1SA qai kaya ko Solomoni, Sa kaya ko Jiova ni na tiko ko koya e na butobuto loaloa:
2ia kaʼu sa tara e dua na vale mo tiko kina, io, e dua na tikina mo tiko tawa mudu kina.
3A sa vagolea na matana na tui, ka vosavakalougatataki ira kecega na nodrai soqosoqo na Isireli: (a ra sa wavu tu na nodrai soqosoqo taucoko na Isireli:)
4a sa kaya ko koya, Me vakarokorokotaki ko Jiova na nodra Kalou na Isireli, o koya ka vosa e na gusuna vei Tavita na tamaqu, a sa vakayacora e na ligana, ka vaka,
5Mai na siga kaʼu a kauti ira tani kina na noqu tamata mai na vanua ko Ijipita, au a sega ni digitaka e dua na koro e na nodra yavusa kecega na Isireli me tara kina e dua na vale, me tiko maikea na yacaqu; ia kaʼu a sega ni digitaka e dua na tamata me turaga vei ira na noqu tamata na Isireli:
6ia kaʼu sa digitaki Jerusalemi me tu maikea na yacaqu; ia kaʼu sa digitaki Tavita me turaga vei ira na noqu tamata na Isireli.
7A sa tu e na loma i Tavita na tamaqu me tara e dua na vale ki na yaca i Jiova na nodra Kalou na Isireli.
8A sa kaya ko Jiova vei Tavita na tamaqu, E na vuku ni sa tu e lomamu me tara e dua na vale ki na yacaqu, sa vinaka vei iko ni ka tu e lomamu:
9ia ko na sega ni tara na vale; a luvemu ga, o koya ka lako mai na tolomu, ena tara ko koya na vale ki na yacaqu.
10A sa vakataudeitaka ko Jiova na nona vosa ka vosataka ko koya, niʼu sa tubu cake nai sosomi kei Tavita na tamaqu, ia kaʼu sa tiko e nai tikotiko vakaturaga nei Isireli, me vaka ka yalataka ko Jiova, ia kaʼu sa tara oti na vale ki na yaca i Jiova na nodra Kalou na Isireli.
11Ia kaʼu sa tokara kina na kato, sa tu kina na veiyalayalati i Jiova, a ya sa cakava ko koya kei ira na luve i Isireli.
12A sa tu ko koya e na mata ni cabocabo-ni-soro i Jiova e matadra na nodrai soqosoqo taucoko na Isireli, a sa dodoka yani na ligana ruarua:
13ni sa cakava oti ko Solomoni e dua nai tutu parasa, sa tini na caga na kena balavu, ka tini na caga na kena raraba, ka ono na caga na kena cecere, a sa vakatikora e loma ni rara vakabai: a sa tu ko koya e delana, ka vakatekiduru sobu e na duruna e na matadra nai vavakoso taucoko na Isireli, a sa dodoka yani na ligana ruarua kivaka ki lomalagi:
14a sa kaya,
I Jiova na nodra Kalou na Isireli, sa sega na Kalou me tauvata kei iko, mai lomalagi, se dela i vuravura, ni ko sa vakabauta tiko na veiyalayalati kei na loloma vei ira na nomu tamata era lako voli e matamu mai na vu ni yalodra taucoko:
15o sa vakabauta na ka ko a yalataka vua na nomu tamata ko Tavita na tamaqu: ia ko a vosa e na gusumu, a sa vakayacora e na ligamu, me vaka e na siga o qo.
16Ia o qo, i Jiova na nodra Kalou na Isireli, mo vakabauta mada vua na nomu tamata ko Tavita na tamaqu na ka ko a yalataka vua, ni ko a kaya, Ena sega ni mudu vei iko na tamata me tiko e mataqu e nai tikotiko vakaturaga nei Isireli; kevaka ena qarauna na nodrai valavala ko ira na luvemu, me lako voli e na noqui vakaro me vaka ni ko a lako voli e mataqu.
17Ia; o qo, na nodra Kalou na Isireli, me vakadinadinataki mada na nomu vosa, ko a vosataka vua na nomu tamata ko Tavita.
18Ia ena tiko vakaidina li na Kalou vata kei ira na tamata e vuravura? raica, ko lomalagi, kei lomalagi ecake sara, sa sega ni ka ko sa yalani rawa kina; sa segai vakaidina na vale o qo kaʼu sa qai tara.
19Ia mo goleva ga, i Jiova na noqu Kalou, na vakamamasu ni nomu tamata, kei na noqu kerekere, mo rogoca kina na tagi kei na vakamamasu, sa masu kina e matamu na nomu tamata:
20me ya dia tu na matamu ki na vale o qo e na bogi kei na siga, ki na tikina ko a kaya kina, Ena tiko maikea na yacaqu; mo rogoca kina na masumasu sa kitaka na nomu tamata e na tikina o qo.
21Ia mo rogoca na kerekere ni nomu tamata, kei na nodra na nomu tamata na Isireli, ni ra na masumasu e na tikina o qo: mo rogoca mai lomalagi, na yasana ko sa tiko kina: ia ni ko sa rogoca, mo kakua ni cudru.
22Kevaka sa caka cala e dua na tamata vua na kai nona, a sa kitaka me vosavavakini, a sa kau mai na vosa vavakini ki na mata ni nomui cabocabo-ni-soro e na vale o qo:
23mo qai rogoca mai lomalagi, ka cakava, ka lewai ira na nomu tamata, ni ko saumi koya na caka cala, me tauca ki na uluna na nonai valavala; ka vakadonui koya sa caka dodonu, me solia vua me vaka na nonai valavala dodonu.
