I. A Veika Sa Caka E Na Veigauna 18 - AI VOLA TABU（FIJ1864）

Sa gumatua ko Tavita vei ira na veimatanitu e so, 1-8. Sa tala na luvena ko na tui Emaci vei Tavita, 9-11. Sa qali vua ko Itomi, 12, 13. O ira na tamata turaga i Tavita, 14-17.

1A SA oti o qo, sa mokuti ira na kai Filisitia ko Tavita, ka vakamalumalumutaki ira, a sa rawai Kaca kei na kena veikoro mai na ligadra na kai Filisitia.

2A sa mokuti Moapi ko koya; a sa yaco kina ko ira na kai Moapi me ra tamatai Tavita, a ra sa kauta nai vakacavacava.

3A sa mokuti Etareseri na tui Sopa ka yaco ki Emaci ko Tavita, ni sa lako ko koya me vakadinadinataka na nona kaukauwa mai na uciwai ko Uferetisi.

4A sa kauta tani vei koya ko Tavita na vale-vodoki e dua na udolu, kei na tamata sa vodo e na ose e udolu vakavitu, ka oba vakarua na tamatai valu sa lako e yavadra: ka sa tava na talarua ni veiose ni vale-vodoki kecega ko Tavita, a sa maroroya me rauta e dua na drau na vale-vodoki.

5Ia ni sa lako mai ko ira na kai Siria mai Tamasiko, me vukei Etareseri na tui Sopa, sa mokuta ko Tavita e oba vakarua ka rua na udolu vei ira na kai Siria.

6A sa vakatikora ko Tavita nai valu e so mai Siria-tamasiko; a sa yaco ko ira na kai Siria me ra nona tamata ko Tavita; era sa kauta nai vakacavacava. A sa vakabulai Tavita ko Jiova e na veiyasana sa lako kina ko koya.

7A sa kauta ko Tavita na veisasabai koula sa tara ko ira na tamata i Etareseri, a sa kauta ki Jerusalemi.

8Sa kauta mai ko Tavita mai Tipaci, kei Kuni, a koro ka nei Etareseri, a parasa na ka levu sara, a ya sa bulia kina ko Solomoni na sedre-wasawasa parasa, kei na veiduru, kei na veiyaya parasa.

9Ia ni sa rogoca ko Tou na tui Emaci, ni sa mokuta oti ko Tavita na mataivalu taucoko nei Etareseri na tui Sopa;

10sa talai Atorami na luvena kivei Tavita na tui, me taroga na nona tiko, ka me vosa vinaka vua e na vuku ni nona veivaluti kei Etareseri, ka mokuti koya (ni rau sa veivala tiko ko Etareseri kei Tou); a sa kauta kaya kecega na bilo sa caka e na koula, kei na siliva, kei na parasa.

11O qori talega ka vakatabuya ko Tavita na tui me nei Jiova, vata kei na siliva kei na koula sa kauta mai ko koya mai na matanitu kecega; mai Itomi, mai Moapi talega, ka maivei ira na luve i Amoni, ka maivei ira na kai Filistia, ka maivei ira na Amaleki.

12Ia ka sa yavita ko Episai, na luve i Siruya, e tinikawalu na udolu vei ira na kai Itomi, e na buca ni masima.

13A sa vakatikora nai valu e Itomi, a ra sa yaco ko ira kecega na kai Itomi me ra tamata i Tavita.

A sa vakabulai Tavita ko Jiova e na veiyasana sa lako kina.

14A sa tui ko Tavita vei ira kecega na Isireli, a sa kitaka tiko na lewa kei na sauma dodonu vei ira kecega na nona tamata.

15A sa lewai ira nai valu ko Yoapi na luve i Siruya; a sa dauvola nai valavala ni matanitu ko Yiosafati na luve i Eiiluti.

16Ia erau sa bete ko Satoki na luve i Eiitupi, kei Apimeleki na luve i Epiyacari, a sa vu-ni-vola ko Savisa;

17a sa lewai ira na Kireci kei ira na Pileci ko Pinaya na luve i Yioyata; a sa liu ko iratou na luve i Tavita vei ira era sa voleka vua na tui.