II. A Veika Sa Caka E Na Veigauna 5 - AI VOLA TABU（FIJ1864）

A solevu ni vakacurumi na vale ni soro.

1A SA kitaki oti na cakacaka kecega ka cakava ko Solomoni ki na vale i Jiova. A sa kauta ki loma ko Solomoni na veika ka cabora ko Tavita na tamana: ia na siliva, kei na koula, kei nai yaya kecega, sa viritu vata kei na yau ni vale ni Kalou.

2SA qai vakasoqoni ira vata na nodra qase na Isireli ko Solomoni, kei ira kecega na turaga ni veiyavusa, ko ira sa liu vei ira na nodra qase na luve i Isireli, ki Jerusalemi, me ra kauta cake na kato ni veiyalayalati i Jiova mai na koro i Tavita, a ya ko Saioni.

3A ra sa soqoni vata vua na tui ko ira kecega na tamata Isireli, ki na solevu sa ia e nai kavitu ni vula.

4A ra sa lako kece mai na nodra qase na Isireli; a ra sa laveta cake na kato ko ira na luve i Levi.

5A ra sa kauta cake na kato, kei na vale gatu ni veitata, kei nai yaya tabu kecega ka tu e na vale gatu, a ra sa kauta cake ko ira na bete, ko ira na Levi.

6Ia ko Solomoni na tui, kei na nodrai soqosoqo taucoko na Isireli era soqoni vata vua, e na mata ni kato, era sa vakacabora tiko na sipi kei na karavau, sa sega ni tukuni rawa se wili, e na vuku ni kedra vuqa.

7A sa kauta ko ira na bete na kato ni veiyalayalati i Jiova ki na nona tikina, ki na loqi ni Vosa e na Vale, ki na tikina tabu sara, ki ruku ni tabadrau na Jerupi.

8Ni sa vakatetaba koi rau na Jerupi e na tikina sa tu kina na kato; a rau sa vaka-ruruga maicake na kato kei na kenai vua e rua koi rau na jerupi.

9A ra sa ucuna nai vua me raici rawa na mua ni vua, mai na kato e na mata ni loqi ni Vosa, a sa sega ni raici maitautuba: ka sa toka maikea ka yacova na siga o qo.

10Sa sega na ka eloma ni kato, na vatu raraba ga e rua ka viria kina ko Mosese mai Orepi, ni sa veiyalayalati ko Jiova kei ira na luve i Isireli, ni ra sa lako tani mai na vanua ko Ijipita.

11A sa yaco ni ra sa curu yani na bete mai na tikina tabu, (ni sa vakasavasavataki ko ira kecega na bete era sa tiko maikea; ko ira era sa sega ni cakacaka vaka-mata;

12o ira talega na Levi, ko ira na dausere, ko ira kecega maivei Asafi, maivei Emani, maivei Yitucuni, kei na nodra goneatagane, kei na wekadra, era sa vakaisulu e na malo matailalai, a ra sa taura na veiqiriqiri tani, kei na veiapi, era sa tu e na yasa ni veicabocabo-ni-soro sa donuya na cake, ka vata kei ira e dua na drau ka ruasagavulu na bete era sa uvu davui tiko:)

13ia ni sa vaka sa lewe dua ga ko ira sa uvu davui kei ira na dausere, me cakava na domo e dua ga, me rogo e na meke, ka vakavinavinaka vei Jiova; ia ni ra sa laveta cake vata na domodra kei na davui, kei na veiqiriqiri kei na veika domo vinaka, ka sa vakavinavinaka vei Jiova, ka vaka, E na vuku ni sa vinaka ko koya, ni sa tawa mudu na nona loloma; sa qai sinai na vale e na o, na vale i Jiova;

14a ra sa sega ni tu rawa na bete me kitaka na cakacaka, e na vuku ni o; ni sa vakasinaita na vale ni Kalou nai ukuuku i Jiova.