II. A Veika Sa Caka E Na Veigauna 18 - AI VOLA TABU（FIJ1864）

Erau tovata ko Yiosafati kei Eapi, ka laʼki valu ki Ramoci-kiliati, ka mate kina ko Eapi.

1A SA ka levu na nona yau ko Yiosafati, kei na nona vakarokorokotaki, a sa vakawati kei na mataqali i Eapi.

2Ia ni sa oti e so na yabaki sa lako sobu ko koya kivei Eapi ki Samaria. A sa vakamatea ko Eapi na sipi kei na karavau na ka levu me kena, me kedra talega era vata kaya, a sa cikevi koya me lako ki Ramoci-kiliati.

3A sa kaya ko Eapi na tui Isireli kivei Yiosafati na tui Juta, O na lako kei au ki Ramoci-kiliati, se segai? a sa kaya vua, Ko kedaru vata ga; sa vata ga na nedaru tamata; ia keimami na vata kei iko e nai valu.

4A sa kaya ko Yiosafati vua na tui Isireli, Mo taroga mada na vosa i Jiova edaidai.

5A sa vakasoqoni ira vata kina ko na tui Isireli, na parofita era va na drau na tamata, a sa kaya vei ira, Me keimami lako ki Ramoci-kiliati me ia nai valu, se meʼu kakua? A ra sa kaya, Lako ga, ia ena solia ko na Kalou ki na liga ni tui.

6A sa kaya ko Yiosafati, Sa sega beka ni tiko eke e dua talega na parofita i Jiova, me daru taroga vua?

7A sa kaya vei Yiosafati ko na tui Isireli, Sa dua tale na tamata, eda tarogi Jiova rawa kina: ia kaʼu sa cati koya; ni sa sega ni parofisaitaka na ka vinaka e na vukuqu, na ka ca tikoga: o koya ko Mikayiu na luve i Imila. A sa kaya ko Yiosafati, Me kakua ni kaya vakakoya ko na tui.

8Sa qai kaciva e dua na turaga ko na tui Isireli, ka kaya, Me kusarawa mai ko Mikayiu na luve i Imila.

9A rau sa dui tiko e nonai tikotiko vakaturaga, na tui Isireli kei Yiosafati na tui Juta, e na rara mai na matamata-ni-koro ni Samaria, a rau sa vakaisulu vakavinaka; a ra sa ia tiko na parofisai e matadrau ko ira kecega na parofita.

10A sa cakava ko Sitikiya na luve i Kinana e so na kaukamea vakamanumanu e na aironi; a sa kaya, Sa vosa vakaoqo ko Jiova, O na cumuti ira na kai Siria e na veika o qo, ka me ra vaka oti.

11A ra sa parofisai vakakina ko ira kecega na parofita, ka kaya, Mo lako cake ki Ramoci-kiliati, ka gumatua; ia ena solia ko Jiova ki na ligana na tui.

12A sa vosa vei Mikayiu ko nai talatala ka laʼki kaciva, a sa kaya, Raica, na nodra vosa na parofita, sa gusu e dua ga e na ka vinaka vua na tui: ia me tautauvata mada na nomu vosa kei na nona e dua vei ira, ka mo cavuta na ka vinaka.

13A sa kaya ko Mikayiu, Me vaka sa bula ko Jiova, na ka sa kaya ko Jiova vei au, o qori ga kaʼu na vosataka.

14Ia ni sa yaco mai ko koya vua na tui, sa kaya vei koya ko na tui, I Mikayiu, me keimami lako ki Ramoci-kiliati me vala, se meʼu kakua? A sa kaya ko koya, Dou lako cake, ka gumatua; ia era na soli ki na ligamudou,

15A sa kaya vua ko na tui, Meʼu kitaki iko vakavica mada mo vosavavakini, mo cavuta vei au e na yaca i Jiova na dina walega?

16A sa kaya ko koya, Au a raici ira kecega na Isireli, ka ra dui sese e na veiulu-ni-vanua, me vaka na sipi sa sega na nodrai vakatawa: a sa kaya ko Jiova, Sa sega na nodra turaga ko ira o qo: me ra dui lesu e na vakacegu ki na nona vale.

