II. A Veika Sa Caka E Na Veigauna 1 - AI VOLA TABU（FIJ1864）

A WASE I. —Sa cabocabo ko Solomoni mai Kipioni, 1-6. Sa kerea ko Solomoni na vuku; a sa vinakata ko Jiova na nona masu, 7-13. Na yau kei na veivoli i Solomoni, 14-17.

1A SA vakaukauwataki e na nona matanitu ko Solomoni na luve i Tavita, a savata kaya ko Jiova na nona Kalou, ka vakalevulevui koya vakalevu.

2Sa qai vosa ko Solomoni kivei ira kecega na Isireli, vei ira na turaga ni veiudolu kei na veidrau, vei ira talega na dauveilewai, kei na nodra turaga kecega na Isireli taucoko, ko ira sa qase turaga.

3A sa lako ko Solomoni, ka vata kaya nai vavakoso taucoko, ki na tikina cecere mai Kipioni, ni sa tiko maikina na vale gatu ni veitata kei na Kalou, o qori ka cakava mai na lekutu ko Mosese nai talatala ni Kalou.

4Ia ka sa kauta mai Kiriaci-yiarimi na kato ni Kalou ko Tavita ki na yasana sa cokonaka ko Tavita me kena; ni sa viria ko koya na kena vale gatu mai Jerusalemi.

5Ia ka sa viritu ko koya e na mata ni vale-tikotiko i Jiova nai cabocabo-ni-soro parasa, o qori ka cakava ko Pisalieli na luve i Urai, na luve i Uri; a sa vakasaqaqara maikea ko Solomoni kei ira nai vavakoso.

6A sa lako cake kina ko Solomoni ki nai cabocabo-ni-soro parasa, e na mata i Jiova, a ya sa tu mai na vale gatu ni veitata, ka vakacabora e delana e dua na udolu nai soro kama.

7E na bogi ko ya sa rairai na Kalou kivei Solomoni, a sa kaya vua, Mo kerea na ka meʼu solia vei iko.

8A sa kaya ko Solomoni ki na Kalou, Sa levu na loloma ko a ia vei Tavita na tamaqu, a sa cakavi au meʼu tui me kenai sosomi.

9Ia, i Jiova na Kalou, me vakataudeitaki na nomu vosa kivei Tavita na tamaqu: ni ko sa cakavi au meʼu tui vei ira na tamata era sa lewe vuqa me vaka na kuvu ni soso.

10Mo solia mai kivei au na vuku kei na yalomatua, meʼu curu yani ka curu tale mai e na matadra na tamata o qo: ni sa rawarawa vei cei me lewai ira na nomu tamata o qo era sa lewe vuqa?

11A sa kaya na Kalou kivei Solomoni, E na vuku ni sa tiko e lomamu na ka o qo, ia ko sa sega ni kerea na yau, na kamunaga, se na vakarokoroko, se na nodra mate na nomu meca, ko sa sega talega ni kerea na bula balavu; ia ko sa kerea ga me nomu na vuku kei na yalomatua, mo lewai ira kina na noqu tamata, ko ira kaʼu sa lesi iko kina mo nodra tui:

12sa soli vei iko na vuku kei na yalomatua; kaʼu na solia vei iko na yau talega, kei na kamunaga, kei na vakarokoroko, sa sega e dua na tui sa bula eliu vei iko me sa rawata vakakina, ena sega talega ni vakakina e dua sa muri iko.

13Sa qai lesu tale mai ko Solomoni, mai na tikina cecere mai Kipioni ki Jerusalemi, mai na mata ni vale gatu ni veitata, ka sa lewai ira na Isireli.

14A SA vakasoqona vata ko Solomoni na veivale-vodoki, kei ira era sa dauvodo e na ose: ka sa dua na udolu ka va na drau na nona vale-vodoki, ka sa udolu vakatinikarua ko ira sa dauvodo e na ose, o ira ka vakatikora ko koya e na Veikoro ni vale-vodoki, ka so me tiko kei koya na tui mai Jerusalemi.

15A sa cakava ko na tui na siliva kei na koula mai Jerusalemi, me vaka na vatu, ka cakava na kau sitari me vaka na kena vuqa na kau lolo e na buca.

16A sa kauti tiko mai kivei Solomoni na ose e so mai Ijipita, io nai soqosoqo: sa vakauta nai soqosoqo ko ira na nona dauveivoli na tui, e na kedrai voli.

17A ra sa lako ka kauta e dua na vale-vodoki mai Ijipita, a sa kenai voli e ono na drau na siliva, a sa kenai voli e dua na ose e dua na drau ka limasagavulu: a sa vakakina ni ra sa kauta mai vei ira kecega na nodra tui na luve i Eci, vei ira talega na tui Siria.