II. A Veika Sa Caka E Na Veigauna 9 - AI VOLA TABU（FIJ1864）

Sa lako na radi ni Sipa me raici Solomoni, 1-12. Sa levu na nona koula, kei na yau tani, 13-28. Na nona mate, 28-31.

1IA ni sa rogoca ko na radi ni Sipa nai rogo kei Solomoni, sa lako me vakatovolei Solomoni mai Jerusalemi, o na vosa vakaibalebale vuni; a sa vata kaya na lewe-ni-sala lewe vuqa sara, kei na kameli e so era kauta na ka boi vinaka, kei na koula na ka levu sara, kei na vatu talei: ia ni sa yaco ko koya vei Solomoni, sa veivosaki kaya e na ka kecega sa tu e lomana.

2A sa tukuna vua ko Solomoni na ka kecega sa taroga ko koya: a sa sega e dua na ka sa vuni vei Solomoni, me sega ni tukuna vua ko koya.

3Ia ni sa raica oti ko na radi ni Sipa na vuku i Solomoni, kei na vale sa tara oti ko koya,

4kei na kakana ki na nonai kanakana, kei na nodra tiko na nonai talatala, kei na nodra tu era sa qaravi koya, kei na nodrai sulu, kei ira era daukauta na mena, kei na nodrai sulu, kei na nonai cabecabe sa cabe kina ko koya ki na vale i Jiova; sa yali na nona lomadei.

5A sa kaya ko koya vua na tui, Sai rogorogo dina kaʼu a rogoca e na noqu vanua, e na vuku ni nomui valavala kei na nomu vuku:

6ia kaʼu a sega ga ni vakadinata na nodra vosa, kaʼu a qai lako mai, ka sa raica ko na mataqu; ka, raica, sa ka lailai sa tukuni vei au e na kena levu ni nomu vuku, ka levu na ka sa tawa tukuni: ko sa uasivia cake na ka kaʼu a rogoca.

7Sa kalougata ko ira na nomu tamata, a sa kalougata ko ira o qo era dauqaravi iko, era sa tu e matamu e na veisiga, ka rogoca na nomu vuku.

8Me vakarokorokotaki ko Jiova na nomu Kalou, o koya sa vinakati iko, ka vakatikori iko e na nonai tikotiko vakaturaga, mo tui kivei Jiova na nomu Kalou: e na vuku ni sa lomani ira na Isireli na nomu Kalou, me vakataudeitaki ira ka tawa mudu, sa lesi iko kina me tui vei ira, me ia na lewa kei na ka e dodonu.

9A sa solia ko koya vua na tui e dua na drau ka ruasagavulu na taledi koula, kei na ka boi vinaka na ka levu sara, kei na vatu talei e so: a sa sega tale na ka boi vinaka me vaka o qori ka solia ko na radi ni Sipa kivei Solomoni na tui.

10Ia ko ira na tamata i Urami, kei ira na tamata i Solomoni, ko ira ka kauta mai na koula mai Oferi, era sa kauta na kau talei e so, ka so na vatu talei.

11A sa cakava ko na tui e na kau talei nai tautauri ni cabecabe ki na vale, i Jiova kei na vale ni tui, na veiapi talega kei na veiqiriqiri vei ira na dau-ni-meke: a sa sega me tauvata kaya sa raici eliu e na vanua ko Juta.

12A sa solia vua na radi ni Sipa ko Solomoni na tui na ka kecega sa gadreva ko koya, na ka kecega sa kerea, mei kuri ni tala ni yau sa kauta mai ko koya vua na tui. A sa lesu ko koya, ka lako ki na nona vanua, ko koya kei ira era qaravi koya.

13Ia na kena bibi na koula sa kauti vei Solomoni e na yabaki e dua, sa ono na drau ka onosagavulu ka ono na taledi koula,

14me kuria o qori sa kauta ko ira na tamata dauveilakoyaki kei ira na tamata dauveivoli. A sa daukauta mai vei Solomoni ko ira na tui Arapia kecega, kei ira na tamata sa lewa na vanua, na koula kei na siliva.

15A sa cakava ko Solomoni na tui e rua na drau nai sasabai e na koula sa tukituki: sa caka e dua nai sasabai e na koula sa tukituki e ono na drau na sikeli:

16kei nai sasabai lalai e tolu na drau e na koula sa tukituki; sa caka e dua nai sasabai e na koula e tolu na drau na sikeli: a sa virikotora ko na tui ki na vale ni veikau ni Lipanoni.

17A sa cakava e na tabua ko na tui e dua nai tikotiko vakaturaga sa ka levu, ka botana e na koula dina.

18A sa ono nai cabecabe ni tikotiko vakaturaga, kei nai tutu-ni-yava koula, a ya sa vakadeina ki nai tikotiko vakaturaga: a sa vakaisobesobe na kena yasa ruarua e na tikina sa tokori, a sa rua na laioni sa tu voleka ki nai sobesobe:

19a sa tinikarua na laioni sa tu maikea, e na yasa e dua kei na yasa kadua e nai cabecabe e ono. Sa sega na ka e vakakina sa caka e na dua na matanitu.

20A sa koula kecega na bilo ni gunu i Solomoni na tui, a sa koula talei kecega na bilo mai na vale ni veikau ni Lipanoni; sa sega e dua sa siliva: sa sega ni taleitaki e na gauna i Solomoni:

21ni sa lako ki Tarisisi na nona veiwaqa na tui, kei ira nai talatala i Urami: sa dautale vakadua mai e na yabaki e tolu na veiwaqa ni Tarisisi, ka usana mai na koula, kei na siliva, na tabua, ka so na geli, ka so na pikoko.

22A sa uasivi cake ko Solomoni na tui vei ira kecega na tui kei vuravura e na yau kei na vuku.

23A sa qarai Solomoni ko ira kecega na tui kei vuravura, me rogoca na nona vuku sa solia ki na yalona ko na Kalou.

24A ra sa kauta yadua na tamata na nonai loloma, e so nai yaya siliva, ka so nai yaya koula, ka so nai sulu, e so nai sulu ni valu, kei na ka boi vinaka, e so na ose, ka so na asa, na kenai tavi e na veiyabaki.

25A sa nei Solomoni e udolu vakava nai tutu ni ose kei na veivale-vodoki, ka tinikarua na udolu na tamata dauvodo e na ose, a sa vakatikori ira e na veikoro ni veivale-vodoki, se vata kaya na tui mai Jerusalemi.

26A sa lewai ira na tui kecega ko koya mai na Uciwai ka yaco ki na nodra vanua na kai Filisitia, ka yaco ki nai yalayala kei Ijipita.

27A sa cakava ko na tui na siliva me vaka na vatu mai Jerusalemi, a sa cakava na kau sitari me vaka na kena vuqa na kau lolo sa tu e na vanua buca.

28A sa kauti tiko mai kivei Solomoni na ose e so mai Ijipita, mai na veivanua kece talega.

29Ia na vo ni cakacaka i Solomoni, a kedrai matai, kei na kedrai otioti, sa sega li ni volai e nai vola i Nacani na parofita, kei na parofisai i Eiiya na kai Silo, kei na raivotu i Ito na rairai, sa vosataki kina ko Yaropiami na luve i Nipati?

30A sa lewai ira kecega na Isireli ko Solomoni mai Jerusalemi ka yabaki vasagavulu.

31A sa moce vata kei ira na nona qase ko Solomoni, a sa buluti e na koro i Tavita na tamana: a sa tui ko Riapiami na luvena, me kenai sosomi.