II. A Veika Sa Caka E Na Veigauna 8 - AI VOLA TABU（FIJ1864）

Na vale kei na veikoro ka tara ko Solomoni, kei na veisoro ka daucabora ko koya.

1IA ni sa oti na yabaki e ruasagavulu, sa tara tiko kina ko Solomoni na vale i Jiova, kei na nona vale,

2sa qai tara ko Solomoni na veikoro sa vakasuka ko Urami kivei Solomoni, a sa vakatikori ira kina na luve i Isireli.

3A sa lako ki Emaci-sopa ko Solomoni, ka sa rawa.

4A sa tarai Tatimori mai na lekutu, kei na veikoro ni yau, a ya sa tara ko koya mai Emaci.

5A sa tarai Peci-oroni maicake, kei Peci-oroni maira, sa rau koro ni valu, sa vakabai, sa vakamatamata-ni-koro, ka vakaisamugakagaka;

6kei Pealaci, kei na Veikoro kecega ni yau i Solomoni, kei na veikoro kecega ni vale-vodoki, kei na veikoro ni tamata dauvodo e na ose, kei na ka kecega sa via tara ko Solomoni mai Jerusalemi, kei Lipanoni, kei na veivanua kecega ni nona matanitu.

7Ko ira kecega na tamata sa vo maivei ira na luve i Eci, kei ira na luve i Amori, kei ira e na veikoro lalai, kei ira na luve i Evi, kei ira na kai Jepusa, era sa sega ni luve i Isireli,

8ia na luvedra sa vo me taravi ira e na vanua, ko ira ka ra a sega ni vakarusa ko ira na luve i Isireli, vei ira o qori sa lesia ko Solomoni nai vakacavacava, ka yacova na siga o qo.

9A sa sega ni vakasaurarataka e dua vei ira na luve i Isireli ko Solomoni, me ra nona tamata daucakacaka; ia era sa tamatai valu, a ra sa liu vei ira na nona turaga ni valu, ka turaga ni nona veivale-vodoki kei ira na nona tamata dauvodo e na ose.

10Ia ko ira o qo era sa liu vei ira na turaga i Solomoni na tui, era sa rua na drau ka limasagavulu era sa lewai ira na tamata.

11A sa kauta ko Solomoni na luvena alewa ko Fero mai na koro i Tavita, ki na vale sa tara oti me nona: ni sa kava, Mekakua mada ni tiko na watiqu e na vale i Tavita na tui Isireli, e na vuku ni sa tabu, ni sa yaco oti kina na kato i Jiova.

12Sa qai cabora ko Solomoni na veisoro kama kivei Jiova e dela ni cabocabo-ni-soro i Jiova, a ya sa cakava ko koya e na mata ni virada,

13ia me vaka sa rauta na siga yadua, sa cabori tiko me vaka nai vakaro i Mosese, e na veisiga ni vakacecegu, kei na veivula vou, kei na veisolevu sa lokuci, sa vakatolu e na yabaki, io, e na Solevu ni madrai tawa vakaleveni, kei na solevu ni veiwiki, kei na solevu ni veivale taba-ni-kau.

14A sa lesia ko koya na vei mata bete ki na nodra cakacaka, me vaka sa rotaka ko Tavita na tamana, kei ira na Levi ki na nodrai tavi, me laga na meke ka veiqaravi e na matadra na bete, me vaka sa rauta na siga yadua: o ira talega nai vakatawa ni katuba e na nodra veimata, ki na matamata-ni-koro kecega: ni sa vakarota vakaoqo ko Tavita na tamata ni Kalou.

15A ra sega ni biuta e dua nai vakaro ni tui vei ira na bete kei ira na Levi e na vuku ni veika, se e na vuku ni yau.

16A sa cokonaki oti na cakacaka i Solomoni ki na siga sa tauyavutaki kina na vale i Jiova, ka yacova na siga sa oti kina. Sa vakaoti vakavinaka na vale i Jiova.

17Sa qai lako ko Solomoni ki Esioni-keperi, kei Eloci, mai na matasawa e na vanua ko Itomi.

18A sa tala ko Urami na nona tamata e so, me ra kauta na waqa e so vei koya, e so talega nai talatala era gonedau; a ra sa lako vata kei ira na tamata i Solomoni ki Oferi, ka ra kauta maikea na koula e va na drau ka limasagavulu na taledi, ka kauta vei Solomoni na tui.