II. A Veika Sa Caka E Na Veigauna 20 - AI VOLA TABU（FIJ1864）

Sa masu ka lolo ko Yiosafati kei ira na Juta; sa qai vakamatei ko ira na nodra meca, 1-26. Sa qai tiko vakacegu mai Jerusalemi ko Yiosafati; a sa cala ni sa veitokani kei Easiya, 27-37.

1A SA yaco ni sa oti talega o qo, era sa lako mai ko ira na luve i Moapi, kei ira na luve i Amoni, ka so tani vei ira na Amoni, me ra veivala kei Yiosafati.

2Sa qai lako mai e so kava tukuna vei Yiosafati, ka kaya, Sa lako vakaivalu mai vei iko na lewe vuqa sara, mai na tai kadua ni wasawasa, mai Siria, ka, raica, era tiko mai Esesoni-tamari, o qori ko Eni-keti.

3A sa rere ko Yiosafati, ka qisi koya me vakasaqarai Jiova, ka tukuna na lolo e na veiyasana vaka-Juta kecega.

4A sa soqoni vata ko ira na Juta, me kerea na veivuke mai vei Jiova: ia era sa lako mai na veikoro i Juta me ra vakasaqarai Jiova.

5A sa tu ko Yiosafati e na loma ni nodrai vavakoso na kai Juta kei Jerusalemi, e na vale i Jiova, e na mata ni rara vou;

6a sa kaya, I Jiova na nodra Kalou na neimami qase, ko sa sega li ni Kalou mai lomalagi? ko sa sega li ni lewa na matanitu kecega ni veivanua? sa sega li ni tu e ligamu na kaukauwa kei na qaqa, ka sega kina e dua me vorati iko rawa?

7O sa sega li ni neimami Kalou, o koya ka vakaseva tani e na matadra na nomu tamata, na Isireli, na lewe ni vanua o qo, ka solia ki na kawa i Eparaama na nomui tokani me tawa mudu?

8A ra sa tiko kina, ka tara kina na vale tabu me nomu, e na vuku ni yacamu, ni ra kaya,

9Kevaka sa yaco vei keimami e dua na ca, nai seleiwau, na cudruvi, se na mate levu, se na dausiga, ia kevaka keimami na tu e na mata ni vale o qo, e matamu talega, (ni sa tiko na yacamu e na vale o qo,) ka tagi vei iko e na neimami rarawa, o na qai rogoca ka veivuke.

10Ia o qo, raica, ko ira na luve i Amoni kei Moapi kei na ulu-ni-vanua ko Seira, o ira ko sa tawa laivi ira na Isireli me kabai ira, ni ra sa lako cake mai na vanua ko Ijipita, a ra a gole tani ga vei ira, ka sega ni vakacacani ira;

11raica, era sa sauma vei keimami, ni ra lako mai me biuti keimami tani mai na nomui votavota, a ya ko sa solia me keimami taukena.

12Neimami Kalou, o na sega li ni lewai ira? ni sa sega vei keimami na kaukauwa me keimami veivala rawa kei ira na lewe vuqa o qo sa lako mai me vala kei keimami; ia keimami sa sega ni kila na ka me keimami kitaka: ia sa rai vei iko na mata i keimami.

13A sa tu e na mata i Jiova ko ira kecega na Juta, vata kei na nodra lalai, na watidra, kei na luvedra.

14Sa qai lutu na Yalo i Jiova vei Yeesieli na luve i Sikariya, na luve i Pinaya, na luve i Yieli, na luve i Mataniya, na Levi vei ira na luve i Asafi, ni sa tu e na loma ni vavakoso;

15a sa kaya ko koya, Dou rogoca, oi kemudou kecega na Juta, kei kemudou na kai Jerusalemi, kei iko Yiosafati na tui, Sa vosa vakaoqo vei kemudou ko Jiova, Dou kakua ni rere se taqaya e na vukudra na lewe vuqa o qo; ni sa sega ni nomudou nai valu, sa nona ga na Kalou.

16Dou lako sobu e na mataka me vala kei ira: raica, era sa lako cake mai e nai cabecabe ki Sisi; ia dou na kunei ira e na tutu ni buca, e donuya na veikau ni Yirueli.

17Dou kua ni vala o qo: dou tuva, dou tu, ka raica na nona vakabulai kemudou ko Jiova, oi kemudou na Juta kei ira mai Jerusalemi: dou kakua ni rere, se taqaya; lako yani me veivala kei ira e na mataka: ia ena nomudoui to ko Jiova.

18A sa vakacuva na uluna ko Yiosafati ka vakatobocu; a sa bale sobu ko ira kecega na Juta kei ira na kai Jerusalemi e na mata i Jiova, a ra sa soro kivei Jiova.

