II. A Veika Sa Caka E Na Veigauna 17 - AI VOLA TABU（FIJ1864）

Sa tui Juta ko Yiosafati, a sa lewa vinaka.

1A SA tui ko Yiosafati na luvena, me kenai sosomi, a sa vakaukauwataki koya me vala kei ira na Isireli.

2A sa vakatikora na mataivalu e na veikoro vakabai kecega e Juta, a sa lesia nai valu e na vanua ko Juta, kei na veikoro i Ifireimi, a ya ka rawa ko Asa na tamana.

3A sa tiko kei Yiosafati ko Jiova, e na vuku ni sa muria nai valavala eliu ni nona qase ko Tavita, ka sega ni vakasaqaqara vei ira na Peali;

4a sa vakasaqaqara ki na Kalou i tamana, ka lako e na nona veivunau, ka sega e na nodrai valavala na Isireli.

5A sa vakataudeitaka kina ko Jiova na matanitu e na ligana; a sa kauta na veika-ni-loloma kivei Yiosafati ko ira kecega na Juta; ia sa nona na yau kei na vakarokoroko na ka levu.

6A sa laveti cake na yalona e na sala i Jiova: sa kauta tani talega ko koya na veitikina cecere kei na veikaloualewa ni veikau mai Juta.

7Ia e na kenai katolu ni yabaki ni nona lewa, sa talaki vei ira na nona turaga, kivei Peni-eyili, kei Opatiya, kei Sikariya, kei Nicaneli, kei Mikaya, me ia nai vakavuvuli e na Veikoro i Juta.

8A sa vata kei ira e so na Levi, ko Simaya, kei Nicaniya, kei Sipatiya, kei Asaeli, kei Simiramoci, kei Yionacani, kei Etoniya, kei Topiya, kei Topi-etoniya, o iratou na Levi; a sa vata kei iratou ko Ilisama kei Yiorami, erau sa bete.

9A ratou sa vakatavuvuli e Juta, a sa tu vei iratou nai vola ni vunau i Jiova, a ra sa lako voli e na Veikoro kecega e Juta, ka vakatavulici ira na tamata.

10A sa tauva na matanitu kecega ni veivanua ka vakavolivoliti Juta na rere vei Jiova, ka ra sa sega kina ni ia nai valu kei Yiosafati.

11Sa kauta na veika-ni-loloma kivei Yiosafati ko ira talega e so na kai Filisitia, kei nai vakacavacava siliva; a sa kauta vua e so na manumanu ko ira na kai Arapia, e vitu na udolu ka vitu na drau na sipi tagane, ka vitu na udolu ka vitu na drau na koti tagane.

12A sa tubu ko Yiosafati me levu sara; a sa tara e Juta na veivale ni valu, kei na veikoro ni yau.

13A sa levu na cakacaka e qisia e na nodra veikoro na Juta: ia ko ira na tamatai valu, o ira na tamata kaukauwa ka qaqa, era a tiko mai Jerusalemi.

14Ia o qo na nodrai wiliwili me vaka na veimataqali ni nodra qase: Maivei ira na Juta, ko ira na turaga ni veiudolu: o Atina sa liu, ka vata kaya e oba vakatolusagavulu na tamatai valu qaqa.

15A sa taravi koya ko Yioanani na turaga, ka vata kaya era oba vakavasagavulu ka walu.

16A sa taravi koya ko na luve i Sikiri ko Emasiya, o koya sa soli koya vakayalodina kivei Jiova; a sa vata kaya e oba vakavasagavulu na tamatai valu qaqa.

17Maivei Penijamini talega: o Eliyata, e dua na tamatai valu qaqa, a sa vata kaya e oba vakavasagavulu na tamata era vakaiyaragi e na dakai dina kei nai sasabai.

18A sa taravi koya ko Yosapati, a sa vata kaya e oba vakatinikawalu na tamata era sa vakarautaki ki nai valu.

19Sa qarava na tui ko ira o qo, a sa vo ko ira sa vakatikora ko na tui e na Veikoro vakabai e na veiyasana e Juta.