II. A Veika Sa Caka E Na Veigauna 12 - AI VOLA TABU（FIJ1864）

Sa valavala ca ko Riapiami, a sa yaco kina nai valu ki Jerusalemi: sa qai veivutuni ko Riapiami kei ira na tamata, era sa sega kina ni vakarusai.

1IA ni sa vakataudeitaka na matanitu ko Riapiami, ka vakaukauwataki koya, sa biuta na vunau i Jiova ko koya, kei ira vata kaya kecega na Isireli.

2Ia e na kenai kalima ni yabaki i Riapiami na tui, sa laʼki vala ki Jerusalemi ko Sisaki na tui Ijipita, e na vuku ni ra a talaidredre vei Jiova,

3a sa vata kaya e tinikarua na drau na vale-vodoki, ka ono na oba na tamata dauvodo e na ose; a sa sega ni wiliki rawa ko ira na tamata era sa lako vata kaya mai Ijipita: o ira na kai Lipia, ko ira na Sukiyi, kei ira na kai Kusi.

4A sa rawata na Veikoro vakabai sa nei Juta, ka lako ki Jerusalemi.

5Sa qai lako ko Simaya na parofita kivei Riapiami, kei ira na turaga ni Juta, era sa soqoni vata ki Jerusalemi e na vuku i Sisaki, a sa kaya vei ira, Sa vosa vakaoqo ko Jiova, Dou sa biuti au, ia kaʼu sa biuti kemudou kina ki na liga i Sisaki.

6A ra sa qai vakamalumalumutaki ira, ko ira na turaga ni Isireli kei na tui; a ra sa kaya, Sa yalododonu ko Jiova.

7Ia ni sa raica ko Jiova ni ra sa vakamalumalumutaki ira, sa qai lako mai na vosa i Jiova kivei Simaya, ka kaya, Era sa vakamalumalumutaki ira; au na sega ni vakarusai ira, ia kaʼu na vakabulai ira vakalailai; ena sega talega ni sovaraki ki Jerusalemi na noqu cudru e na liga i Sisaki.

8Ia era na nona bobula; me ra kila kina nai valavala ni qaravi au, kei nai valavala ni qaravi ira na veimatanitu ni veivanua.

9A sa lako mai ko Sisaki na tui Ijipita me kabai Jerusalemi, ka tokitaka na yau ni vale i Jiova, kei na yau ni nona vale na tui; sa kauta kecega: sa kauta tani talega nai sasabai koula ka cakava ko Solomoni.

10A sa vakaisosomitaka ko Riapiami na tui e nai sasabai parasa, ka solia ki na ligadra na nodra turaga nai vakatawa era sa vakatawana na katuba ni nona vale na tui.

11Ia ni sa laʼki curu na tui ki na vale i Jiova, sa lakova nai sasabai ko ira nai vakatawa, ka kauta tale ki na vale ni vakatawa.

12Ia ni sa vakamalumalumutaki koya, sa saumaki tani vua na cudru i Jiova, a sa sega kina ni vakarusai sara: a sa so na ka vinaka e Juta talega.

13A sa vakaukauwataki koya ko Riapiami na tui e Jerusalemi, ka sa lewa tiko: sa vasagavulu ka dua na yabaki i Riapiami ni sa mai tui, a sa lewa mai Jerusalemi ka yabaki tinikavitu, na koro ka digitaka ko Jiova mai na nodra veiyavusa kecega na Isireli, me vakatikora kina na yacana. Ia na yaca i tinana ko Neema, na luve i Amoni.

14A sa valavala ca ga ko koya, ni sa sega ni cokonaka na yalona me vakasaqarai Jiova.

15Ia na cakacaka i Riapiami, a kedrai matai, kei na kedrai otioti, sa sega li ni volai e na nodrau vola ko Simaya na parofita, kei Ito na rairai, e na vuku ni veitabatamata? A sa tawa mudu na nodrau veivala ko Riapiami kei Yaropiami.

16A sa moce vata kei ira na nona qase ko Riapiami, a sa buluti e na koro i Tavita: a sa tui ko Epiya na luvena, me kenai sosomi.