19A sa tu cake ko ira na Levi, e so maivei ira na luve i Koaca, ka maivei ira na luve i Kora, me ra vakavinavinaka kivei Jiova na nodra Kalou na Isireli e na domo levu kicake.

20A ra sa sou e na mataka, ka lako yani ki na veikau mai Tikoa: ia ni ra sa lako yani, sa tu ko Yiosafati, ka kaya, Dou rogoci au, oi kemudou na Juta kei kemudou na kai Jerusalemi, Dou vakabauti Jiova na nomudou Kalou, dou na vakataudeitaki kina; vakadinati ira na nona parofita, dou na cakacaka yaco kina.

21Ia ni sa bose oti ko koya kei ira na tamata, sa lesia e so me meke vei Jiova, ka mo ra vakavinavinaka e nai ukuuku yalosavasava, ni ra sa lako yani e na matadra nai valu, ka me ra kaya, Vakavinavinaka vei Jiova; ni sa tawa mudu na nona loloma.

22Ia ni ra sa qai lagata na meke kei na vakavinavinaka, sa lesia ko Jiova na lawa me yaviti ira na luve i Amoni, ko ira na Moapi, kei na ulu-ni-vanua ko Seira, era sa lako mai me veivala kei ira na Juta; a ra sa moku.

23Ni sa tu cake ko ira na luve i Amoni kei ira na Moapi me mokuti ira na kai ulu-ni-vanua ko Seira, me vakamatea ka vakarusa sara: ia ni ra sa vakaoti ira na kai ulu-ni-vanua ko Seira, era sa veivuke kecega me ia na veivakamatei vakai ira.

24Ta ni sa yaco ko ira na Juta ki na vale ni vakatawa e na veikau, era rai vaka kivei ira na lewe vuqa, ka, raica, era sa yago mate, sa bale ki na soso, ka sega ni dro bula e dua.

25Ia ni sa lako mai ko Yiosafati kei ira na nona tamata me kauta tani vei ira nai toki ni valu, era sa kunea na yau na ka levu vata kei ira na yago mate, kei na veivatu dredre, a ya era sa luvata me nodra, a ra sa sega kina ni kauta tani rawa: a ra sa bogi tolu ni ra sa kumuna vata tiko nai toki ni valu, e na vuku ni kena levu.

26Ia e na kenai kava ni siga, era sa soqoni vata e na buca ko Piraka: a ra sa vakarokoroko maikeri vei Jiova: a sa vakatokai kina na yaca ni yasana ko ya, Na buca ko Piraka, ka yaco ki na siga edaidai.

27Era sa qai lesu na tamata kecega ni Juta kei Jerusalemi, ka sa liutaki ira ko Yiosafati, me lako tale ki Jerusalemi e na marau; ni sa vakamarautaki ira ko Jiova e na vukudra na nodra meca.

28A ra sa lako ki Jerusalemi ki nona vale ko Jiova, era sa tara lako e so na qiriqiri, ka so na api, ka so na davui.

29A sa tauvi ira kecega na veimatanitu ni veivanua na rere vua na Kalou, ni ra sa rogoca ni sa veivala ko Jiova kei ira na nodra meca na Isireli.

30A sa sautu na matanitu i Yiosafati: ni sa vakasaututaki koya ko na nona Kalou e na veiyasana.

31A sa tui ko Yiosafati vei ira na Juta: sa tolusagavulu ka lima na nona yabaki ni sa mai tui ko koya, a sa tui tiko mai Jerusalemi ka yabaki ruasagavulu ka lima. Ia na yaca i tinana ko Asupa na luve i Sili.

32A sa muria ko koya nai valavala i Asa na tamana, ka sega ni lako tani maikina, a sa kitaka na ka e dodonu e na mata i Jiova.

33Ia ka sa sega ni kauti tani na veitikina i cecere: ka ni sa sega ni cokonaka oti na lomadra ko ira na tamata vua na nodra Kalou na nodra qase.

34Ia na vo ni cakacaka i Yiosafati, a kedrai matai, kei na kedrai otioti, raica, sa volai e nai vola i Yeu na luve i Enani, o koya sa cavuti e na kedrai vola na tui Isireli.

35Ia sa mai veitokani emuri ko Yiosafati na tui Juta kei Easiya na tui Isireli, o koya sa ia nai valavala ca:

36a sa veitokani kaya me ta waqa me lako ki Tarisisi: ia erau sa cakava na waqa mai Esioni-keperi.

37Sa qai parofisaitaka Yiosafati ko Elieseri na luve i Totava mai Maresa, a sa kaya, E na vuku ni ko sa laʼki veitokani kei Easiya, sa vorota na nomu cakacaka ko Jiova. A sa kavoro na veiwaqa me sega ni lako rawa ki Tarisisi.