I. A Veika Sa Caka E Na Veigauna 19 - AI VOLA TABU（FIJ1864）

Sa valavala vakatani ko ira na luve i Amoni kivei Tavita, a sa gumatua e nai valu ko ira nai valu i Tavita.

1A SA oti o qo, sa qai ciba ko Naasi na nodra tui na luve i Amoni, ka sa mai tui na luvena, me kenai sosomi.

2A sa kaya ko Tavita, Au na lomani Anuni na luve i Naasi, e na vuku ni sa lomani au ko tamana. A sa vakatadu mata ko Tavita me vakacegui koya e na vuku i tamana. A sa lako ko iratou nai talatala i Tavita ki na nodra vanua na luve i Amoni, kivei Anuni, me vakacegui koya.

3A sa kaya ko ira na nodra turaga na luve i Amoni vei Anuni, O sa nanuma beka ni sa vakarokorokotaki tamamu ko Tavita, e na vuku ni sa talai iratou na veivakacegui kivei iko, ne? sa sega li ni lako mai kivei iko ko iratou na nona tamata me ratou vakasaqara, ka vakaqeavu-taka, ka rai vanua, ne?

4A sa tauri iratou kina na tamata i Tavita ko Anuni, ka tasia, ka seledrutia na nodratou veisulu eloma ka tauvata kei na tolodratou, ka talai iratou yani.

5Sa qai lako e so ka tukuna kivei Tavita na ka sa caka vei iratou na tamata. A sa talaki ko koya me tavaki iratou; ni sa madua vakalevu ko iratou na tamata. A sa kaya na tui, Dou tiko mai Jeriko, me tei tubu na kumimudou, mo dou qai lako tale mai.

6Ia ni sa kunea ko ira na luve i Amoni ni ra sa vakaboicataki vei Tavita, sa kauta ko Anuni kei ira na luve i Amoni na siliva sa udolu na taledi, me volia kina na veivale-vodoki e so, ka so na tamata sa dauvodo e na ose, mai Mesopotemia, kei Siria-mee-ka, kei Sopa.

7A ra sa volia rawa e oba vakatolu ka lua na udolu na vale-vodoki, kei na tui Meeka kei ira na nona tamata; a ra sa lako mai ka tiko vakaivalu e na mata i Metipa. A sa soqo vata ko ira na luve i Amoni mai na nodra Veikoro, ka lako mai ki nai valu.

8Ia ni sa rogoca ko Tavita, sa talai Yoapi yani, kei ira kece na mataivalu qaqa.

9A sa curu mai kitautuba ko ira na luve i Amoni, a sa tuvai valu e na mata ni matamata-ni-koro: ia ko iratou na tui eratou sa lako mai, eratou sa tiko vakai iratou e na were.

10Ia ni sa raica ko Yoapi ni sa tuva nai valu e matana, e dakuna talega, sa mai digitaka ko koya e so na tamata bula maivei ira kecega na Isireli, a sa tuvai ira me ra donui ira na kai Siria.

11Ia na nodra vo na tamata sa solia kivei Episai na tacina, a ra sa tuvai ira me donui ira na luve i Amoni.

12A sa kaya ko koya, Kevaka sa gumatua vei au ko ira na kai Siria, mo qai vukei au mai: ia, kevaka sa gumatua vei iko ko ira na luve i Amoni, au na qai vukei iko:

13mo kaukauwa, ia me da gumatua e na vukudra na noda tamata, kei na Veikoro ni noda Kalou: me qai kitaka ko Jiova na ka sa dodonu e matana.

14Sa qai toro voleka yani ko Yoapi, kei ira na tamata era vata kaya, kivei irana kai Siria me ra vala; ka ra sa dro e matana.

15Ia ni ra sa raica ko ira na luve i Amoni, ni sa dro ko ira na kai Siria, sa dro ko ira talega e na mata i Episai na tacina, a ra sa curu ki loma ni koro. Sa qai lako ki Jerusalemi ko Yoapi.

16Ia ni ra sa raica ko ira na kai Siria ni ra sa guca vei ira na Isireli, era sa vakatadu mata, a sa kauti ira mai na kai Siria era sa tiko e tai kadua ni uciwai: ka sa liutaki ira ko Sofaki na turaga ni valu i Etareseri.

17A sa tukuni kivei Tavita; ka sa soqoni ira vata kecega na Isireli ko koya, a sa lako-kosova na Joritani, ka sa yaco vei ira, a sa tuva nai valu me donui ira. Ia ni sa vakatuva oti ko Tavita na nonai valu me donui ira na kai Siria, era sa vala kaya.

18A sa dro ko ira na kai Siria e na matadra na Isireli, a sa mokuta ko Tavita vei ira na kai Siria e udolu vakavitu na tamata era sa vala e na vale-vodoki, ka oba vakava na tamata sa daulako e na yavadra, sa vakamatei Sofaki talega na turaga ni valu.

19Ia ni ra sa raica ko ira na tamata i Etareseri ni ra sa guca vei ira na Isireli, era sa qai soro kivei Tavita, ka yaco me ra nona tamata: ka sa bese ko ira na kai Siria ni totaki ira tale na luve i Amoni.