II. A Veika Sa Caka E Na Veigauna 11 - AI VOLA TABU（FIJ1864）

Sa vakaukauwataka na nona matanitu ko Riapiami.

1IA ni sa yaco ki Jerusalemi ko Riapiami, sa vakasoqoni vata, maivei ira na mataqali i Juta kei Penijamini, e oba vakatinikawalu na tamata digitaki era dauia nai valu me laʼki veivala kei ira na Isireli, me vakalesuya na matanitu kivei Riapiami.

2A sa lako mai na vosa i Jiova vei Simaya na tamata ni Kalou, ka kaya,

3Mo vosa vei Riapiami, na luve i Solomoni, na tui Juta, kei ira kecega na Isireli mai Juta kei Penijamini, ka kaya,

4Sa vosa vakaoqo ke Jiova, Dou kakua ni lako cake, se veivala kei ira na wekamudou; dou lesu yani na tamata yadua ki na nona vale; ni sai au na vu ni ka o qo. A ra sa vakarorogo ki na vosa i Jiova, ka lesu me kua ni laʼki vala kei Yaropiami.

5A sa tiko mai Jerusalemi ko Riapiami, a sa tara e so na koro ni valu mai Juta.

6A sa tarai Peci-leema ko koya, kei Etami, kei Tikoa,

7kei Peci-suri, kei Soko, kei Etulami,

8kei Kaca, kei Maresa, kei Sifi,

9kei Etorayimi, kei Lakisi, kei Aseka,

10kei Sora, kei Eiyaloni, kei Epironi, sa Veikoro vakabai sa tu mai Juta kei Penijamini.

11A sa vakaukauwataka ko koya na Veikoro vakabai, a sa vakatikora kina e so na turaga ni valu, kei na kakana sa bini tu, kei na waiwai, kei na waini:

12ia ki na koro yadua nai sasabai kei na moto, ka vakaukauwataka vakalevu, ni sa totaki koya ko Juta kei Penijamini.

13A sa lako yani vei koya mai na nodra veiyasana kecega ko ira na bete kei ira na Levi era sa tiko e Isireli taucoko.

14Ni ra a biuta na nodrai bili ni koro kei na nodrai votavota ko ira na Levi, ka lako ki Juta kei Jerusalemi: (ni sa biuti ira tani ko Yaropiami kei iratou na luvena, me ra kakua ni bete vei Jiova:

15ka sa bulia vei koya na bete e so ki na veitikina cecere, kei ira na tevoro, kei rau na luve ni karavau ka cakava ko koya.)

16A sa muri ira, mai na nodra veiyavusa kecega na Isireli, ko ira sa dodonu na lomadra me vakasaqarai Jiova na nodra Kalou na Isireli, era sa lako mai ki Jerusalemi, me cabocabo vei Jiova na nodra Kalou na nodra qase.

17A ra sa vakaukauwataka na matanitu i Juta, ka sa vakaukauwataki Riapiami na luve i Solomoni, ka yabaki tolu: ni sa tolu na yabaki era sa muria nai valavala i Tavita kei Solomoni.

18Ia ko Riapiami sa kauti Meelaci na luve i Yirimoci na luve i Tavita me watina; kei Epieyili na luve i Iliapi na luve i Isei,

19o koya sa vakasucuma na gone e so vei koya: o Yiusi, kei Samariya, kei Seami.

20Ia emuri sa kauti Meeka na luve i Episalomi; a sa vakasucumi Epiya, kei Atai, kei Sisa, kei Silomici.

21A sa levu na loloma i Riapiami kivei Meeka na luve i Episalomi, ka lailai vei ira kecega na watina kei ira na watina lalai: (ni sa kauta ko koya e lewe tinikawalu na watina, ka onosagavulu na watina lalai: ka vakasikava e lewe ruasagavulu ka walu na goneatagane, ka onosagavulu na gonealewa).

22A sa lesi Epiya na luve i Meeka ko Riapiami me turaga, me lewa vei ira na tacina: ni sa vaka me buli koya me tui.

23A sa valavala vakavuku ko koya, ka sa vakatikori ira na luvena kecega me ra dui tiko e na veivanua kecega i Juta kei Penijamini, ki na koro vakabai kecega: a sa solia tiko na magiti vei ira, na ka levu. A sa gadreva ko koya me lewe vuqa na watina.