II. A Veika Sa Caka E Na Veigauna 19 - AI VOLA TABU（FIJ1864）

Sa lewa vakavuku ko Yiosafati na tui Juta.

1A SA lesu tale e na vakacegu ko Yiosafati na tui Juta ki na nona vale mai Jerusalemi.

2A sa curu yani ko Yeu na luve i Enani na rairai, me tavaki koya, a sa kaya vei Yiosafati na tui, E dodonu li mo vukea nai valavala ca, ka lomani ira era sa cati Jiova, ne? e na vuku ni ka o qo sa tiko vei iko na cudru mai na mata i Jiova:

3ia ka sa kune talega vei iko na ka vinaka e so, ni ko sa kauti ira tani na kaloualewa ni veikau mai na vanua, ka sa cokonaka na lomamu me vakasaqara na Kalou.

4A SA tiko mai Jerusalemi ko Yiosafati: a sa lako tale ko koya e na nodra maliwa na tamata, mai Pieri-sepa ka yaco ki na ulu-ni-vanua ko Ifireimi, ka vakalesui ira tale vei Jiova na nodra Kalou na nodra qase.

5A sa lesia na mataveilewai e so e na vanua e na veikoro vakabai kecega e Juta, e na koro yadua.

6A sa kaya ko koya vei ira na mataveilewai, Dou qarauni kemudou e na vuku ni ka dou cakava; ni dou sa sega ni lewa e na vuku ni tamata, e na vukuna ga ko Jiova, o koya sa vata kei kemudou e na veilewai.

7E na vuku ni ka o qo me tiko kina vei kemudou na rerevaki Jiova; dou nanuma, ka kitaka: ni sa sega e dua nai valavala ca vei Jiova na noda Kalou, ka sega ni doka vakailoa na tamata, ka sega ni taura nai solisoli.

8A sa vakatikora ko Yiosafati mai Jerusalemi talega e so vei ira na Levi, vei ira talega na bete, vei ira talega na nodra qase turaga na Isireli, me ra ia na lewa i Jiova, kei na veileti, ni ra a lesu tale mai ki Jerusalemi.

9A sa vakadreta vei ira, ka kaya, Dou kitaka vakakina e na rerevaki Jiova, ka vakaidina, e na loma dodonu talega.

10Ia na ka kecega sa veiletitaki, ka sa kauti mai vei kemudou maivei ira na wekamudou era tiko e na nodra veikoro, e na vuku ni veivakamatei, e na veivunau kei na veivakaro, e na veilesilesi kei na veilewa, mo dou vunauci ira me ra kakua ni valavala ca vei Jiova, de sa yacovi kemudou na cudru, vei ira talega na wekamudou: dou cakava o qo, dou na qai sega ni caka cala.

11Ka, raica, sa lewai kemudou e na ka kecega i Jiova ko Emariya na bete levu; ia ko Sipatiya na luve i Isimeeli, o koya sa lewa na mataqali i Juta, e na nona ka kecega na tui; ena veivuke ko ira talega na Levi e na matamudou. Dou valavala vakadoudou, ia ena vata ko Jiova kei koya sa vinaka.