I. A Veika Sa Caka E Na Veigauna 29 - AI VOLA TABU（FIJ1864）

A ka sa solia ko Tavita me tara kina na vale ni soro, 1-5. A ka sa solia ko ira na turaga kei ira na tamata, 6-9. Sa vakavinavinaka Ia masu ko Tavita, 10-21. Sa tui ko Solomoni, 22-25. Sa mate ko Tarita, 26-30.

1SA kaya talega ko Tavita na tui vei ira kece nai vavakoso. Ko Solomoni na luvequ, o koya duaduaga sa digia ko na Kalou, sa gone ga ka malumalumu, ka sa ka levu na cakacaka: ni sa sega ni nona na tamata na vale levu o qo sa nei Jiova ga na Kalou.

2Ia kaʼu sa cokonaka e na noqu kaukauwa kece, ki na nona vale na noqu Kalou, na kena koula ni ka koula, kei na kena siliva ni ka siliva, kei na kena parasa ni ka parasa, na kena kaukamea ni ka kaukamea, kei na kau ni ka kau; na vatu onikisa, kei na vatu me vono, na vatu lumilumisa ka veivolavolai, kei na vatu talei kece, kei na vatu vulavula, na ka levu.

3Ia niʼu a lomana vakalevu na vale ni noqu Kalou, na yau sa noqu vakadodonu, na koula kei na siliva, au sa solia ki na vale ni Kalou, mei kuri ni ka kecega au sa cokonaka oti me yaga e na vale tabu,

4io sa udolu vakatolu na taledi koula, na koula mai Oferi, a sa udolu vakavitu na taledi siliva dina, me botana kina na veilalaga ni vale:

5na koula ni ka koula, kei na siliva ni ka siliva, kei na cakacaka kecega ni ligadra na matai. Ia ko cei sa vinakata me solia na nona cakacaka e na siga edaidai kivei Jiova?

6Sa qai solia vakayalovinaka ko ira na turaga qase, kei ira na turaga ni nodra veiyavusa na Isireli, kei ira na turaga ni veiudolu kei na veidrau, kei ira sa lewa na nona cakacaka na tui:

7a ra sa solia, ki na cakacaka ni vale ni Kalou, na koula sa udolu vakalima na taledi kei na tikina tani e dua na oba, kei na siliva sa udolu vakatini na taledi, kei na parasa sa udolu vakatinikawalu na taledi, kei na kaukamea sa udolu vakadrau na taledi.

8Ia ko ira sa nodra na vatu dredre e so, era sa solia ki na liga i Yieli na luve i Kerisoni, me kau ki na yau ni vale i Jiova.

9Sa qai reki ko ira na tamata, ni ra a solia e na vinakata, ni sa dodonu na lomadra ni ra sa solia kivei Jiova e na yalo e vinakata: a sa rereki ko Tavita na tui e na reki levu.

10A sa ia na vakavinavinaka kivei Jiova ko Tavita e na matadra nai vavakoso taucoko, ka sa kaya ko Tavita, Mo kalougata tiko, i Jiova na Kalou i Isireli na tamai-mami, ka tawa mudu.

11Sa nomu ga, i Jiova, na cecere, kei na kaukauwa, kei na lagilagi, kei na qaqa, kei na ka vakatui: ni sa nomu ga na ka kecega mai lomalagi, kei vuravura; sa nomu na matanitu, i Jiova, ia ko sa laveti cake me ulu ni ka kecega.

12Ia sa taka maivei iko na yau kei na vakarokoroko, a sa yaco na nomu lewa ki na ka kecega; a sa e ligamu na kaukauwa kei na qaqa, sa rawarawa talega ki na ligamu me vakalevulevuya na tamata kece, ka vakaukauwataka.

13Ia o qo, neimami Kalou, keimami sa vakavinavinaka vei iko, ka meketaka na yacamu sa vakarokorokotaki.

14Ia ko cei mada koi au, se cava mada ko ira na noqu tamata, me rawarawa kina vei keimami me soli ka e na yalo e vinakata vakaoqo? ni sa taka maivei iko na ka kecega, ka sa nomu ga na ka keimami sa solia vei iko.

