II. A Veika Sa Caka E Na Veigauna 3 - AI VOLA TABU（FIJ1864）

Sa tara na vale i Jiova ko Solomoni.

1SA qai vakatekivu ko Solomoni me tara na vale i Jiova mai Jerusalemi e na ulu-ni-vanua ko Moria, a yasana ka rairai kina ko Jiova kivei Tavita na tamana, e na tikina sa cokonaka oti ko Tavita, e na rara ni buturaki sila nei Orinani na kai Jepusa.

2A sa vakatekivu me tara e nai karua ni siga e nai karua ni vula, e na kenai kava ni yabaki ni nona lewa.

3Ia o qo na yavu sa tara kina ko Solomoni na vale ni Kalou: Na kena balavu e na caga me vaka nai vakarau eliu, sa caga e dua na drau ka ruasagavulu, ia na kena raraba na caga e vasagavulu.

4Ia na kena balavu ni virada e matana, sa tautauvata kei na raraba ni vale, sa vasagavulu na caga, ia na kena cecere sa rua na drau ka vasagavulu.

A sa botana ko koya eloma e na koula talei.

5A sa ubia na vale levu e na paini, a sa botana o qori e na koula talei, a sa ceuta kina na balabala kei na sinucodo.

6A sa vakaiukuukutaka na vale e na veivatu dredre ka matamatavinaka: ia na kena koula na koula ni Parivaimi.

7A sa ubia talega na vale, na veisoka, na veilago, kei na kena veilalaga, kei na kena veikatuba, e na koula; ka sa ceuta na jerupi e so ki na veilalaga.

8A sa cakava ko koya na vale tabu sara, na kena balavu sa tautauvata kei na raraba ni vale, e vasagavulu na caga, kei na kena raraba sa vasagavulu na caga: a sa botana o na koula talei, sa drau vakaono na taledi.

9Ia na bibi ni veivako sa limasagavulu na sikeli koula. A sa botana ko koya na veitiki-ni-vale ecake e na koula.

10A sa cakava e na vale tabu sara e rua na jerupi, sa ceuti, ka sa botana ruarua e na koula.

11Ia na kena balavu ni tabadrau na jerupi sa vasagavulu na caga; sa caga tini e dua na taba, a sa yaco ki na lalaga ni vale: kei na taba kadua sa tini na caga, a sa yacova na taba ni jerupi kadua.

12A sa caga tini na taba ni jerupi kadua, a sa yaco ki na lalaga ni vale: a sa caga tina na taba kadua, a sa sema vata kei na taba ni jerupi kadua.

13Sa tete tu na tabadrau na jerupi o qo ka vasagavulu na caga; a rau sa wavu tu e na yavadrau, a sa qara kiloma na matadrau.

14A sa cakava ko koya na gatu e na wa karakarawa, ka damudamu, ka rusivakula, kei na malo matailalai, a sa cakava kina na jerupi e so.

15A sa cakava ko koya e rua na duru e na mata ni vale, na kedrau cecere sa vitusagavulu na caga, ia na domodomo sa tu e deladrau sa tauyatini na caga.

16A sa cakava e so na sinucodo ki na loqi ni Vosa, ka vakarubeca e na ulu ni duru e rua; a sa cakava e dua na drau nai ukuuku e vaka na vua ni kau, a sa vakarubeca e na veisinucodo.

17A sa vakaduria cake na duru ruarua e na mata ni vale, e dua e nai matau kei na kenai karua e nai mawi; a sa vakatoka na yacana sa tu e nai matau, ko Yakini, kei na yacana sa tu e nai mawi, ko Poasi.