I. A Veika Sa Caka E Na Veigauna 21 - AI VOLA TABU（FIJ1864）

Sa dauveretaki Tavita ko Satani me wiliki ira na tamata; a sa cudru ko Jiova.

1A SA tu cake ko Satani me nodra meca na Isireli, ka sa vakauqeti Tavita me wiliki ira na Isireli.

2A sa kaya ko Tavita kivei Yoapi, kei ira na matanivanua, Lako, wiliki ira na Isireli, mai Pieri-sepa ka kauta ki Tani; ka kauta mai vei au na kedrai wiliwili, meʼu kila.

3A sa kaya ko Yoapi, Me cakavi ira na nona tamata ko Jiova me sa drau mai ko ira yadua; i noqu turaga na tui, era sa sega li na nomu tamata na noqu turaga ko ira kece? a cava mada e nanuma kina ko na noqu turaga na ka o qo? ena vu ni cudru vei ira na Isireli ko koya e na cava?

4Ia ka sa gumatua ga vei Yoapi na vosa ni tui. A sa lako yani kina ko Yoapi, a sa lako voli vei ira kece na Isireli, ka lako mai ki Jerusalemi.

5A sa tukuna ko Yoapi na kedrai wiliwili na tamata kivei Tavita. Ia na nodrai wiliwili kecega na Isireli sa udolu vakaudolu ka drau tale na udolu na tamata, era sa ucuna nai seleiwau: ia ko ira na Juta era sa udoluvakava na drau ka vitusagavulu tale na udolu na tamata, era sa ucuna nai seleiwau.

6Ia ka sega ni wiliki vata kei ira ko ira na Levi, kei ira na Penijamini: ni sa ka vakasisila kivei Yoapi na vosa ni tui.

7A sa ca vua na Kalou na ka o qo; a sa yaviti ira kina na Isireli ko koya.

8A sa kaya ko Tavita vua na Kalou, Au sa valavala ca vakalevu, niʼu sa cakava na ka o qo; ia o qo, mo kauta tani mada na noqu ca na nomu tamata, ni kaʼu sa valavala vakalialia sara.

9A sa vosa ko Jiova kivei Kata, na rairai i Tavita, ka sa kaya,

10Laʼki tukuna kivei Tavita, ka kaya, Sa vosa vakaoqo ko Jiova, Au sa cavuta vei iko na ka e tolu: mo digitaka e dua meʼu vakayacora vei iko.

11A sa lako mai kivei Tavita ko Kata, a sa kaya vua, Sa vosa vakaoqo ko Jiova, Mo digia vei iko:

12me dausiga li ka yabaki tolu? se me vakacacataki iko ko ira na nomu meca ka vula tolu, ka me vauci iko na nodrai seleiwau na nomu meca? se na nonai seleiwau ko Jiova ka siga tolu, ia na mate ca e nomu vanua, ka me ia voli na veivakarusai e na veiyasana nei Isireli ko na agilose i Jiova? Mo mai lewa, so cava na vosa meʼu kauta vua sa talai au mai.

13A sa kaya ko Tavita kivei Kata, Au sa taqaya vakalevu; meʼu lutu mada ki na liga i Jiova; ni sa levu sara na nona loloma; ia meʼu kakua ni lutu ki na liga ni tamata.

14A sa tala na mate ca ko Jiova kivei ira na Isireli, ka sa bale vei ira na Isireli e udolu vakavitusagavulu na tamata.

15A sa tala ko na Kalou e dua na agilose ki Jerusalemi me vakarusa: ia ni sa ia tiko na veivakarusai sa kunea ko Jiova, ka sa veivutuni e na vuku ni rarawa, ka sa kaya vua na agilose sa ia na veivakarusai, Sa levu; me cegu o qo na ligamu. A sa tu na agilose i Jiova ka voleka ki na rara ni buturaki sila nei Orinani na kai Jepusa.

16A sa ta cake e na matana ko Tavita, ka sa kunea na agilose i Jiova ni sa tu e na maliwa kei vuravura kei lomalagi, ka sa ucuni tu e ligana na nonai seleiwau, ka sa dodoka me donui Jerusalemi. Sa qai bale vakatobocu ko Tavita, kei ira na qase, era sa vakaisulu e nai sulu taqarotu.

17A sa kaya ko Tavita vua na Kalou, Sa sega li ni koi au ka vakarota me wiliki ko ira na tamata? ia sai au sa cala ka valavala ca vakaidina: ia ko ira na sipi o qo, a cava beka era sa cakava? i Jiova na noqu Kalou, me cudruvi au mada kei na mataqali i tamaqu na ligamu; ia me kakua ga vei ira na nomu tamata, me yaviti ko ira.

18A sa vakarota ko na agilose i Jiova kivei Kata, me kaya kivei Tavita, me lako cake ko Tavita, me cakava e dua nai cabocabo-ni-soro kivei Jiova, e na rara ni buturaki sila nei Orinani na kai Jepusa.

19A sa lako cake ko Tavita e na vosa i Kata, a ya ka vosataka e na yaca i Jiova.

20A sa vuki kimuri ko Orinani, ka raica na agilose; a ratou sa vuni iratou, ko koya kei iratou vata kaya na luvena tagane e lewe va. A sa buturaka tiko na witi ko Orinani.

21Ia ni sa lako tiko mai ko Tavita kivei Orinani, sa rai voli ko Orinani, ka kunei Tavita, ka lako yani mai na rara ni buturaki sila, a sa cuva vakatobocu kivei Tavita.

22Sa qai kaya ko Tavita kivei Orinani, Mo solia mai vei au na yasana sa buturaki kina na sila, meʼu cakava kina e dua nai cabocabo-ni-soro kivei Jiova, (ko na solia mai vei au mei sau ni kenai voli dodonu:) me mudu na mate ca vei ira na tamata.

23A sa kaya ko Orinani kivei Tavita, Mo kauta me nomu, ka me kitaka ko na noqu turaga na tui na ka sa dodonu e matamu: raica, au sa solia na karavau mei soro kama, kei nai yaya ni buturaki sila me kena buka, kei na witi mei madrali laukana: au sa solia kece.

24A sa kaya ko Tavita na tui kivei Orinani, E segai; kaʼu na volia dina e na kenai voli dodonu: ni kaʼu sa bese ni kauta na ka sa nomu me nona ko Jiova, se cabora nai soro kama sa sega ni vakaivoli.

25A sa solia kina ko Tavita kivei Orinani e drau vakaono na sikeli koula, sa vakatovolei na kena bibi, mei voli ni tikina ko ya.

26A sa tara maikea ko Tavita e dua nai cabocabo-ni-soro kivei Jiova, ka vakacabora nai soro kama e so, ka so nai soro e na veivinakati, ka masuta na yaca i Jiova; a sa vosa vua ko koya e na buka waqa mai lomalagi e na dela ni cabocabo ni soro kama.

27A sa vakarota ko Jiova vua na agilose; a sa daramaka tale ko koya na nonai seleiwau ki na kena taga.

28E na gauna ko ya, ni sa raica ko Tavita ni sa vosa vei koya ko Jiova e na rara ni buturaki sila nei Orinani na kai Jepusa, sa qai cabocabo maikea ko koya.

29Ia na vale-tikotiko i Jiova, o qori ka cakava ko Mosese e na lekutu, kei nai cabocabo ni soro kama, sa tu e na gauna ko ya mai na tikina cecere mai Kipioni.

30Ia ka sa dredre vei Tavita me lako ki na matana me taroga na Kalou; ni sa rere tiko e na vuku ni nonai seleiwau na agilose i Jiova.