II. A Veika Sa Caka E Na Veigauna 7 - AI VOLA TABU（FIJ1864）

Sa vakatakila ko na Kalou na nona vakarogoca na masu i Solomoni.

1IA ni sa vakaotia ko Solomoni na nona masumasu, sa lutu sobu mai lomalagi na buka waqa, a sa kania nai soro kama kei nai madrali; a sa vakasinaita na vale nai ukuuku i Jiova.

2A sa sega ni curu rawa ko ira na bete ki na vale i Jiova, e na vuku ni sa vakasinaita na vale i Jiova nai ukuuku i Jiova.

3Ia ni sa raica ko ira kecega na luve i Isireli ni sa lako sobu na buka waqa, kei nai ukuuku i Jiova, e na dela ni vale, era sa bale vakatobocu ki na soso, e na rara vatuvatu, a ra sa soro, ka vakavinavinaka kivei Jiova, ka vaka, Sa vinaka ko koya; ni sa tawa mudu na nona loloma.

4Sa qai cabora nai soro ko na tui kei ira kecega na tamata, e na mata i Jiova.

5A sa cabora ko Solomoni na tui nai soro, e rua na oba ka rua na udolu na karavau, ka tinikarua na oba na sipi. A sa vakatu-buya na vale ni Kalou ko na tui kei ira kecega na tamata.

6A sa kitaka na nodrai tavi ko ira na bete: o ira talega na Levi era sa tara na veibitu-ni-vakatagi i Jiova, a ya sa cakava ko Tavita na tui me ia kina na vakavinavinaka kivei Jiova, ni sa vakarokoroko ko Tavita e na gusudra, e na vuku ni sa tawa mudu na nona loloma: a ra sa uvu davui e matadra ko ira na bete, ka sa wavu tu ko ira kecega na Isireli.

7Sa vakatabuya talega ko Solomoni na lomanibai e na mata ni vale i Jiova: ni sa cabora maikea ko koya na veisoro kama, kei na uro ni veisoro e na veivinakati, e na vuku ni sa lailai nai cabocabo-ni-soro parasa sa cakava ko Solomoni, me cabori kina nai soro kama, kei nai madrali laukana, kei na uro.

8Ia, e na gauna ko ya, sa kitaka na solevu ko Solomoni, kei ira vata kaya na Isireli kecega, ka vitu na kena bogi, nai soqosoqo levu sara, sa vakatekivu mai nai curucuru ki Emaci ka yacova na uciwai ni Ijipita.

9Ia, e na kenai kawalu ni siga, era sa cakava nai soqosoqo tabu: ni sa bogi vitu na nodra vakatabuya nai cabocabo-ni-soro, ka bogi vitu na solevu.

10Ia e na kenai karuasagavulu ka tolu ni siga e nai kavitu ni vula, sa talai ira yani na tamata ko koya ki na nodra veivale, era sa reki ka marau e na yalodra, e na vuku ni ka vinaka sa cakava ko Jiova kivei Tavita, kei Solomoni, kei ira na Isireli na nona tamata.

11A sa tara vakaotia ko Solomoni na vale i Jiova, kei na vale ni tui: kei na ka kecega sa gadreva ko Solomoni me cakava e na vale i Jiova, kei na nona vale, sa vakayacora vakavinaka.

12A SA rairai ko Jiova vei Solomoni e na bogi, a sa kaya vua, Au sa rogoca oti na nomu masu, ia kaʼu sa digitaka na tikina o qo me noqu me vale me ia kina nai soro.

13Kevaka kau sa sogoti lomalagi ka sega kina na uca, seʼu rotaka na vodre me kania na vanua, seʼu tala na mate levu ki na kedra maliwa na noqu tamata;

14kevaka era sa vakamalumalumutaki ira ko ira na noqu tamata era sa vakatokai e na yacaqu, ka masu, ka qara na mataqu, ka lesu mai na nodrai valavala ca; au na qai vakarorogo mai lomalagi, ka sega ni cudruvaka na nodrai valavala ca, ia kaʼu na vakabula na nodra vanua.

15Ena yadra tiko na mataqu, ka qara tu na daligaqu ki na masu sa caka e na tikina o qo:

16ia o qo, au sa digitaka ka vakatabuya na vale o qo, me tiko kina na yacaqu ka tawa mudu: ia ena tiko dei kina na mataqu kei na lomaqu.

17Ia ko iko, kevaka ko na lako e mataqu, me vaka sa lako voli ko Tavita na tamamu, ka ko na kitaka na ka kecega me vaka na noqu vosa kecega vei iko, ka vakabauta na noqu veilesilesi kei na noqu lelewa;

18au na qai vakataudeitaka nai tikotiko vakaturaga ni nomu matanitu, me vaka na veiyalayalati au a kitaka kei Tavita na tamamu, niʼu a kaya, Ena sega ni mudu vei iko na tamata me nodra tui na Isireli.

19Ia kevaka dou sa lesu tani, ka biuta na noqu veilesilesi, kei na noqu veivunau, a ya kaʼu sa tauca e na matamudou, ka dou sa lako ka qarava na veikalou tani, ka soro vei ira;

20au na qai cavuivuvutaki ira mai na vanua au a solia vei ira; ia na vale o qo, a ya kaʼu sa vakatabuya oti ki na yacaqu, au na biuta tani e mataqu, ia kaʼu na kitaka me vakaibole kei na vosa ni veisiusiu-taki e na veimatanitu kecega.

21Ia na vale o qo, sa cecere tu, ena ka vakurabui ki na tamata yadua e lako voleka kina; ena kaya kina ko koya, E na vuku ni cava beka e kitaka vakaoqo kina ko Jiova ki na vanua o qo, kei na vale o qo?

22Ia ena qai kainaki, E na vuku ni ra a biuti Jiova na nodra Kalou na nodra qase, o koya ka kauti ira yani mai na vanua ko Ijipita, ka ra a taura na kalou tani e so, ka sorova, ka qarava: e na vuku ni ka o qo sa vakayacora kina vei ira ko koya na ca kecega o qo.