II. A Veika Sa Caka E Na Veigauna 16 - AI VOLA TABU（FIJ1864）

Sa vakararavi ko vei ira na kai Siria; sa tauvi mate i yavana ko koya, ka mate.

1E NA kenai katolusagavulu kaono ni yabaki ni nona lewa ko Asa, sa lako cake ko Pasa na tui Isireli me veivala kei ira na Juta, ka tarai Rama, ka me kakua ni laiva e dua me lako tani se lako mai vei Asa na tui Juta.

2Sa qai kauta mai ko Asa na siliva kei na koula mai na yau mai na vale i Jiova, kei na vale ni tui, a sa vakauta kivei Peni-etati, na tui Siria, o koya sa tiko mai Tamasiko, a sa kaya,

3Sa dua na nodaru veiyalayalati, sa vaka vei rau na tamadaru: raica, au sa vakauta vei iko na siliva kei na koula: mo lako, mo musuka na nomudrau veiyalayalati kei Pasa na tui Isireli, me lako tani vei au ko koya.

4A sa vakarorogo ko Peni-etati kivei Asa na tui, ka sa vakatalai ira na turaga ni nona veimataivalu, me kaba na nodra veikoro na Isireli: a ra sa yaviti lyoni, kei Tani, kei Apeli-meimi, kei na Veikoro kecega ni yau e Nafitali.

5Ia ni sa rogoca ko Pasa, sa cegu ni tarai Rama, a sa laiva me mudu na nona cakacaka.

6A sa kauti ira kecega na Juta ko Asa na tui; a ra sa colata tani mai Rama na kena veivatu, kei na kena kau, ka tarai tiko kina ko Pasa; a sa tarai Kepa kei Misipa kina ko koya.

7Ia e na gauna o qori sa lako mai ko Enani na rairai kivei Asa na tui Juta, a sa kaya vua, E na vuku ni ko sa vakararavi kivei tui Siria, ka sega ni ko vakararavi vei Jiova na nomu Kalou, sa dro bula kina mai na ligamu nai valu ni tui Siria.

8Era a sega li ni lewe vuqa ko ira na kai Kusi kei na kai Lipia, ka vuqa sara na vale-vodoki kei na tamata vodo e na ose? ia e na vuku ni ko a vakararavi vei Jiova, sa soli ira ko koya ki na ligamu.

9Ni sa veiciciyaki na mata i Jiova e vuravura taucoko, me totaki ira vakaidina sa dodonu na lomadra vua. O sa valavala vakalialia e na ka o qo: ia e na gauna emuri ena ia vei iko nai valu.

10Sa qai cudru sara ko Asa vua na rairai, a sa vakacurumi koya ki na vale ni veivesu; ni sa levu na nona cudru vua e na vuku ni ka o qo. Sa vakasaurarataka talega ko Asa e so vei ira na tamata e na gauna ko ya.

11Ka, raica, na cakacaka i Asa, a kedrai matai, kei na kedrai otioti, raica, sa volai e na kedrai vola na tui Juta kei Isireli.

12A sa tauvi mate na yava i Asa e na kenai katolusagavulu ka ciwa ni yabaki ni nona lewa, ka tubu sara na nona tauvi mate: ia ka sa sega ni vakasaqaqara vei Jiova e na nona mate, vei ira ga na vu-ni-wai.

13A sa moce vata kei ira na nona qase ko Asa, a sa ciba e na kenai kavasagavulu ka dua ni yabaki ni nona lewa.

14A sa buluti e na nonai bulubulu, sa kelia ko koya me nona e na koro i Tavita, sa vakadavori e nai davodavo e dua sa vakasinaiti e na ka boi vinaka, kei na ka e so ka cokonaka me vaka na nodrai valavala na dau-ni-saluaki: a ra sa cakava e dua na kama levu sara e na vukuna.