I. A Veika Sa Caka E Na Veigauna 22 - AI VOLA TABU（FIJ1864）

Sa vakarautaka na ka levu ko Tavita, me tara kina na vale ni soro, 2-5. Ai vakaro i Tavita vei Solomoni kei ira na turaga, 6-19.

1SA qai kaya ko Tavita, O qo na vale i Jiova na Kalou, o qo talega nai cabocabo ni soro kama nei Isireli.

2A SA vakarota ko Tavita me ra sa vakasoqoni vata ko ira na vulagi sa tiko e na nodra vanua na Isireli, a sa lesia e so na matai ni vatu, me taya na veivatu sa vakarautaki me tara kina na vale ni Kalou.

3A sa cokonaka vakalevu ko Tavita na kaukamea mei vako ni veisogo ni veimatamata-ni-koro kei na veisema; sa ka levu talega na parasa, sa sega ni vakatovolei na kena bibi;

4na kau sitari talega sa sega ni wili na kedra vuqa: ni sa vuqa na kau sitari era sa kauta tiko mai kivei Tavita ko ira na kai Saitoni kei ira na kai Teiri.

5A sa kaya ko Tavita, Sa gone ga ka malumalumu ko Solomoni na luvequ, ia na vale ena caka me nei Jiova, ena vakaiukuukutaki vakaidina, me rogo ka lagilagi e na veivanua kecega: au na cokonaka na ka me yaga kina. A sa cokonaka kina vakalevu ko Tavita ni sa bera mai na nona mate.

6Sa qai kacivi Solomoni na luvena, ka vakaroti koya me tara e dua na vale me nei Jiova na nodra Kalou na Isireli.

7A sa kaya ko Tavita kivei Solomoni, Na luvequ, koi au, sa tu e lomaqu meʼu tara e dua na vale ki na yaca i Jiova na noqu Kalou:

8ia ka sa yaco mai vei au na vosa i Jiova, a sa kaya, Ko a vakadavea vakalevu na dra, ka daukitaka nai valu levu: o na sega ni tara na vale ki na yacaqu, ni sa levu na dra ko sa vakadavea ki na soso e mataqu:

9raica, ena sucu mai kivei iko e dua na goneatagane, ena tamata vakacegu ko koya; ia kaʼu na solia vua na vakacegu maivei ira kecega na nona meca e vakavolivolita: ni na yacana ko Solomoni, ia kaʼu na solia na tiko vakacegu kei na sautu kivei ira na Isireli e na nona gauna:

10ena tara na vale ki na yacaqu ko koya; ena luvequ talega ko koya, ia ena tamana koi au; au na vakataudeitaka talega nai tikotiko vakaturaga ni nona matanitu vei ira na Isireli me tawa mudu.

11Ia, na luvequ, me tiko vata kei iko ko Jiova; ia mo cakacaka yaco, ka tara na nona vale ko Jiova na nomu Kalou, me vaka na nona vosataki iko.

12Me solia ga vei iko ko Jiova na vuku kei na yalomatua, ka vakaroti iko e na vukudra na Isireli, mo kitaka rawa na vunau i Jiova na nomu Kalou.

13O na qai tamata yaco, kevaka ko sa vakanananu me kitaka na veivunau kei na vei-lewa sa vakarota ko Jiova kivei Mosese e na vukudra na Isireli: mo kaukauwa ga, ka yalolevu; kakua ni rere, se taqaya.

14Ia, raica, au sa cokonaka e na noqu rarawa, me yaga ki na nona vale ko Jiova, na koula sa udolu vakadrau na taledi, kei na siliva sa udolu vakaudolu na taledi; kei na parasa kei na kaukamea sa sega ni kilai na kena bibi; ni sa ka levu sara: na kau talega, kei na vatu, au sa cokonaka; ia mo kuria o qori.

15Sa lewe vuqa talega na tamata cakacaka e tiko kei iko, ko ira na dautata, kei ira na matai ni vatu kei na kau, kei na tamata vuku kecega e na cakacaka kecega.

16Sa tawa wiliki na koula, na siliva, kei na parasa, kei na kaukamea. Mo ia ga, ka cakacaka, ka me tiko vata kei iko ko Jiova.

17Sa vakarota talega ko Tavita kivei ira kecega na nodra turaga na Isireli, me ra vukei Solomoni na luvena, ka vaka,

18Sa sega li ni vata kei kemudou ko Jiova na nomudou Kalou? ka sa sega li ni vakasaututaki kemudou e na veiyasana kecega? ni sa soli ira oti na lewe ni vanua ki na ligaqu; ka sa vakamalumalumutaki na vanua e na mata i Jiova, kei na matadra na nona tamata.

19Dou qai vaqara na lomamudou kei na yalomudou me vakasaqarai Jiova na nomudou Kalou, ka mo dou ia, ka tara na nona vale tabu ko Jiova na Kalou, me kauti rawa mai kina na kato ni veiyalayalati i Jiova, kei nai yaya tabu ni Kalou, ki loma ni vale ena tarai ki na yaca i Jiova.