II. A Veika Sa Caka E Na Veigauna 10 - AI VOLA TABU（FIJ1864）

Sa buli me tui ko Riapiami; a sa valavala vakaukauwa ko koya, ka bese kina ni vakarogoci koya na yavusa e tini.

1A SA lako ki Sikemi ko Riapiami: ni ra sa lako ko ira kecega na Isireli ki Sikemi me buli koya me tui.

2Ia ni sa rogoca ko Yaropiami na luve i Nipati, ni sa tikoga mai Ijipita, (ni sa dro eliu mai na mata i Solomoni na tui, a sa lesu mai Ijipita ko Yaropiami;

3a ra sa talaki me kacivi koya mai;) era sa qai lako, ko Yaropiami kei ira kecega na Isireli, ka vosa vei Riapiami, ka kaya,

4O tamamu sa vakabibitaka na neimami vua; ia o qo, mo vakamamadataka na cakacaka rarawa i tamamu, kei nai vua bibi sa tauca vei keimami ko koya; keimami na qai qaravi iko.

5A sa kaya vei ira ko koya, Dou lako madani ka bogi tolu, dou qai lako tale mai vei au. A ra sa lako tani na tamata.

6A sa bose vata ko Riapiami na tui, kei ira na qase ka tu e na mata i Solomoni na tamana ni sa bula tiko ko koya, a sa kaya ko koya, Dou sa lewa meʼu vosa tale vakaevei vei ira na tamata o qo?

7A ra sa vosa vua, ka kaya, Kevaka ko na yalololoma vei ira na tamata o qo, ka vinakati ira, ka vosataka vei ira na vosa vinaka, era na qai qaravi iko ka tawa mudu.

8A sa biuta ko koya na nodra lewa na qase, na ka era sa lewa vua, ka bose vata kei ira na cauravou era cadra kaya, era dautu e matana:

9a sa kaya vei ira ko koya, A cava dou sa lewa me da vosataka vei ira na tamata o qo, ko ira ka vosa mai vei au, ka kaya, Mo vakamamadataka nai vua ka tauca vei keimami ko tamamu?

10A ra sa vosa vua na cauravou era cadra kaya, ka kaya, Mo vosa vakaoqo vei ira na tamata era a vosa vei iko, ka kaya, Sa vakabibitaka na neimami vua ko tamamu, ia mo vakamamadataka vei keimami; mo vosa vakaoqo vei ira, A noqui qaqalo lailai ena vavaku, ka mamare na tolo i tamaqu:

11ia o qo, sa bibi nai vua sa virikotora vei kemudou ko tamaqu, ia kaʼu na vakaikuritaka na nomudoui vua: sa vakanakuitataki kemudou ko tamaqu e na veidali, ia koi au e na kuita sa buki.

12A ra sa tale mai ko Yaropiami kei ira kecega na tamata kivei Riapiami e na kenai katolu ni siga, me vaka ka kaya eliu na tui, ni sa kaya, Dou lako tale mai vei au e nai katolu ni siga.

13A sa vosa vakaukauwa ko na tui vei ira, ka biuta na nodra lewa na qase ko Riapiami na tui,

14ka vosa vei ira me vaka na nodra lewa na cauravou, ka vaka, Sa vakabibitaka na nomudoui vua ko tamaqu, ia kaʼu na vakaikuritaka: sa vakanakuitataki kemudou ko tamaqu e na veidali, ia koi au e na kuita sa buki.

15A sa sega ni vakarorogo na tui vei ira na tamata; ni sa mai vua na Kalou na ka, me vakayacora na nona vosa ka vosataka ko Jiova e na gusu i Eiiya, na kai Silo, kivei Yaropiami na luve i Nipati.

16Ia ni sa raica ko ira kecega na Isireli ni sa sega ni rogoci ira ko na tui, era sa qai vosa vua na tui ko ira na tamata, ka kaya, Keimami sai votavota vata vakaevei kei Tavita? ka sa sega na neimami votavota vata kei koya na luve i Isei: dou yadua ki na nomudou vale, oi kemudou na Isireli! o qo, mo qarauna na nomu vale, i Tavita. A ra sa lako kecega na Isireli ki na nodra veivale.

17Ia ko ira na luve i Isireli era tiko e na veikoro i Juta, sa turaga vei ira ko Riapiami.

18A sa talai Atorami ko Riapiami na tui, o koya ka lewa nai vakacavacava: a sa viriki koya e na vatu ko ira na luve i Isireli, a sa mate ko koya. A sa kusarawa kina ko Riapiami na tui me vodoka na nona vale-vodoki, me dro ki Jerusalemi.

19A sa talaidredre kina ko ira na Isireli ki na mataqali i Tavita, ka yacova na siga o qo.