I. A Veika Sa Caka E Na Veigauna 23 - AI VOLA TABU（FIJ1864）

1IA ni sa qase mai ko Tavita, ka vuqa na nona yabaki, sa buli Solomoni na luvena me tui vei ira na Isireli.

2A SA vakasoqoni ira vata kecega na nodra turaga na Isireli ko koya, kei ira na bete, kei ira na Levi.

3A sa wili ko ira na Levi ni sa tolusagavulu na nodra yabaki ka levu cake; ia na nodrai wiliwili, ni ra sa volai na tamata yadua, sa tolu na oba ka walu na udolu.

4Sa nodrai tavi na lewe ruasagavulu ka va na udolu vei ira, me vakaraica na cakacaka ki na vale i Jiova; ka sa ono na udolu era sa turaga ka mataveilewai:

5a sa udolu vakava era sai vakatawa ni matamata-ni-koro: ka va na udolu era sa vakavinavinaka tiko kivei Jiova, e na ka domo vinaka kaʼu a cakava me ia kina na vakavinavinaka.

6A sa wasei ira ko Tavita me ra vakamataqali e veitaravi me lewai ira ko ira na luve i Levi: o Kerisoni, ko Koaca, kei Mirari.

7Maivei iratou na luve i Kerisoni: o Latani, kei Simi.

8O iratou na luve i Latani: ko Yieli sa liu, kei Secami, kei Joeli, sa lewe tolu.

9O iratou na luve i Simi: o Silomici, kei Esieli, kei Arani, sa lewe tolu. Sa nodra qase turaga na Latani ko iratou o qo.

10Ia ko iratou na luve i Simi: o Yeaci, ko Sina, kei Yiusi, kei Piria. O iratou na lewe va o qo eratou sa luve i Simi.

11A sa kenai matai ko Yeaci, ia nai karua ko Sisa: ia ko Yiusi kei Piria sa sega ni lewe vuqa na luvedrau; ia era sa wili vata kina me mataqali.

12O iratou na luve i Koaca: o Amirami, ko Isari, ko Epironi, kei Usieli, sa lewe va.

13Oi rau na luve i Amirami: o Eroni, kei Mosese: ka sa tawase ko Eroni, me vakasavasavataka na veika sa tabu sara, o koya kei ira na luvena ka tawa mudu, me ra vakacaudreva e na mata i Jiova na ka boi vinaka, me ra qaravi koya, ka ia na vosa ni veivakalougatataki e na yavana, ka tawa oti.

14A sa vakayacani vata kei ira na yavusa i Levi koi rau na luve i Mosese na tamata ni Kalou.

15Oi rau na luve i Mosese: o Kerisomi, kei Elieseri.

16Maivei iratou na luve i Kerisomi: sa liu ko Sipueli.

17Ia na luve i Elieseri: o Riapiya sa liu. Ka sega tale na luve i Elieseri; ia ka sa lewe vuqa sara na luve i Riapiya.

18Maivei iratou na luve i Isari: sa liu ko Silomici.

19Maivei iratou na luve i Epironi: sa liu ko Yiriya, ai karua ko Emariya, ai katolu ko Yeesieli, ia nai kava ko Yikamiami.

20Maivei rau na luve i Usieli: sa liu ko Mika, ia nai karua ko Yisia.

21Oi rau na luve i Mirari: o Mali, kei Musi. Oi rau na luve i Mali: o Eliasari, kei Kisi.

22A sa mate ko Eliasari, ka sega na luvena tagane, a luvena alewa ga; a sa kauti iratou ko iratou na wekadratou na luve i Kisi.

23O iratou na luve i Musi: o Mali, kei Eteri, kei Yirimoci, sa lewe tolu.

24O ira o qo na luve i Levi, me vaka na mataqali ni nodra qase; io ko ira na qase turaga, me vaka nai wiliwili ni yacadra ni ra sa volai, o ira sa cakava na cakacaka ni veiqaravi e na vale i Jiova, ko ira sa ruasagavulu na nodra yabaki ka levu cake.

25Ni sa kaya ko Tavita, Sa vakasaututaki ira na nona tamata ko Jiova na nodra Kalou na Isireli, me ra tiko e Jerusalemi ka tawa mudu:

26o ira talega na Levi: era na sega tale ni colata na vale-tikotiko, se dua na kenai yaya ni kena cakacaka.

27Ni sa wili ko ira na luve i, Levi sa ruasagavulu na nodra yabaki ka levu cake, me vaka nai tinitini ni vosa i Tavita.

28Ni sa nodrai tavi me qaravi ira na luve i Eroni e na veiqaravi e na vale i Jiova, e na veilomanibai, kei na veitaba-ni-vale ecake, kei na vakasavasavataka na ka tabu kecega, kei na cakacaka sa kitaki tiko e na vale ni Kalou;

29me ra cokonaka na madrai dauyatuni, kei na madrai droka vinaka ni madrali laukana kei nai buli madrai mamare tawa vakaleveni, kei na ka sa tavuteke, kei na ka sa tavu, ka me ra vakaraica nai vakarau kei na bibi ni ka kece;

30me ra tu talega e na mataka kecega mo ia na vakavinavinaka kei na meke vei Jiova, ka vakakina talega e na yakavi;

31me ra vakacabora talega nai soro kama kecega kivei Jiova, e na veisiga ni vakacecegu, o na veivula vou, kei na veisolevu sa lokuci, me vaka nai wiliwili, me vaka nai valavala sa vakaroti vei ira, me ia tikoga e na mata i Jiova:

32ia me ra vakabauta nai valavala ni vale gatu ni veitata, kei nai valavala ni yasana tabu, kei na nodrai tavi na wekadra, na luve i Eroni, e na cakacaka ni vale i Jiova.