II. A Veika Sa Caka E Na Veigauna 15 - AI VOLA TABU（FIJ1864）

Sa saumaki ko Asa, kei ira na lewe vuqa, e nai vakaro i Esariya na parofita, ka sa vinaka na matanitu.

1A SA yacovi Esariya na luve i Oteti na yalo ni Kalou:

2a sa curu yani me tavaki Asa, a sa kaya vua, Dou rogoci au mai, ko Asa, kei ira kecega na Juta kei Penijamini: Sa tiko kei kemudou ko Jiova, ni dou sa tiko kei koya; ia kevaka dou sa vakasaqarai koya, ena kunei vei kemudou ko koya; ia kevaka dou sa biuti koya, ena biuti kemudou ko koya.

3Ia, sa yali vakadede na Kalou dina vei ira na Isireli, ka yali na bete e vakatavuvuli, ka yali na vunau.

4Ia, ni ra a saumaki kivei Jiova na nodra Kalou na Isireli e na gauna ni nodra rarawa, ka vakasaqarai koya, era sa kunei koya.

5Ia e na gauna ko ya sa sega na vakacegu vei koya sa curu kitautuba, se vei koya sa curu mai, ia na ka levu na rarawa ka koto vei ira kecega na lewe ni veivanua.

6A sa vakarusai na matanitu e dua e na matanitu e dua, kei na koro e dua e na koro e dua: e na vuku ni sa vakararawataki ira na Kalou e na ca kecega.

7Dou kaukauwa ga, ia me kakua ni malumalumu na ligamudou, ni na vakai-sau na nomudou cakacaka.

8Ia ni sa rogoca ko Asa na vosa o qo, kei na parofisai i Oteti na parofita, sa doudou mai, a sa biuta tani na veimatakau vakasisila mai na vanua taucoko i Juta kei Penijamini, mai na Veikoro talega sa rawa ko koya mai na ulu-ni-vanua ko Ifireimi, ka sa vakavouya nai cabocabo-ni-soro i Jiova, o qori ka tu e na mata ni virada i Jiova.

9A sa vakasoqoni ira vata kecega na Juta kei ira na Penijamini, kei ira na vulagi mai Ifireimi kei Manase, mai Simioni talega: ni sa lewe vuqa vei ira na Isireli era vuki vua, ni ra kunea ni sa vata kaya ko Jiova na nona Kalou.

10A ra sa soqovata mai ki Jerusalemi e nai katolu ni vula, e na kenai katinikalima ni yabaki ni lewa i Asa.

11Ara sa cabora kivei Jiova e na gauna ko ya e so na ka ni valu era a tokitaka, e vitu na drau na karavau, ka vitu na udolu na sipi.

12A ra cakava na veiyalayalati me ra vakasaqarai Jiova na nodra Kalou na nodra qase, e na lomadra taucoko, kei na yalodra taucoko;

13ka me vakamatei ko koya yadua sa bese ni vakasaqarai Jiova na nodra Kalou na Isireli, ke sa tamata lailai se levu, se tagane se alewa.

14A ra sa vosa vavakini kivei Jiova e na domo levu, kei na qoqolou, kei na veidavui sa rua na nedra cakacaka.

15A sa marau ko ira kecega na Juta e na vuku ni vosa vavakini: ni ra a vavakini e na lomadra taucoko, a ra sa vakasaqarai koya e na nodra gadreva kece; a sa kunei vei ira ko koya, a sa vakasaututaki ira ko Jiova e na veiyasana.

16A sa vakasivoi Meeka talega, na tina i Asa na tui, me kakua ni ranadi, e na vuku ni sa cakava ko koya e dua na matakau ki na kaloualewa ni veikau; ka sa taya sobu na nona matakau ko Asa, ka buturaka, ka visa mai na soniwai ko Kitironi.

17A sa sega ni kauti tani e Isireli na veitikina cecere: a sa dodonu ga na loma i Asa e na siga kecega ni nona bula.

18A sa kauta ko koya ki loma ni vale ni Kalou na veika ka cabora ko tamana, kei na veika sa cabora ko koya, na siliva, kei na koula, kei na veiyaya.

19A sa sega nai valu ka yacova nai katolusagavulu ka lima ni yabaki ni lewa i Asa.