I. A Veika Sa Caka E Na Veigauna 20 - AI VOLA TABU（FIJ1864）

Sa kabai ko Rapa, ka sa vakacacana na lewe ni koro ko Tavita, 1-3. Sa moku na tamata yagolevu e lewe tolu vei ira na kai Filisitia, 4-8.

1IA ni sa oti na yabaki, e nai tabayabaki era sa daulako kina na tui ki nai valu, sa liutaka ko Yoapi e dua nai valu kaukauwa, ka vakacacana na nodra vanua na luve i Amoni, a sa lako ka kabai Rapa. A sa tikoga mai Jerusalemi ko Tavita. A sa yaviti Rapa ko Yoapi, ka vakaqeavutaka.

2A sa kauta ko Tavita nai sala vakaturaga mai na ulu ni nodra tui, a sa kunea na kena bibi sa dua na taledi koula, a sa so kina na vatu talei: a sa tikori e na ulu i Tavita: na ka levu talega nai toki ni valu sa kauta mai ko koya mai na koro.

3A sa kauti ira yani na tamata sa tiko kina, ka lesi ira me cudruvi e na veivaro, kei na veikadruka-diu aironi ni qele, kei na veimatau. A sa kitaka vakaoqo ko Tavita ki na nodra Veikoro kece na luve i Amoni. A sa lesu ki Jerusalemi ko Tavita kei ira kecega na tamata.

4Ia ni sa oti na ka o qo, sa qai tubu nai valu kei ira na kai Filisitia mai Keseri; e na gauna o qori sa mokuti Sipei ko Sipikei na luve i Usa, sa dua na luve ni tamata yagolevu: a ra sa vakamalumalumutaki.

5A sa dua tale nai valu kei ira na kai Filisitia; a sa mokuti Lami na taci i Koliyaci na kai Kaca, ko Elanani na luve i Yairi, ia na kau ni nona moto sa vaka na nodra kau na dautalitali.

6A sa dua tale nai valu mai Kaca; a sa tiko e dua na tamata levulevu sa ruasagavulu ka va nai qaqalo ni ligana kei nai qaqalo ni yavana, sa yaono ka yaono; a sa sucu ko koya talega vua na tamata yagolevu.

7Ia ni sa bolei ira na Isireli ko koya, sa mokuti koya ko Jonacani na luve i Simia na tuaka i Tavita.

8O iratou o qo eratou sa sucu vua na tamata yagolevu mai Kaca; a ratou sa bale e na liga i Tavita, kei na ligadra na nona tamata.