24Ia ni ia sa yaviti na nomu tamata na Isireli e na matadra na meca, e na vuku ni ra sa valavala ca vei iko, a ra sa saumaki, ka vakatusa na yacamu, ka vakamamasu ka kerekere vei iko e na vale o qo;
25mo qai rogoca mai lomalagi, ka kakua ni cudruvaka na nodrai valavala ca na nomu tamata na Isireli, ia mo vakalesui ira tale ki na vanua ko a solia kivei ira kei ira na nodra qase.
26Ni sa sogo ko lomalagi, ka sega kina na uca, e na vuku ni ra sa valavala ca vei iko; kevaka era na vakamamasu kivaka ki na tikina o qo, ka vakatusa na yacamu, ka saumaki mai na nodrai valavala ca, ni ko sa vakararawataki ira;
27mo qai rogoca mai lomalagi, ka kakua ni cudruvaka na nodrai valavala ca na nomu tamata, io, na nomu tamata na Isireli, ni ko sa vakavulici ira e na sala vinaka me ra lako kina; ka solia na uca ki ua nomu vanua, a ya ko ga solia vei ira na nomu tamata mei votavota.
28Kevaka sa yaco e na vanua na dausiga, kevaka sa dua na mate levu, kevaka sa tauvi mate levu na teitei, se malai levu, se so na vodre, se na nuve; kevaka sa buki na kedra druadrua ko ira na meca e na vanua ni nodra veikoro; kevaka sa dua na rarawa levu, se dua na mate;
29na masu kecega kei na kerekere kecega sa na cakava e dua na tamata, se ko ira kecega na nomu tamata na Isireli, ni sa kila na tamata yadua na kena ca ni lomana, a sa dodoka yani na ligana vaka ki na vale o qo;
30mo qai rogoca mai lomalagi, na yasana ko sa tiko kina, ia mo kakua ni cudru, ia mo solia vua na tamata yadua me vaka na nonai valavala kecega, ni ko sa kila na lomana; (ni ko sa kila, ko iko duaduaga, na lomadra kecega na luve ni tamata;)
31me ra rerevaki iko, ka lako e nomu sala, e na gauna kecega era na bula tiko kina e na vanua ko a solia vei ira na neimami qase eliu.
32Ia e na vuku ni kai tani, o koya sa sega ni kai vata kei ira na nomu tamata na Isireli, a sa lako mai na vanua vakayawa e na vuku ni yacamu sa levu, kei na ligamu kaukauwa, kei na ligamu sa dodo tu; kevaka era na lako mai ka masu e na vale o qo;
33mo qai rogoca mai lomalagi, na yasana ko sa tiko kina, ka mo cakava me vaka na ka kecega sa kaci kina vei iko ko ira na kai tani: me ra kila na yacamu ko ira kecega na kai vuravura, me rerevaki iko, me vakai ira na nomu tamata na Isireli; ia me ra kila ni sa vakatokai e na yacamu na vale o qo kaʼu sa tara.
34Kevaka era sa lako yani ko ira na nomu tamata me ra vala kei ira na nodra meca, e na sala kecega ko na talai ira kina, ka ra sa masu vei iko, kivaka ki na koro o qo ko a digitaka, kei na vale kaʼu sa tara oti ki na yacamu;
35mo qai rogoca mai lomalagi na nodra masumasu, kei na nodra kerekere, ka cakava na ka e dodonu vei ira.
36Kevaka era sa valavala ca vei iko, (ni sa sega na tamata e tawa valavala ca,) ka ko sa cudruvi ira, ka soli ira ki na meca, me ra kauti ira vakabobula ki na vanua ni meca, e yawa se voleka;
37ia kevaka era sa vakanananu e na vanua era a kauti vakabobula kina, ka veivutuni, ka masuti iko e na nodra vanua era a vakabobulataki ira, ka kaya, Keitou sa valavala ca, keitou sa caka vakatakelo, ka caka cala;
38a ra sa saumaki vei iko e na lomadra, taucoko, kei na vu ni yalodra taucoko, e na vanua era sa kau vakabobulataki kina, ka masumasu kivaka ki na nodra vanua ko a solia vei ira na nodra qase, na koro ko sa digitaka, kei na vale kaʼu sa tara oti ki na yacamu;
39mo qai rogoca mai lomalagi, na yasana ko sa tiko kina, na nodra masumasu, kei na nodra kerekere, ka cakava na ka e dodonu vei ira, ia mo kakua ni cudruvi ira na nomu tamata era sa valavala ca vei iko.
40Ia, i noqu Kalou, me yadra tu mada na matamu, ka qara tu na daligamu ki na masu sa ia e na tikina o qo.
41Ia o qo, mo cabe cake ki na nomui vakavakacegu, i Jiova na Kalou, o iko, kei na kato ni nomu kaukauwa: me ra vakaisulu e na bula ko ira na nomu bete, i Jiova na Kalou, ka me rekitaka na loloma ko ira na nomu tamata yalododonu.
42I Jiova na Kalou, mo kakua ni vakamaduataka na nomu lumuti: mo nanuma tiko na loloma kivei Tavita na nomu tamata.
Who We AreWhat We EelieveWhat We Do
2025 by iamachristian.org,Inc All rights reserved.
