I. A Veika Sa Caka E Na Veigauna 28 - AI VOLA TABU（FIJ1864）

Sa tatau ko Tavita vei ira na Isireli kei Solomoni na luvena; ka solia vei Solomoni na ka ka vakarautaka ko koya, kei nai vakatakarakara ni vale ni soro.

1A SA vakasoqoni ira kecega na turaga nei Isireli ki Jerusalemi ko Tavita, ko ira era sa turaga ni veiyavusa, kei ira na turaga ni veivavakoso era sa veitaravi me qarava na tui, kei ira na nodra turaga na veiudolu, kei ira na nodra turaga na veidrau, kei ira era sa lewa kecega na nona yau kei na nona manumanu na tui kei iratou na luvena, vata kei ira nai talatala, kei ira na tamata kaukauwa, kei ira kecega na tamata qaqa.

2A sa tu cake e na yavana ko Tavita na tui, ka kaya, Dou rogoci au, oi kemudou na wekaqu, kei na noqu tamata: Sa tu o lomaqu meʼu tara e dua na vale me vakacegu kina na kato ni veiyalayalati i Jiova, kei nai tutu-ni-yavana na noda Kalou, au sa vakarautaka talega na ka ni vale:

3ia ka sa kaya vei au na Kalou, O na sega ni tara e dua na vale ki na yacaqu, ni ko sa tamatai valu, ka sa vakadavea na dra.

4Ia ka sa digitaki au maivei ira kece na mataqali ni tamaqu ko Jiova na nodra Kalou na Isireli, meʼu tui vei ira na Isireli, ka tawa mudu: ni sai ira na Juta sa digitaka ko koya, me lewa; ia vei ira na mataqali i Juta, na mataqali i tamaqu; ia ka sa vinakati au vei iratou na luve ni tamaqu, meʼu buli me tui vei ira kecega na Isireli:

5ia vei ira kece na luvequ, (ni sa lewe vuqa na goneatagane sa solia vei au ko Jiova,) sa digitaki Solomoni na luvequ me tiko e nai tikotiko vakaturaga ni matanitu i Jiova, me lewai ira na Isireli:

6a sa kaya vei au ko koya, Ena tara na noqu vale kei na noqu veilomanibai ko Solomoni na luvemu, ni kaʼu sa digitaki koya me luvequ, ia koi au, au na tamana:

7au na vakataudeitaka talega na nona matanitu ka tawa mudu, kevaka sa lomadei ko koya me kitaka na noqu veivunau, kei na noqu veilewa, me vaka e na siga edaidai.

8Ia o qo, e na matadra kece na Isireli, na nonai vavakoso ko Jiova, ni sa rogoca talega ko na noda Kalou, mo dou vakabauta ka qara na vunau kece i Jiova na nomudou Kalou: mo dou taukena tiko kina na vanua vinaka o qo, ka laiva vei ira na luvemudou me ra taukena ni dou sa mate, ka tawa mudu.

9Ia ko iko, Solomoni na luvequ, mo kila na Kalou i tamamu, ka qaravi koya e na yalo dina, kei na loma e marautaka: ni sa vakatovolea na yalo kece ko Jiova, ka kila kece na ka e na nanuma ni loma: kevaka ko na vakasaqarai koya, ko na kunei koya; ia kevaka ko sa biuti koya, ena biuti iko tani ko koya ka tawa mudu.

10Ia mo kila: ni sa digitaki iko ko Jiova mo tara e dua na vale ki na vale tabu: mo kaukauwa ga, ka cakava.

11A sa solia ko Tavita kivei Solomoni na luvena nai vakatakarakara ni vale, kei na kena veivale, kei na kena veivale ni yau, kei na kena vei tiki-ni-vale ecake, kei na kena veiloqi eloma, kei na yasana mo tiko kina nai cabocabo-ni-bulubulu,

12kei nai vakatakarakara ni ka kecega sa tukuna vua na yalo, na veilomanibai ni vale i Jiova, kei na veitaba-ni-vale kecega ecake sa volita, kei na veivale ni yau ni vale ni Kalou, kei na veivale ni yau ni ka sa vakacabori:

13kei nai valavala ni nodra veitaravi na bete kei ira na Levi, kei na cakacaka kecega ni ka sa kitaki e na vale i Jiova, kei nai yaya kece e yaga e na cakacaka ni vale i Jiova:

14na koula sa vakatovolei na kena bibi me caka kina nai yaya koula ki nai valavala kecega ni cakacaka kecega; ki nai valavala kecega sa caka e na siliva sa vakatovolei na kena bibi, me caka kina nai yaya kecega me cakavi kina nai valavala ni cakacaka kecega:

15io, na kena bibi ni veitutu-ni-cina koula, kei na kedra veicina koula, na kena bibi ni tutu-ni-cina yadua, kei na kedra veicina: kei na bibi ni veitutu-ni-cina siliva, ia nai tutu-ni-cina kei na kena veicina, me vaka sa yaga me caka kina nai tutu-ni-cina yadua:

16kei na koula sa vakatovolei na kena bibi ki na veikanakana ni madrai dauyatuni, ki nai kanakana yadua; kei na siliva ki na veikanakana siliva:

17na koula dina talega ki na veiqila ni lewe ni manumanu, kei na veibilo me kau kina na dra me kureitaki, kei na veibilo ni gunu: ia ki na veisedre koula, sa vakatovolei na kena bibi ki na sedre yadua; ia ki na veisedre siliva sa vakatovolei na kena bibi ki na sedre yadua:

18ia ki nai cabocabo ni ka boi vinaka, na koula dina sa vakatovolei na kena bibi; kei na koula ki nai vakatakarakara ni ka sa vakavodoki kina na jerupi e rua sa vakatetaba, ka ubia na kato ni veiyalayalati i Jiova.

19Sa vakatakila ko Jiova na ka kecega o qo e nai volavola, ni sa tiko vei au na ligana, io nai valavala kecega ni vakatakarakara o qo.

20A sa kaya ko Tavita kivei Solomoni na luvena, Mo kaukauwa ga ka yalolevu, ka kitaka: kakua ni rere, se taqaya: ni na vata kei iko ko Jiova na Kalou, na noqu Kalou; ena sega ni guca vei iko ko koya, se biuti iko, mo vakaotia mada nai valavala kecega ni cakacaka ni nona vale ko Jiova.

21Ia, raica, na nodra vei-mata na bete e veitaravi kei ira na Levi, me kitaka na cakacaka kece ni vale ni Kalou: ia ena vata kei iko, me kitaka kecega na cakacaka vakamatai, ko ira kecega na tamata vuku sa vinakata me cakava, me ia kina na cakacaka kece: ena vakarorogo kece talega vei iko ko ira na turaga, kei ira kecega na tamata.