II. A Veika Sa Caka E Na Veigauna 14 - AI VOLA TABU（FIJ1864）

Sa tui Juta ko Asa; a sa gumatua ni rau a veivala kei Sera mai Kusi.

1A SA moce kei ira na nona qase ko Epiya, a sa buluti e na koro i Tavita: a sa lewa ko Asa na luvena, me kenai sosomi. Sa sautu na vanua ka yabaki tini e na nona gauna.

2A sa caka vinaka ka dodonu e na mata i Jiova na nona Kalou ko Asa:

3ni sa kauta tani ko koya na veicabocabo-ni-soro tani, kei na veitikina cecere, a sa musumusuka na veimatakau, ka taya sobu na veikaloualewa ni veikau:

4a sa vakaroti ira na Juta me vakasaqarai Jiova na nodra Kalou na nodra qase, ka kitaka na vunau kei nai vakaro.

5A sa kauta tani mai na nodra veikoro kecega na Juta na veitikina cecere kei na veimatakau: a sa sautu e na matana na matanitu.

6A sa tara e Juta e so na koro vakabai: ni sa sautu na vanua, ka sega na nonai valu e na veiyabaki o qori; ni sa vakasaututaki koya ko Jiova.

7A sa kaya kina vei ira na Juta, Me da tara na veikoro o qo, ka viria nodra bai me vakavolivolita, kei na vale ni vakatawa, na veimatamata-ni-koro, kei na veisamugakagaka; sa rawa koto e na matada na vanua; e na vuku ni keimami sa vakasaqarai Jiova na neimami Kalou; keimami sa vakasaqara, a sa vakasaututaki keimami e na veiyasana. A ra sa mai tara ka yaco.

8A sa dua na nona mataivalu ko Asa era sa taura nai sasabai kei na moto, sa oba vakatolusagavulu mai Juta; ka oba vakavasagavulu ka walu mai Penijamini era sa taura nai sasabai ka loka dakai: o ira kecega o qo era sa tamatai valu qaqa.

9A sa lako mai me vala kei ira ko Sera na kai Kusi, ia na nona mataivalu sa oba vakadrau, ka tolu na drau na vale-vodoki: a ra sa lako mai ki Maresa.

10A sa curu yani ko Asa me vala kaya, a rau sa tuva nodraui valu e na buca i Sifaca mai Maresa.

11A sa tagi ko Asa vei Jiova na nona Kalou, ka kaya, I Jiova, na ka rawarawa vei iko me veivuke kei ira na lewe vuqa, se kei ira sa sega vei ira na kaukauwa: mo vukei keimami, i Jiova na neimami Kalou; ni keimami sa vakararavi vei iko, ka laʼki vala kei ira na lewe vuqa o qo e na yacamu ga. I Jiova, o sa neimami Kalou; me kakua ni gumatua na tamata vei iko.

12A sa mokuti ira na kai Kusi ko Jiova e na mata i Asa, kei na matadra na Juta; a sa dro ko ira na kai Kusi.

13A sa vakasavi ira ko Asa, kei ira na tamata era vata kaya, ka yaco ki Kirari: a sa vakabalei ko ira na kai Kusi, era sa sega ni kaukauwa tale rawa; ni ra sa vakarusai e na mata i Jiova, kei ira na nona mataivalu; ia na ka levu sara na yau era sa tokitaka.

14A ra sa yavita na Veikoro kecega e vakavolivoliti Kirari; ni sa tauvi ira na rere vei Jiova: a ra sa tokitaka na yau ni veikoro kecega; ni sa ka levu vakaidina na yau sa tiko kina.

15A ra sa yavita na veivale ni karavau, ka kauta yani na sipi, kei na kameli, na ka levu, a ra sa lesu tale ki Jerusalemi.