17A sa kaya na tui Isireli vei Yiosafati, Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?

18Sa kaya tale ko koya, O koya o qo, mo dou rogoca kina na vosa i Jiova: Au a raici Jiova, ni sa tiko e nonai tikotiko vakaturaga, a ra sa tiko voleka vua e nai matau kei nai mawi ko ira kecega na lewe i lomalagi.

19A sa kaya ko Jiova, O cei ena cikevi Eapi na tui Isireli, me lako cake me bale mai Ramoci-kiliati? A sa vosa vaka e dua, a sa vosa vaka e dua.

20A sa lako mai na yalo, ka laʼki tu e na mata i Jiova, ka sa kaya, Oi au ga, kaʼu na cikevi koya. A sa kaya vua ko Jiova, E na cava?

21A sa kaya ko koya, Au na lako yani, ia kaʼu na yalo lasu e na gusudra kecega na nona parofita. A sa kaya ko koya, O na ia na cikecike, ka gumatua talega: mo lako yani, ka kitaka vakakina.

22Ia o qo, raica, sa tauca ko Jiova na yalo lasu e na gusudra na nomu parofita o qo, a sa vosataka na ka ca ko Jiova, me yacovi iko.

23A sa toro ko Sitikiya na luve i Kinana, ka sabici Mikayiu e baluna, a sa kaya, A sala cava ka lako tani kina vei au na Yalo i Jiova me vosa vei iko?

24A sa kaya ko Mikayiu, Raica, ko na qai kunea e na siga ko ya ko na curu kina ki loma ni loqi, me vuni iko.

25A sa kaya na tui Isireli, Mo dou kauti Mikayiu, ka vakalesuya kivei Amoni, na turaga ni koro, kei Yoasi na luve ni tui,

26ka kaya, Sa vosa vakaoqo na tui, Drau vakacuruma o qo ki na vale ni veivesu, ka vakani koya e na madrai ni veivakararawataki, kei na wai ni veivakararawataki, ka meʼu tale vakacegu mada mai.

27A sa kaya ko Mikayiu, Kevaka ko na lesu vakaidina mai e na vakacegu, sa qai sega ni vosa e gusuqu ko Jiova. A sa kaya, Dou rogoca, oi kemudou kecega na tamata.

28A rau sa lako cake ki Ramoci-kiliati, na tui Isireli kei Yiosafati na tui Juta.

29A sa kaya na tui Isireli vei Yiosafati, Au na suluma nai sulu tani, ka lako ki nai valu; ia mo vakaisulutaki iko e na nomui sulu ga. A sa suluma nai sulu tani na tui Isireli, ka rau a lako ki nai valu.

30A sa rotaka ko na tui Siria vei ira na nona turaga ni veivale-vodoki, a sa kaya, Dou kakua ni veivala kaya e dua e lailai, se dua e levu, vei koya ga na tui Isireli.

31Ia ni sa raici Yiosafati ko ira na turaga ni veivale-vodoki, era sa kaya, O qori na tui Isireli. A ra sa vakavolivoliti koya me veivala kaya: a sa qoqolou ko Yiosafati, a sa vukei koya ko Jiova; a sa vakayavalati ira ko na Kalou me ra lako tani vua.

32Ia ni sa raica ko ira na turaga ni veivale-vodoki ni sa sega ni tui Isireli ko koya, era sa lesu kimuri, me kakua ni vakasavi koya.

33A sa dua na tamata sa loka loa ga na dakai, ka vanai koya na tui Isireli e na tikina sa veiuturi kina na veitikina ni nonai sulu ni valu: a sa kaya ko koya vua sa vakauta na nona vale-vodoki, Mo vakalesuya na ligamu, ka kauti au tani e nai valu, niʼu sa vuetaki.

34A sa levu cake tiko nai valu e na siga ko ya: a sa tauri me tu cake rawa na tui Isireli e na vale-vodoki, me vala kei ira na kai Siria, ka yacova na yakavi: a sa mate ko koya ni sa laʼki dromu na siga.