15Ni keimami sa vulagi e matamu, ka kai tani, me vakataki ira kece na tama i keimami: sa vaka na yaloyalo na neimami siga e vuravura, ka sega e tiko dei.

16I Jiova na neimami Kalou, na yau kece o qo keimami sa cokonaka me tara kina e dua na vale me nomu me tiko kina na yacamu tabu, sa mai na ligamu, a sa nomu kecega.

17Au sa kila talega, noqu Kalou, ni ko sa dauvakatovolea na yalo, ia ko sa vinakata na yalododonu. Koi au, ni sa dodonu na yaloqu au sa solia na ka kecega o qo e na loma e vinakata: ia kaʼu sa qai raica e na marau na nomu tamata, era sa tiko eke, me soli ka vei iko e na loma e vinakata.

18I Jiova, na Kalou i Eparaama, ko Aisake, kei Isireli, na tama i keimami, mo kitaki ira na nomu tamata me ra vakananuma tiko na ka o qo e na vakasama ni lomadra, ka tawa mudu, ia mo cokonaka na lomadra vei iko:

19ia mo solia kivei Solomoni na luvequ na loma dodonu, me vakabauta na nomu veivunau, na nomu veivakatakilakila, kei na nomu veilesilesi, ka me kitaka kece, ka me tara ko koya na vale au sa cokonaka kina na kena ka.

20A sa kaya ko Tavita vei ira kece nai vavakoso, Dou mai vakavinavinaka vei Jiova na nomudou Kalou. A sa ia na vakavinavinaka nai vavakoso taucoko kivei Jiova na nodra Kalou na tamadra, ka vakalakala, ka cuva vei Jiova, kei na tui.

21A ra sa vakamatea nai soro e so vei Jiova, ka vakacabora nai soro kama e so kivei Jiova, e na siga sa muria na siga ko ya, sa dua na udolu na karavau, e dua na udolu na sipi tagane, e dua na udolu na lami, kei na kedrai madrali gunuvi, kei nai madrali e vuqa me rauti ira kecega na Isireli:

22a ra sa kana ka gunu e na mata i Jiova e na siga ko ya, ka levu na nodra marau.

A RA sa buli Solomoni tale na luve i Tavita me tui, a ra sa lumuta vei Jiova, me turaga sa liu, ko Satoki talega me bete.

23Sa qai tiko ko Solomoni e nai tikotiko vakaturaga i Jiova me tui, mei sosomi i Tavita na tamana, ka sa tamata yaco; ka sa talairawarawa vua ko ira kecega na Isireli.

24A sa vakamalumalumutaki ira kivei Solomoni na tui ko ira kece na turaga, kei ira na tamata qaqa, kei ira kece talega na luve i Tavita na tui.

25A sa vakalevulevui Solomoni vakalevu e na matadra kece na Isireli ko Jiova, ka solia vua na ka vakatui, sa sega e dua na tui Isireli sa bula eliu vei koya me sa vakakina.

26A sa lewa ko Tavita na luve i Isei vei ira kecega na Isireli.

27Ia na gauna sa lewai ira kina na Isireli sa vasagavulu na yabaki; sa tui tiko mai Epironi ka yabaki vitu, ka sa tui tiko mai Jerusalemi e tolusagavulu ka tolu.

28A sa mate ko koya ni sa vuqa vakavinaka na nona yabaki, sa mamau e na siga, e na yau, kei na vakarokoroko: a sa tui ko Solomoni na luvena, me kenai sosomi.

29Ia na cakacaka i Tavita na tui, eliu, emuri talega, raica, sa volai e nai vola i Samueli na rairai, ka e nai vola i Nacani na parofita, ka e nai vola i Kata na rairai,

30vata kei na nona lewa kecega, kei na nona kaukauwa, kei na veika sa yaco vua e na nona gauna, vei ira talega na Isireli, vei ira talega na matanitu kecega ni veivanua.