I. A Veika Sa Caka E Na Veigauna 17 - AI VOLA TABU（FIJ1864）

Sa via tara ko Tavita na vale vei Jiova, a sa talai Nacani ko Jiova vei Tavita, me kakua ni tara, 1-15. Ai masu ka vakavinavinaka ko Tavita, 16-27.

1IA ni sa tiko ko Tavita e na nona vale, sa kaya ko Tavita kivei Nacani na parofita, Raica, au sa tiko e na vale sitari, a sa tiko na kato ni veiyalayalati i Jiova e na ruku ni veigatu.

2Sa qai kaya ko Nacani vei Tavita, Mo kitaka na ka kecega sa tu e lomamu; ni sa tiko kei iko na Kalou.

3A sa lako mai na vosa ni Kalou e na bogi ko ya kivei Nacani, a sa kaya,

4Mo laʼki tukuna kivei Tavita na noqu tamata, Sa vosa vakaoqo ko Jiova, O na sega ni tara na vale meʼu tiko kina:

5ni sa sega e dua na vale kaʼu sa tiko kina mai na siga kaʼu a kauti ira cake kina na Isireli, ka yacova na siga o qo; ia kaʼu a lako voli mai na vale gatu e dua ki na vale gatu e dua, kei na vale-tikotiko:

6e na veiyasana kecega kaʼu sa lako voli kina kei ira kecega na Isireli, sa dua li na vosa au a kaya vua e dua sa lewai ira na Isireli, o ira au a vakarota me vakani ira na noqu tamata, me vakaoqo, A cava dou a sega kina ni tara e dua na vale sitari me noqu?

7Ia o qo, mo vosa vakaoqo vua na noqu tamata ko Tavita, Sa kaya vakaoqo ko Jiova ni lewe vuqa, Au a kauti iko mai na bai ni sipi, io mai na muria na veisipi, mo nodra tui na noqu tamata na Isireli:

8ia kaʼu sa tiko vata kei iko e na yasana kece ko a lako kina, ka muduki ira kece tani na nomu meca mai na matamu, ka cakava me dua na yacamu me vaka na yacadra na tamata levu e vuravura.

9Au na lesia talega e dua na yasana me nodra na noqu tamata na Isireli, ia kaʼu na tei ira, a ra na tiko e na nodra yasana, a ra na sega ni kauti tani tale; ia ena sega talega ni vakacacataki ira tale ko ira na luve ni valavala ca, me vaka e nai vakatekivu,

10ka mai na gauna kaʼu a lesia kina na dauveilewai vei ira na noqu tamata na Isireli. Ia kaʼu na vakamalumalumutaka talega na nomu meca kecega. Au sa tukuna talega vei iko, ni na tara e dua na vale ko Jiova me nomu.

11Ia ena yaco mai ni sa oti na nomu si ga mo lako kina vei ira na nomu qase, au na qai vakatubura na nomu kawa me muri iko, e na dua vei iratou na luvemu tagane: ia kaʼu na vakataudeitaka na nona matanitu.

12Ena tara e dua na vale ko koya me noqu, ia kaʼu na vakataudeitaka na nonai tikotiko vakaturaga me sega ni oti.

13Ena tamana koi au, ia na luvequ ko koya: ia kaʼu na sega ni kauta tani vua na noqu loloma, me vaka kaʼu a kauta tani maivei koya sa tiko eliu vei iko:

14ia kaʼu na vakatikori koya e na noqu vale kei na noqu matanitu ka tawa mudu: ia ena vakataudeitaki na nonai tikotiko vakaturaga me sega ni oti.

15Sa vaka na vosa kecega o qo, ka vaka na raivotu kece o qo, sa vakakina talega na vosa i Nacani kivei Tavita.

16A sa lako mai ko Tavita na tui ka tiko e na mata i Jiova, a sa kaya, O cei koi au, i Jiova na Kalou, se cava mada na noqu mataqali, ko sa kauti au mai kina kike?

17Ia ka sa ka lailai talega o qo e matamu, i Jiova; ni ko sa vosataka na noqu kawa na nomu tamata e na gauna sa bera sara ni yaco, ka ko sa golevi au me vaka sa tamata turaga, i Jiova na Kalou.

18A cava me kuria ko Tavita kivei iko e na vuku ni nomu doka na nomu tamata? ni ko sa kila na nomu tamata.

19I Jiova, ko sa cakava na ka levu kecega o qo e na vuku ni nomu tamata, me vaka talega na lomamu, ni ko sa vakarairaitaka na ka levu kece o qo.

20I Jiova, sa sega e dua sa tautauvata kei iko, ka sega tale na Kalou, o iko duaduaga, me vaka na ka kecega keitou sa rogoca e na daliga i keitou.

21Ia ko cei e dua na matanitu e vuravura sa tautauvata kei ira na nomu tamata na Isireli, o ira sa lakova ko na Kalou me volia me ra nona tamata, me cakava na yacamu me levu ka rerevaki, ni ko a vakasevi ira tani na veimatanitu e so e na matadra na nomu tamata, ko ira ko sa volia mai Ijipita?

22Ni ko sa cakavi ira na nomu tamata na Isireli, me ra nomu tamata ka tawa mudu: ia ko iko, i Jiova, o a yaco mo nodra Kalou.

23Ia o qo, i Jiova, me vakataudeitaki ka tawa mudu na ka ko sa vosataka e na vuku ni nomu tamata, ka e na vuku ni nona kawa, ia mo kitaka me vaka na nomu vosa:

24io, me vakataudeitaki, me vakacaucautaki kina na yacamu ka tawa mudu, ka vaka, Sa nodra Kalou na Isireli ko Jiova ni lewe vuqa, io sa Kalou vei ira na Isireli: ia me vakataudeitaki e matamu na mataqali i Tavita na nomu tamata.

25Ni ko sa tukuna mai vei au na nomu tamata, o iko na noqu Kalou, ni ko na tara e dua na vale me noqu: o koya sa yaloqu kina na nomu tamata me masu e matamu.

26Ia o qo, i Jiova, ko sa Kalou, ka sa yalata na ka vinaka o qo vei au na nomu tamata:

27ia o qo, me yalomu me vakalougatataka na noqu mataqali na nomu tamata, me tu ga e matamu ka tawa mudu: ni ko sa vakalougatataka, i Jiova, ka ena kalougata ka tawa mudu.