci na luvena alewa na tui, ka sa butakoci koya maivei iratou na luve ni tui eratou sa vakamatei, ka kauti koya kei na alewa sa susuga ki na dua na vale ni mocemoce. A sa vuni koya ko Yiosapiaci na luve i Yiorami na tui, na wati i Yioyata na bete, (ni sa gane i Easiya ko koya,) me kakua ni kunei koya ko Acaliya, a sa sega kina ni vakamatei koya.

12A sa tiko vei ira, ka vuni tu e na vale i Jiova, ka yabaki ono: a sa lewa na vanua ko Acaliya.