II. A Veika Sa Caka E Na Veigauna 13 - AI VOLA TABU（FIJ1864）

Sa tui Juta ko Epiya; a sa gumatua ni rau a vala kei Yaropiami na tui Isireli.

1IA e na kenai katinikawalu ni yabaki i Yaropiami na tui, sa mai tui Juta ko Epiya.

2Sa tui tiko mai Jerusalemi ka yabaki tolu. Ia na yaca i tinana ko Mikaya, na luve i Urieli mai Kipia.

A rau sa veivala ko Epiya kei Yaropiami.

3A sa tuvai valu ko Epiya; era sa mataivalu tamata qaqa ni valu, sa oba vakavasagavulu na tamata digitaki: a sa tuvai valu talega ko Yaropiami me veivaluti kaya, vata kei ira na tamata digitaki e oba vakawalusagavulu, era tamata kaukauwa.

4A sa tu cake ko Epiya e na dela ni ulu-ni-vanua ko Simareimi, o qori e na ulu-ni-vanua ko Ifireimi, a sa kaya, Dou rogoci au mai, o iko Yaropiami, kei kemudou kecega na Isireli;

5sa sega li ni kilikili kei kemudou, mo dou kila ni ka solia ko Jiova na nodra Kalou na Isireli vei Tavita me lewai ira na Isireli ka tawa mudu, io, vei koya kei ira na luvena, ni sa veiyalayalatitaka e na masima.

6Ia ka sa tu cake ko Yaropiami, na luve i Nipati, e dua na tamata i Solomoni na luve i Tavita, a sa talaidredre vua na nona turaga.

7A sa soqoni vata vei koya na tamata lialia e so, na luve ni vu-ni-ca, a ra sa vakaukauwataki ira me biuti Riapiami na luve i Solomoni, ni sa gone ga ko Riapiami ka yalowai, ka sega ni vorati ira rawa.

8Ia edaidai dou sa nanuma me vorata na matanitu i Jiova ni sa tu e na ligadratou na luve i Tavita: ia dou sa lewe vuqa, ka sa vata kei kemudou na luve ni karavau koula e rua ka cakava ko Yaropiami me nomudou kalou.

9Dou sa sega li ni biuti ira tani na nona bete ko Jiova, ko ira na luve i Eroni, kei ira na Levi, ka lesia na nomudou bete me vaka na veimatanitu ni veivanua? sa yaco me bete vei ira era sa sega ni kalou, ko ira yadua sa laʼki kauta e dua na karavau sa gone, ka vitu na sipi tagane, me vakatabui koya kina.

10Ia koi keimami, sa neimami Kalou ga ko Jiova, ia keimami sa sega ni biuti koya; kei ira na bete, era sa qaravi Jiova tiko, era sa luve i Eroni, kei ira na Levi era kitaka tiko na cakacaka:

11a ra sa vakama vei Jiova e na mataka kei na yakavi kecega na veisoro kama kei na ka boi vinaka: era sa cokonaka na madrai dauyatuni talega e dela ni kanakana savasava; kei nai tutu-ni-cina koula kei na kena veicina, me caudre e na veiya-kavi: ni keimami sa vakabauta nai lesilesi i Jiova na neimami Kalou; ia koi kemudou, dou sa biuti koya.

12Ka, raica, sa tiko kei keimami na Kalou, me vu-ni-valu, kei ira na nona bete, kei na davui rorogo me vakatagi na nomudou tutu. Oi kemudou na luve i Isireli, kakua ni dou veivala kei Jiova na nodra Kalou na nomudou qase; ni dou na tawa yaco.

13A sa vakarota na lawa ko Yaropiami me lako ki dakudra: ia era sa tu e matadra na Juta, ka tiko na lawa mai dakudra.

14Ia ni sa rai kimuri ko ira na Juta, rai ca, sa e matadra nai valu, e dakudra talega: a ra sa tagi vei Jiova, ka uvuca na davui ko ira na bete.

15A sa qoqolou ko ira na tamata Juta; a sa yaco ni sa qoqolou tiko ko ira na tamata Juta, sa yaviti Yaropiami kei ira kecega na Isireli na Kalou, e na mata i Epiya kei ira na Juta.

16A sa dro ko ira na luve i Isireli e na matadra na Juta: a sa soli ira na Kalou ki na ligadra.

17A sa mokuti ira e na samu levu ko Epiya kei ira na nona tamata: a sa bale mate kina vei ira na Isireli e oba vakalimasagavulu na tamata digitaki.

18A sa vakamalumalumutaki ko ira na luve i Isireli e na siga ko ya, a sa gumatua ko ira na luve i Juta, e na vuku ni ra a vakararavi vei Jiova na nodra Kalou na nodra qase.

19A sa vakasavi Yaropiami ko Epiya, a sa rawata e so na nona Veikoro, ko Peceli kei na kena veikoro, kei Yisana kei na kena Veikoro, kei Ifireimi kei na kena veikoro.

20A sa sega ni kaukauwa tale ko Yaropiami e na gauna i Epiya: a sa yaviti koya ko Jiova, a sa mate ko koya.

21A sa tubu me kaukauwa ko Epiya, a sa veiwatini kei na alewa e tinikava, a sa vakasikava e lewe ruasagavulu ka rua na luvena tagane, ka tinikaono na luvena alewa.

22Ia na vo ni cakacaka i Epiya, kei na nonai valavala, kei na nona vosa, sa volai e nai tukutuku ni parofita ko Ito.