II. A Veika Sa Caka E Na Veigauna 2 - AI VOLA TABU（FIJ1864）

Sa vakarau ko Solomoni me tara na vale i Jiova; a sa talaki vei Urami na tui Teiri, me vukea.

1A SA lewa ko Solomoni me tara e dua na vale ki na yaca i Jiova, ka dua na vale ki na nona matanitu.

2A sa wilika ko Solomoni na oba vakavitu na tamata me colacola, ka walu na oba me ta kau e na ulu-ni-vanua, ka sa tolu na udolu ka ono na drau me vakaraici ira.

3A sa talaki ko Solomoni kivei Urami na tui Teiri, a sa kaya, Me vaka na ka ko a kitaka vei Tavita na tamaqu, ni ko sa kauta vei koya na sitari me tara kina na nona vale me tiko kina:

4raica, au sa tara e dua na vale ki na yaca i Jiova na noqu Kalou, me vakatabuya me nona, vakama e matana na ka boi vinaka, ki na madrai dauyatuni tiko talega, kei na veisoro kama vakamataka ka vakayakavi, e na veisiga ni vakacecegu, kei na veivula vou, kei na veisolevu tabu i Jiova na neimami Kalou. O qo kivei ira na Isireli, me tawa mudu.

5Ia na vale au na tara sa levu: ni sa levu na neimami Kalou, sa uasivi cake e na veikalou kecega.

6Ia, ko cei ena tara rawa na vale vei koya, ni sa sega ni ka sa yalani kina ko koya ko lomalagi, kei na lomalagi ecake sara? ia ko cei beka koi au meʼu tara e dua na vale mo nona, a ya ga me vakamai kina na ka boi vinaka e matana?

7Mo mai tala kina kivei au e dua na tamata e vuku, me cakacaka e na koula, kei na siliva, kei na parasa, kei na aironi, ka e na wa loaloa, ka rusivakula, ka karakarawa, ka vuku talega me ceuceu, vata kei ira na tamata vuku era sa vata kei au e Juta kei Jerusalemi, o ira sa vakarautaka ko Tavita na tamaqu.

8Me kau talega mai kivei au e so na kau sitari, na kau paini, kei na kau talei, mai Lipanoni: niʼu sa kila ni ra sa vuku na nomu tamata e na ta kau e Lipanoni: ka, raica, ena vata ko ira na noqu tamata kei ira na nomu tamata:

9io me ra cokonaka vakalevu vei au na kau: ni na levu vakurabui na vale au na tara.

10Ia, raica, au na solia kivei ira na nomu tamata, o ira sa dauta kau, e tinikaono na oba na puseli ni witi sa vutuki, ka tinikaono na oba na puseli ni parile, ka tinikalima na oba na kaloni ni waini, ka tinikalima na oba na kaloni ni waiwai.

11Sa qai kaya ko Urami na tui Teiri e nai vola, a ya sa kau kivei Solomoni, E na vuku ni sa lomani ira na nona tamata ko Jiova, sa buli iko ko koya mo nodra tui.

12Sa kaya talega ko Urami, Me vakavinavinakataki ko Jiova na nodra Kalou na Isireli, o koya ka cakava na lomalagi kei vuravura, o koya sa solia kivei Tavita na tui na gone vuku, sa tiko vua na yalomatua kei na kila ka, me tara rawa e dua na vale me nei Jiova, kei na vale ni nona matanitu.

13Ia, au sa qai tala yani e dua na tamata vuku i Urami na tamaqu, sa kila ka,

14a sa luvena e dua na alewa vei ira na gonealewa ni Tani, a sa kai Teiri ko tamana, e vuku me cakacaka e na koula, kei na siliva, e na parasa, e na aironi, e na vatu, kei na kau, e na wa damudamu, e na karakarawa, kei na malo matailalai, kei na damudamu: me ceuta talega na ceuceu kecega, ka me kila nai valavala vuku kecega ena vakaraitaki vei koya, vata kei ira na nomu tamata vuku, kei ira na nona tamata vuku na noqu turaga ko Tavita na tamamu.

15Ia o qo, na witi, kei na parile, na waiwai, kei na waini, a ya sa cavuta ko na noqu turaga, e vinaka me kau mai vei ira na nomu tamata;

16ia keimami na ta kau mai Lipanoni, me rauta na ka ena yaga vei iko: ia keimami na tuivutotaka vei iko e na Wasawasa ki Jafa; ia ena nomui tavi mo kauta cake ki Jerusalemi.

17A sa wiliki ira kecega na vulagi era sa tiko e na vanua nei Isireli ko Solomoni, me muria nai wiliwili sa wiliki ira kina ko Tavita na tamana; a ra sa kune me oba vakatinikalima, ka tolu na udolu ka ono na drau.

18A sa lesia e vitu na oba vei ira me daucolacola, ka oba vakaiwalu me ta kau e na ulu-ni-vanua, ka sa tolu na udolu ka ono na drau me vakaraica, me rotaka na tamata me ra cakacaka.