II. A Veika Sa Caka E Na Veigauna 4 - AI VOLA TABU（FIJ1864）

1A SA cakava e dua nai cabocabo-ni-soro parasa, sa vasagavulu na caga na kena balavu, ka vasagavulu na caga na kena raraba, ka ruasagavulu na caga na kena cecere.

2A sa cakava e na ka sa vakawaicalataki na sedre-wasawasa, e ruasagavulu na caga mai na batina e dua ki na batina kadua; sa momokiti e na veiyasana, a sa tini na caga na kena cecere: a sa voliti rawa e na wa sa onosagavulu na kena caga.

3A sa so nai vakatakarakara ni karavau e ruku, a ya sa volita na kena veiyasana, e ruasagavulu na caga, ka volita na sedre-wasawasa: sa vakawaicalataki na karavau me rua na yatu ni sa vakawaicalataki o qo.

4Sa tu e deladratou na karavau e tinikarua, e tolu sa mata ki na tokalau, ka tolu sa mata ki ra, ka tolu sa mata ki na ceva, ka tolu sa mata ki na tu i cake: a sa ecake e deladratrou na sedre-wasawasa, a sa tu yani kiloma na rubudratou kecega.

5Ia na kena vavaku sa tauvata kei na raraba ni liga, a sa cakavi na batina me vaka na bati ni bilo, e na se ni viavia; sa sova rawa kina na kaloni e rua na oba ka rua na udolu ka lima na drau.

6Sa cakava talega ko koya e tini na sedre; a sa viritura e lima e nai matau, ka lima e nai mawi, me deredere kina: na veika era sa vakacabora mei soro kama era sa derea kina; ia na sedre-wasawasa sa nodrai silisili na bete.

7A sa cakava ko koya e tini nai tutu-ni-cina koula, me vaka na kedrai vakatakarakara, ka viritura e na vale ni soro, e lima e nai matau, ka lima e nai mawi.

8Sa cakava talega ko koya e tini nai kanakana, ka vakatikora e na vale ni soro, e lima e nai matau, kalima e nai mawi. A sa cakava e dua na drau na bilo koula.

9Sa cakava talega ko koya na nodra rara vakabai na bete, kei na rara vakabai levu, kei na veisogo ni rara vakabai, a sa botona na kedra veisogo e na parasa.

10A sa viritura na sedre-wasawasa e na yasa i matau ni vale kivaka ki cake, ka donuya na ceva.

11A sa cakava na veisedre ko Urami, kei na veibilo me kau tani kina na dravu, kei na veibilo me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale ni Kalou:

12E rua na duru, kei nai ukuuku momokiti e na domodomo sa tu e na dela ni duru e rua; ka rua na ka sa caka vakalawa, me ubia nai ukuuku momokiti e rua e na domodomo sa tu e na deladrau na duru;

13kei nai ukuuku e va na drau e vaka na vua ni kau, ki na ka vakatawa e rua; e rua na yatu ukuuku e vaka na vua ni kau ki na dua na lawa, me ubia nai ukuuku momokiti e rua e na domodomo sa tu e na deladrau na duru;

14sa cakava talega na veitutu, a sa cakava na veisedre e na deladratou nai tutu;

15na sedre-wasawasa e dua, kei na karavau e tinikarua e rukuna;

16kei na veikuro, kei na veibilo me kau tani kina na dravu, kei na veiqila ni lewe ni manumanu: ia sa parasa sa solo vakavinaka nai yaya kecega o qori sa cakava ko Urami na tamana vei Solomoni na tui, ki na vale i Jiova.

17Sa cakava o qori na tui e na buca mai Joritani, e na vanua qele-ni-kuro, e na macawa i Sukoci kei Siretaca.

18A sa cakava nai yaya kecega o qo ko Solomoni, ka vuqa sara: ni sa sega ni qarai na kena bibi ni parasa.

19A sa cakava ko Solomoni nai yaya kecega sa tu e na vale ni Kalou: nai cabocabo koula talega, kei na veikanakana sa dautu kina na madrai dauraici,

20kei na veitutu-ni-cina koula dina, kei na nodra veicina me caudre me vaka na nodrai valavala, e na mata ni loqi ni Vosa,

21kei na se ni kau, kei na veicina, kei na veisaga-ni-buka, e na koula, io na koula talei;

22kei na veikoti-ni-cina, kei na veibilo me kau kina na dra me kureitaki, kei na veitaki, kei na veimiqa ni ka boi vinaka, e na koula dina; ia me curumi kina na vale, na kena veisogo eloma, ki na tikina tabu sara, kei nai sogo ni vale, a ya na vale ni soro, e na koula.