II. A Veika Sa Caka E Na Veigauna 21 - AI VOLA TABU（FIJ1864）

Sa tui Juta ko Yiorami, ka sa valavala ca ga. Sa vuki e na nona gauna ko ira na Itomi, kei ira na kai Lipina; a sa nona meca ko ira na kai Filisitia kei ira na kai Arapia.

1A SA moce vata kei ira na nona qase ko Yiosafati, a sa buluti vata kei ira na nona qase e na koro i Tavita.

A sa tui ko Yiorami na luvena, me kenai sosomi.

2A sa so na tacina na luve i Yiosafati, ko Asariya, kei Yieli, kei Sikariya, kei Asariya, kei Mikaeli, kei Sifatiya: o iratou kece o qo eratou sa luve i Yiosafati na tui Isireli.

3A sa solia vei iratou ko tamadratou nai solisoli levu, na siliva, kei na koula, kei na ka talei e so, kei na Veikoro vakabai e so e Juta: a sa solia na matanitu kivei Yiorami; e na vuku ni sa ulumatua ko koya.

4Ia ni sa tubu cake ko Yiorami me nona na matanitu i tamana, sa vakaukauwataki koya, ka vakamatei iratou kecega na tacina e nai seleiwau, ka so tale vei ira na turaga ni Isireli.

5Sa tolusagavulu ka rua na nona yabaki ko Yiorami ni sa mai tui, a sa lewa tiko e Jerusalemi ka yabaki walu.

6A sa muria na nodrai valavala na tui Isireli, me vaka ka kitaka ko ira na mataqali i Eapi: ni sa luve i Eapi na watina: a sa caka ca ko koya e na mata i Jiova.

7Ia ka sa sega ni via vakarusa na mataqali i Tavita ko Jiova, e na vuku ni veiyalayalati sa kitaka ko koya kei Tavita, ka vaka na nona yalayala me solia vua na cina, vei ira talega na luvena ka tawa mudu.

8Sa vuki ko ira na kai Itomi e na nona gauna, me ra kakua ni qali kivei ira na Juta, a ra sa bulia e dua me nodra tui.

9A sa lako yani ko Yiorami kei ira na nona turaga, kei na nona vale-vodoki kecega vata kaya; a sa tu cake e na bogi, ka yaviti ira na kai Itomi era sa vakavolivoliti koya, kei ira na turaga ni veivale-vodoki.

10A sa vuki ko ira na kai Itomi me ra kakua ni qali kivei ira na Juta, ka yacova na siga edaidai. Sa vuki e na gauna ko ya me kakua ni qali vei koya ko Lipina; e na vuku ni sa biuti Jiova ko koya, na nodra Kalou na nona qase.

11Sa cakava talega na veitikina cecere e na veiulu-ni-vanua e Juta, a sa kitaki ira na kai Jerusalemi me ra kitaka nai valavala vakatani, ka vakasaurarataki ira kina na Juta.

12A sa kau vua e dua nai vola maivei Ilija na parofita, ka vaka, Sa vosa vakaoqo ko Jiova na Kalou i Tavita na tamamu, E na vuku ni ko sa tawa muria nai valavala i Yiosafati na tamamu, se nai valavala i Asa na tui Juta,

13ka sa muria ga na nodrai valavala na tui Isireli, ka ko a kitaki ira na Juta kei ira na kai Jerusalemi me ra kitaka nai valavala vakatani, me vaka na nodrai valavala vakatani na mataqali i Eapi, ka ko sa yaviti iratou talega na tacimu eratou mataqali i tamamu, eratou tamata vinaka ka ca ko iko:

14raica, ena yaviti ira na nomu tamata ko Jiova e na mate levu, kei iratou na luvemu, kei iratou na watimu, kei na nomu ka kecega:

15ia ko na tauvi mate vakalevu e na ketemu, ia ena lutu mai kina na wawa ni ketemu e na vuku ni tauvi mate ko ya e na veisiga.

16Sa vakayavalata talega ko Jiova na lomadra na kai Filisitia, kei na kai Arapia, era sa voleka vei ira na kai Kusi, me ra veivala kei Yiorami:

17a ra sa cabe mai ki Jutia, ka basuka, a ra sa kauta tani na yau kecega sa kunei e na vale ni tui, kei iratou talega na luvena tagane, kei iratou na watina; ka sega kina ni vo vua e dua na luvena tagane, ko Yioaasi duaduaga, o koya sa gone vei iratou na luvena.

18A sa oti na ka kecega o qo, sa qai yaviti koya ko Jiova e na ketena e na dua na mate e sega ni vakabulai rawa.

19A sa yaco ni sa lako tiko na veisiga, ka oti e rua na yabaki, sa lutu mai kisau na ketena e na vuku ni nona tauvi mate: a sa mate kina e na tauvi mate rarawa. A sa sega ni cakava ko ira na nona tamata na kama e na vukuna, me vaka na kama e na vukudra na nona qase.

20E tolusagavulu ka rua na nona yabaki ni sa mai tui, a sa lewa tiko mai Jerusalemi ka yabaki walu, a sa mate ka sega e dua sa lomana. A sa buluti e na koro i Tavita, ka segai e na nodrai bulubulu na tui.